Zenfant dans saff grand dimoune

Question.

Est-ce ki banne zenfant gagne droit faire namaz faraz dans saff grand dimoune ?

Reponse.

Li pas bon mette zenfant diboute dans saff banne grand dimoune. Boucou dimoune faire zotte zenfant diboute à coté zotte dans saff grand dimoune. Li pas ene bon pratique. D’après le mouswannaf Ibn Abou Shaibah, Hazrat ‘Oumar (r.a.) ti pé tire zenfant depi dans saff. D’après ene hadice ki trouve dans Sounan Abou Dawoud, Rassouloullah  ti pé classe saff banne zenfant derrière saff banne grand dimoune. Ena dimoune dire ki ça hadice-là li pas authentique acoze présence ene narrateur nommé Shahr Bin Hawshab dans so sanad. Mais pena narien de mal avec le narrateur Shahr Bin Hawshab parceki Imam Tirmizi meme fine qualifié banne hadice ki li fine rapporté de authentique. Apart Imam Tirmizi, banne savants de hadice couma Allaamah Al-Haithami, Allaamah Bin Hajar Al-Asqalaani aussi fine accepté li comme ene narrateur correcte.

Donc pena aukene raison pou rejette hadice ki li fine rapporté. Pou banne ki conné li bon ki zotte jette ene coup d’œil lors Meezanul-I’tidaal de Allaamah Az-Zahabi pou plis renseignement.