Question.
Nikah so Position ki ete dans l'Islam?
Reponse.
Hadice Hazrat Sa'd Bin Abou Waqqaas (r.a)
"عن سعد بن ابى وقاص يقول رد رسول الله صلى الله عليه وسلم على عثمان بن مظعون التبتل ولو اذن له لاختصينا"
(البخارى)
Traduction:
"Hazrat Sa'd Bin Abou Waqqaas (r.a) rapporté ki Rassouloullah (s.a.w) ti rejette la requête de Hazrat Usmaan Bin Maz'oune (r.a) concernant tabattul. Si li ti autorise li, nou ti pou faire castré nou" (Sahih Boukhari)
Explication:
Tabattul signifié reste célibataire. Hazrat Usmaan Bin Maz'oune (r.a) ti dimane permission avec Rassouloullah (s.a.w) pou reste célibataire. Nabi (s.a.w) pas fine accepté ça. Ti ena encore lezot Sahaba-e-Kiraam ki ti ena le même désir reste célibataire. Zotte ti pé attane gagne permission. Si Hazrat Usmaan Bin Maz'oune (r.a) ti gagne l'autorisation, zotte ti pou faire castré zotte pou pena le désir marié.
D'après banne Sahaba-e-Kiraam, peut être le but principal de l'organe sexuel c'était marié pou augmente la population. Si Nabi (s.a.w) ti approuve zotte requête reste célibataire, à ce moment-là pas ti pou ena aukene nécessité pou ça l'organe-là. Donc zotte ti pou faire castré zotte. C'est dans ça sens-là ki zotte ti pou permette zotte en même temps concentré pli facilement dans ibaadat.
D'après ene hadice ki trouve dans Tabraani, la requête de Hazrat Usmaan Bin Maz'oune (r.a) en réalité ti ene requête pou faire castration. D'après le hadice de Sahih Boukhari, la requête li concerne tabattul (reste célibataire). Li possible ki le rawi fine exprime castration par tabattul puisque tabattul li réalisé pli facilement par moyen de castration. L'essential c'était pou gagne la permission reste célibataire soit par moyen castration ou bien sans faire castré. Banne Sahaba-e-Kiraam ti pé attane permission et zotte ti tellement intéressé pou amène la vie célibataire ki zotte ti pou même disposé faire castré zotte si ça ti indispensable.
Ça hadice-là montré ki shariat désapprouve amène la vie célibataire. Si ene personne pena facilité marié, li recommandé pou garde roza continuellement. Quant à castration, ça li pas permette parceki li représente ene modification et changement dans la forme ki Allah Ta'ala fine accorde insaan et ça li ene inspiration satanique d'après Qour'aan-e-Kareem. A la lumière de ça, tous changement ou modification dans la forme ki Allah Ta'ala fine accorde insaan, li interdit. Et li pou reste interdit ziska nou gagne ene l'autorisation spécifique ou ene l'autre preuve ki dire le contraire et légalise ça.
Hadice Hazrat Abdullah Bin Mas'oud (r.a)
قال عبد الله بن مسعود : كنا مع النبى صلى الله عليه وسلم شبابا لا نجد شيئا فقال لنا رسول الله صلى الله عليه وسلم يا معشر الشباب من استطاع منكم الباءة فليتزوج فانه اغض للبصر واحصن للفرج ومن لم يستطع فعليه بالصوم فانه له وجاء
(البخارى)
Traduction:
"Hazrat Abdullah Bin Mas'oud (r.a) fine dire: Nou ti ensemble avec Nabi (s.a.w) quand nou ti jeune. Nou pas ti possède narien. Alors Rassouloullah (s.a.w) fine dire nou: O banne jeunes! Celui ki ena le moyen pou marié parmi zotte, li bizin marié parceki ça li ene moyen pli efficace pou baisse regard et ene pli bon moyen pou préserve parti privé. Et celui ki pena le moyen, li bizin applique le principe garde roza parceki ça li couma dire ene genre de castration pou li."
(Sahih Boukhari)
Explication:
Rassouloullah (s.a.w) fine donne l'ordre pou faire nikah à banne ki ena le moyen. Ziska preuve du contraire, li obligatoire exécute l'ordre Nabi (s.a.w). Donc nikah li obligatoire lors ene dimoune ki ena le moyen. Mais ça "obligatoire-là" li appliqué pou ene dimoune ki so désir sexuel li ene ti pé pli fort ki normal. Parceki Rassouloullah (s.a.w) fine ordonne pou garde roza continuellement en cas si ene dimoune pena le moyen pou marié. Ene dimoune ki so constitution li normal, li pena aukene nécessité garde roza dans le but pou garde so désir sexuel sous contrôle. C'est necque ene ki so désir li assez fort ki bizin ça. Donc ça montré ki ça hadice-là li adressé à banne ki zotte désir sexuel li pli fort ki normal. C'est pou ça catégorie dimoune-là ki Nabi (s.a.w) fine oblige zotte faire nikah si zotte ena le moyen. Le moyen veut dire la capacité financière ki permette ene dimoune prend responsabilité ene madame. Et banne ki pena ça moyen-là, Nabi (s.a.w) fine ordonne zotte pou garde roza continuellement afin ki ça capave garde zotte désir sous contrôle.
Dans ça hadice-là Rassouloullah (s.a.w) fine adresse la parole à banne jeunes. Ça capave donne l'impression ki ça l'ordre-là li concerne banne jeunes seulement mais pourtant ça li applique en général pou tout banne ki ena le désir sexuel impé plis ki normal, ki ce soit jeune ou vieux. Malgré ça si Nabi (s.a.w) fine adresse banne jeunes en particulier, c'est àcoze ki dans la pratique, c'est zotte même ki ena ça désir-là pli fort. D'après ça hadice-là, ça désir fort-là capave être contrôlé par faire nikah ou bien garde roza continuellement.
Nabi (s.a.w) fine qualifié garde roza continuellement de وجاء (Wijaa) ki signifié castration parceki couma la castration li enlève désir sexuel totalement, coumsa même garde roza continuellement li diminué ça désir-là à ene degré contrôlable. De par so l'effet ça fine être qualifié de ene genre de castration par Rassouloullah (s.a.w).
La position de nikah li varié selon constitution et l'état ene dimoune. C'est-à-dire pou certaine dimoune li capave seulement recommandé couma li capave obligatoire pou ene l'autre catégorie. Ça li dépanne lors l'état ene dimoune et le contexte dans lequel li pé vive. Donc par ça rapport-là ena cinq degré de nikah.
Les cinq degré de nikah:
1. Quand le désir li fort à ene degré ki tombe dans haraam vine inévitable, à ce moment-là nikah vine FARAZ.
2. Si li fort à ene degré ki ena fort possibilité tombe dans haraam, li vine WAAJIB.
3. Si ene dimoune sure ki li pou néglige so madame et li pou faire li misere, vaut mieux li pas marié parceki dans ene cas pareille nikah li HARAAM.
4. Si ena fort possibilité ki li pas pou capave occupe so madame couma bizin et li pou faire li misère, alors dans ene situation pareil nikah li MAKROUH.
5. Quand ene dimoune so constitution li normal et li ena de quoi ki permette li guette so madame bien, alors nikah li SOUNNAT MOU'AKKADAH.
Hadice Hazrat Anas (r.a)
عن انس بن مالك يقول جاء ثلاثة رهط الى بيوت ازواج النبى صلى الله عليه وسلم يسألون عن عبادة النبى صلى الله عليه وسلم فلما اخبروا كانهم تقالوها فقالوا واين نحن من النبى صلى الله عليه وسلم قد غفر له ما تقدم من ذنبه وما تاخر قال احدهم اما انا فانى اصلى الليل ابدا وقال آخر انا اصوم الدهر ولا افطر وقال آخر وانا اعتزل النساء فلا اتزوج ابدا فجاء رسول الله صلى الله عليه وسلم اليهم فقال انتم الذين قلتم كذا وكذا اما والله انى لاخشاكم لله واتقاكم له لكنى اصوم وافطر واصلى وارقد واتزوج النساء فمن رغب عن سنتى فليس منى
(البخارى)
Traduction:
Hazrat Anas Bin Malik (r.a) rapporté ki trois personnes fine vine la caze banne madames de Nabi (s.a.w) pou dimane zotte concernant ibaadat Nabi (s.a.w). Quand zotte fine gagne l'information, couma dire zotte fine trouve ça bien tigite. Mais après ça zotte fine dire: cote nou! Et cote Nabi (s.a.w)! (C'est-à-dire nou pas représente narien divant position très élevée de Nabi (s.a.w)). Quand tandis ki li fine être gracié pou ceki avant et pou ceki après! Alors ene parmi zotte fine dire: Quant à moi mo pou faire namaz pendant la nuit tout le temps. L'autre fine dire: moi mo pou garde roza tout le temps et mo pas discontinué roza. Et ene l'autre fine dire: moi mo pou reste loin avec banne madames et mo pas pou marié jamais.
Alors Nabi (s.a.w) fine alle guette zotte et fine dire: "Eski c'est zotte même ki fine faire telle ou telle déclaration? Laisse mo dire zotte ki par Allah mo pli ena la frayeur pou Allah ki zotte et mo pli ena l'obéissance pou li ki zotte. Malgré ça (parfois) mo garde roza et (parfois) mo pas gardé. Mo faire namaz (dans ene parti la nuit) couma mo dormi (dans ene parti) et mo marié avec banne madames. Donc celui ki tourne le dos avec mo sounnat, li pas avec moi."
(Sahih Boukhari)
Explication:
Le désir pou reste engagé et reste absorbé complément dans ibadaat fine faire ene groupe de Sahaba-e-Kiraam prend décision ferme pou passe entier la nuit dans ibaadat et garde roza dans la journée lors ene base permanent. Zotte fine même prend décision reste célibataire afin ki zotte capave consacré zotte totalement dans ibaadat. Mais Rassouloullah (s.a.w) pas fine approuve zotte décision et fine faire ressortir ki mangé boire et la vie mariage li pas en conflit avec taqwa. Au contraire c'est la meilleur façon pou vive dans l'obéissance Allah Ta'ala parceki ça façon vive-là c'est la façon de Nabi (s.a.w) ki ena pli boucou taqwa et ki ena pli boucou la frayeur pou Allah Ta'ala. Ça hadice-là montré ki mariage c'est le principe et sounnat de Nabi (s.a.w). La vie mariage c'est la vie ki ressemblé avec la vie Nabi (s.a.w). Donc li pli bon ki reste célibataire. Et considère la vie mariage en conflit de taqwa et de l'obéissance à Allah Ta'ala li représente tourne le dos avec le noble principe et le moubaarak tareeqah de Nabi (s.a.w).
