Probleme sinizite et lave la tete quand faire ghussal

Question:

Mo ene madame ki mo ena problème sinizite. Mo gagne douleur la tête quand mo lave mo la tête dans ghussal. Ça problème-là li pas réglé même si mo faire ghussal avec de l'eau chaud. Ki mo bizin faire?

Réponse:

Dans ça cas-là, li permette pas lave la tête. Au lieu ça capave necque faire massah lors la tête. C'est-à-dire lave entier le corps dans ghussal et necque passe la main mouillé lors la tête. Ça passe la main mouillé-là li suffi pou ou ghussal compté. Avec ça ghussal-là ou capave faire ou namaz, ou capave garde ou roza et ou capave faire ou tilaawat Qour'aan. Ça ghussal-là li pou reste valable tanque ki ou pas capave lave ou la tête. Si arrive ene moment cote ou trouvé ki ou capave lave la tête sans ki ou gagne problème, alors ou bizin necque lave ou la tête. Pas nécessaire lave entier le corps. Li bon à noté ki si ene madame ena ça problème-là, ça na pas empêche li alle dans ménage. Li ena tout droit d'après shariat pou alle dans ménage quand même li conné ki li pas pou capave lave so la tête.

Trippe ( Gagne droit manger ? )

Question.

Est-ce ki gagne droit mange tripe?

Reponse.

Selon ene hadice ki trouve dans Maraasil Abou Dawoud, Tabraani, Mouswannaf Abdurrazzzaq et Sounan Al-Baihaqui, Rassouloullah (s.a.w) fine désapprouve la consommation de 7 parties depuis dans ene bouc. Pou banne 'Oulama, ça règle-là li pas restreint à ene bouc seulement.

Ça li applique pou tous zanimau ki halaal consommé. Donc d'après ça hadice-là, c'est necque ça sept parties ki Rassouloullah (s.a.w) fine désapprouvé-là ki haraam.

1. Organe sexuelle de ene mal.

2. Organe sexuel de ene femelle.

3. Sac testicule.

4. Vesicule biliaire.

5. La vessie.

6. Du sang.

7. Glandes.

Et tripe li pas trouve dans ça sept parties ki Rassouloullah (s.a.w) fine désapprouvé. Donc li halaal. Si nou inclure tripe là-dans, li pou vine huit. Li pas pou reste sept ki Nabi (s.a.w) fine mentionné. Dans ça cas-là li pou ene l'ajoute lors ceki Nabi (s.a.w) fine précisé et ça li bien pas bon.

Donc tripe li halaal acoze ki Nabi (s.a.w) pas fine mentionne li dans ça sept kitchose ki li fine désapprouvé. Alors ene dimoune gagne droit pas mange li si li délicat mais li pas gagne droit qualifié li de makrouh ou bien haraam.

Gaspillage

Question.

Combien qualite gaspillage ena?

Quraan ki dire concernant gaspillage?

Reponse.

Principalement ena deux façons de gaspillage.

(1) La première façon cote ene dimoune li bizin dépensé mais li dépense plis ki bizin. Ça en plis-là c'est ene gaspillage. Et ça qualité gaspillage-là appelle li Is-raaf ki li haraam.

(2) Ena ene deuxième qualité gaspillage. C'est-à-dire ene dimoune dépense so la monnaie cote pas gagne droit même dépensé.

Exemple:

Par exemple ene dimoune dépense so la monnaie dans casino, dans joué le course, dans acheté film, dans alle guette cinéma, dans dépense la monnaie pou faire chanté-dansé etc. Dépense la monnaie cote pas gagne droit dépensé appelle Tabzheer.

Qour'aan-e-Kareem et gaspillage:

Qour'aan-e-Kareem qualifié banne ki dépense zotte la monnaie cote pas gagne droit dépensé de banne frères de shaitaan. Donc d'après Qour'aan, banne ki dépense zotte la monnaie dans banne kitchose haraam, c'est banne frères de shaitaan.

Gaspillage dans mangé-boire:

Nous faire boucou gaspillage dans mangé-boire. Par exemple quand nou mangé, nou prend dans nous plat ene quantité ki nous pas capave mangé. Si nous calcule la quantité mangé ki nous jette dans poubelle tous les jours, nous pou trouvé ki ça li capave suffit pou nourri ene ou deux dimoune en plis. Dans ene le monde cote ene quantité dimoune pena mangé, li bien chagrinant banne ki ena, zotte pé faire gaspillage. Chaque grain du riz et chaque goûte de l'eau c'est faveur Allah Ta'ala. Faudré pas nou maltraite ça faveur-là.

Quand nou assizé pou mangé, nous prend ene tigite ki nou capave mange li. Et si bizin, nou capave prend ene deuxième fois encore. Ça pou empêche nou faire gaspillage. Faudré pas nou jette ene la grain du riz aussi parceki nou pou bizin repone pou chaque grain du riz et chaque goûte de l'eau ki nou fine capave gaspillé. Ça genre de gaspillage-là nou capave trouve li surtout dans banne mariage.

Gaspillage de l'eau:

Nou ena ene l'autre qualité gaspillage. C'est gaspillage de l'eau. Gaspillage de l'eau li tellement pas bon ki pas gagne droit servi li plis ki bizin quand même pou faire ghoussal ou bien pou faire wazou.
Zordi jour nou ena ene mauvais manière laisse de l'eau allé plis ki bizin quand nou faire wazou dans masjid. Li bon conné ki li ene très bon travail quand nou pé faire wazou. Mais ça aussi li nécessaire conné ki nou pé faire ene grand erreur quand nou pé servi de l'eau plis ki bizin pou ça travail-là.

Gaspillage dans lave l'auto:

Parfois le cœur faire mal quand ou trouve ça quantité de l'eau ki gaspillé dans lave l'auto. Ou trouve gros de l'eau pé alle dans vide dans canal et dimoune-là li dans conversation avec kikene. Nou tous conné ki c'est ou même ki pou paye facture ça de l'eau-là mais eski ça li ene raison ki ou capave laisse li alle dans vide? Définitivement non!
Ena ene l'autre catégorie ki prend de l'eau dans jardin public pou lave so l'auto. Sane-là li ene ti pé pli grave parceki d'abord li pé gaspillé et deuxièmement li pé gaspille de l'eau ki pas pou li.

Gaspillage dans illumination:

Coumsa même nou trouve grand grand illumination à l'occasion mariage ki coûte bien cher. Et ça li duré parfois pendant ene semaine. Et d'après renseignement ça li coûte à peu près 70 à 75 mille roupies. Ki utilité ena dans dépense ene somme aussi conséquent. C'est ene la folie et ene mal dépense. Et ça li haraam sans réserve. Ça kitchose-là nou trouve li parfois dans masjid aussi. Banne 'Oulama et banne Fouqaha (Juristes) zotte tous d'accord ki ça li pas permette. C'est ene mal dépense et li haraam.

Irtidaad (l'apostasie)

Question.

Ki veut dire Irtidaad (l'apostasie) et ki so gravite et punition ?

Reponse.

Ene fois ki ene dimoune fine embrasse l’Islam, li pas autorisé dans aukene façon pou quitte l’Islam. Là li pas gagne droit converti à ene l’autre religion. Si jamais li abandonne l’Islam après avoir accepté li, ça veut dire ki li fine commette Riddah ou Irtidaad ki nou appelle li l’apostasie. La personne ki commette ça, appelle li ene Mourtad.

La gravité de Riddah (l’apostasie):

Ene Mourtad li pli pire ki ene kaafir d’origine. Ene personne ki fine rejette l’Islam par alle dans ene l’autre religion ou bien par vine ene athée, so position li pli grave ki ene personne ki jamais ti embrasse l’Islam. Li tout à fait normal pou comprend ça parceki ene camarade ki converti en ene l’ennemi, li pli détestable ki ene l’ennemi de tout le temps ki jamais ti ou camarade. Ene personne ki jamais ou ti conne li et ki ti ene étranger pou ou, ou capave pas éprouve aukene sentiment négatif pou li mais ene personne ki fine déjà reste ou partenaire dans la vie, li vine ou l’ennemi pli détestable quand li tourne le dos avec ou. Dans la même façon, ene personne ki fine sorti depi dans l’Islam après avoir embrasse li, li couma dire ene personne ki fine tourne le dos avec ou après avoir reste ou camarade. C’est ene acte de trahison. Trahison envers le Créateur Suprême ! Donc c’est ene pli grand trahison ki ene dimoune capave commette. Acoze ça, so conséquence aussi li bien bien grave.

Conséquence Riddah (l’apostasie) dans Dounia:

A peine ene dimoune sorti depi dans l’Islam, so nikah cassé. Tous so banne actions ki li fine faire, zotte annulé. So namaz, so roza, so hajj et tous so banne ibaadat alle dans dilo. Astere si li faire tawbah et li re-rente dans Deen, li bizin renouvelé so nikah avec so madame. Si li regagne le moyen pou faire hajj, li bizin refaire hajj.

Si li gagne l’occasion et le tawfeeq pou re-rente dans Deen, li bizin considère ça l’occasion-là couma le pli grand faveur ki Allah Ta’ala fine accorde li parceki li fine sappé depi ene souffrance éternelle. Reste souffert tout le temps, li pas ene ti zaffaire ça. Mais si par malheur li fine mort lors kufr sans retourne dans Deen, alors li fine fini pou tout le temps. Perna l’avenir. Perna ça kitchose ki appelle le bien-être. Astere perna narien apart souffrance.

Allah Ta’ala dire dans Qour’aan-e-Kareem :

“Celui ki sorti parmi ou depi dans so Deen (l’Islam) et li mort couma ene kaafir, c’est banne ki zotte banne actions fine annulé dans Dounia et dans Aakhirat. C’est banne résidents de l’enfer. Zotte pou reste là-dans pou tout le temps.” (S2/V217)

Doah pou mort lors Imaan:

Le salut éternel de ene dimoune et so bien être, li dépanne lors quitte ça dounia-là avec Imaan. Acoze ça, faveur ki Allah Ta’ala fine accorde nou en forme de Imaan, li ene faveur inestimable. C’est le plus grand faveur. Perna aukene cadeau pli précieux ki ça. Acoze ça tout le temps nou bizin supplié Allah Ta’ala pou garde nou avec Imaan tanque nou vivant et lève nou par so grâce immense et infini avec Imaan :

"... فاطر السموت والارض انت ولى فى الدنيا والاخرة توفنى مسلما والحقنى بالصلحين"

“O Créateur le ciel et la terre. To même mo protecteur dans Dounia et dans Aakhirat. Lève moi couma ene musulman et raccroche moi avec banne personnages pieux. ” (S12/V101)

Si ene dimoune quitte ça Dounia-là sans Imaan - ki Allah Ta’ala protége nou tous de ça par so grâce et so bonté - narien pas pou capave sappe li. So richesse, so du bien, so famille, so l’influence et so popularité, narien pas pou capave ranne li service !

“Ça jour ki ni du bien ni zenfant capave ranne service. Excepté ene personne ki fine présente acote Allah Ta’ala avec ene le cœur pure. ” (S26/V88-89)

Dans aakhirat, ena ene seule kitchose ki servi là-bas ! Ça c’est Imaan. Apart ça narien na pas pou utile.

Punition éternelle pou kufr et Riddah (l’apostasie):

Allah Ta’ala dire dans Qour’aan-e-Kareem :

“Certainement banne ki fine commette kufr et zotte fine mort couma kaafir, alors l’or la quantité ki capave rempli la terre aussi pas pou accepté de la part de kikene parmi ou si li oulé donne ça comme rançon. Zotte pas pou ena personne pou aide zotte.” (S3/V91)

Ça verset-là montré le degré de dégoût ki Allah Ta’ala ena pou ene ki mort lors kufr. Et pourtant Allah Ta’ala li rempli de pitié, de grâce et de bonté immense et infini. Si malgré ça, Allah Ta’ala fine réserve punition éternelle, ça montré ki quantité dégoûtant et grave ça péché-là été. Etant donné ki l’apostasie li trouve dans degré pli grave et pli inférieure ki kufr, li sufi pou gagne ene ti l’idée de ki quantité indésirable et détestable, la personne ki quitte Deen pou été dans lizié Allah Ta’ala.

Riddah (l’apostasie) – Trahison intolérable:

L’état islamique pas tolère dans aukene façon ça pli grand trahison ki Riddah (l’apostasie) représenté envers le Créateur Suprême. Ene personne ki commette ça et li converti de l’Islam à ene l’autre religion, li passible à la peine de mort dans l’état islamique. Mais d’abord l’état islamique donne li l’occasion pendant quelques jours pou repentir. Si li pas repentir et li maintenir so position, alors d’après la loi islamique, bizin exécute li. Dans ene hadice, Rassouloullah (s.a.w) fine dire :

“Celui ki change so Deen (Islam) alors touye li. ” (Sahih Boukhari)

Ibn Qudamah dire dans so Al-Mughni :

“Banne savants zotte unanime lors l’obligation exécute banne ki fine commette irtidaad (l’apostasie). Ça fine être rapporté de Hazrat Abou Bakar (r.a.) , Hazrat Usman (r.a.), Hazrat Ali (r.a.), Hazrat Mou’aaz (r.a.), Hazrat Abou Moussa (r.a.), Hazrat Abdullah Bin Abbaas (r.a.), Hazrat Khalid (r.a.)et lezot. Et ça pas fine être contesté. Donc lirepresente ene consensus.” 

D’après certains savants, ça li applique pou ene zomme. Quant à ene madame ki fine commette ça, alors ena l’emprisonnement pou li ziska ki li repentir. De toute façon ene musulman pas gagne droit quitte so religion. Li pas permette pou li quitte so Deen. Pena aukene raison ou kit circonstance cote ene musulman gagne droit renonce l’Islam. Ene ki quitte l’Islam après avoir accepté li, li ene traître et ene rebelle. Ene traître ou ene rebelle c’est l’ennemi pli pire de ene l’état. Donc ene Mourtad c’est ene l’ennemi pli pire pou ene état Islamique.

Punir ene Mourtad li à l’état

Personne pas gagne droit prend la loi dans so la main. Punition et sanction ki ena pou prend conte ene Mourtad et aussi pou banne délits couma adultère, vol etc., li trouve dans pouvoir l’état Islamique. Ça pas capave exécuté par banne individus.

L’état Islamique

Ene gouvernement ou ene l’état li pas formé par ene ou deux individus. Li formé par ene lepep ki envi vive d’après ene certaine code ou bien d'après ene certaine législation. Chaque lepep li senti li libre pou choisir ene code, ene ligne de conduite ou bien ene système politique. Ena trouvé ki banne vices, immoralités et l’indécences couma l’adultère, prostitution, homosexualité, la nudité et la boisson alcoolique etc. pas dérange la bonne marche de zotte régime. Zotte appelle ça la liberté et pou zotte c’est le progrès et le développement ki zotte fier de ça.

De l’autre coté nou ena l’Islam ki c’est ene code complète de la vie et ene idéologie inegale. Ça idéologie-là li ene idéologie révélée ki basée principalement lors la révélation divine en forme de Qour’aan-e-Kareem et l’enseignement de Rassouloullah  en forme de hadice. Le fait ki c’est ene idéologie sans faille, li capave adapté dans tous banne circonstance, dans tous l’époque et avec tous dimoune. C’est la seule façon de vive ki apprécié par Allah Ta’ala et c’est la seule mode de vie ki garantie le salut éternel.

L’Islam li vise pou accorde la sécurité, la paix et l’harmonie à chaque individu dans la société. Pou cela li préconise banne mesures très sévère contre banne malfaiteurs ki capave bouleverse toute ene société et menace le bien-être de tout un chacun. Donc nou ena deux choix devant nou.

1. Etre sévère envers quelque individus ki coupable pou permette le reste de la grande population vive en paix et en sécurité en ceki concerne zotte la vie, zotte dignité et zotte du bien et zotte la famille.

2. Ou bien adopté la tolérance et le laissé-allé envers banne coupable ki menace et endange toute ene lepep innocent ki incapable pou assure so propre sécurité.

L’Islam fine choisir le premier c'est-à-dire li fine adopté ene l’attitude très sévère envers les coupables afin ki toute ene population capave respiré dans ene l’atmosphère propre et pure en toute sécurité et toute liberté.

Qourbani (Defauts)

Question.

Est-ce ki gagne droit faire qourbaani avec zanimaux ki ena sa banne defaut suivant la ?

1. Qourbaani avec ene zanimau ki so zoreille coupé.

2. Qourbaani avec ene zanimau ki so corne cassé.

3. Qourbaani avec ene zanimau ki so la queue coupé.

4. Qourbaani avec ene zanimau ki borgne, ki malade, ki boiteux, vieux ou bien ki maigre.

5. Qourbaani avec ene zanimau pincé.

6. Qourbaani avec ene zanimau ki pena le dent.

7. Qourbaani avec ene zanimau ki fou.

Reponse.

Qourbaani avec ene zanimau ki so zoreille coupé.

Ene zanimau ki so zoreille coupé li ene defaut. Mais pou gagne ene zanimau ki tout so l'organe correcte à cent pour cent et ki pena défaut ditout, li paraite pratiquement impossible. Exige ene tel qualité zanimau pou le besoin de Qourbaani, li couma dire pé dimane pou faire l'impossible. Li ene façon pou ferme la porte de Qourbaani. Donc ena ene certaine quantité défaut ki tolérable. Normalement ça ene certaine quantité ki tolérable-là, li bizin pas boucou. Li bizin tigite même.
D'après Hazrat Said Bin Al-Moussayab , boucou veut dire la moitié ou plis ki la moitié. Quant à Imam Abou Hanifah (R), li considère comme tolérable ziska 1/3. C’est-à-dire ene zanimau ki so zoreille coupé ziska 1/3, li passable et capave faire Qourbaani avec ça. Si li plis ki ça, pas capave faire Qourbaani. L'opinion de Imam Abou Hanifah (R) li paraite pli correcte parceki ena pli boucou precaution là-dans. Donc d'après ça verdict-là, pas capave faire Qourbaani avec ene zanimau ki so zoreille li coupé plis ki 1/3. Coumsa même li pas permette faire Qourbaani avec ene zanimau ki pena zoreille ditout.

Qourbaani avec ene zanimau ki so corne cassé.

Selon ene hadice authentique ki trouve dans At-Tahaawi ene personne fine dimane Hazrat Ali (r.a.) apropos ene zanimau ki so corne fine cassé. En réponse Hazrat Ali (r.a.) dire li ki perna aukene problème là-dans. Ça li donne l'impression ki capave faire Qourbaani avec ene zanimau ki so corne fine cassé. Mais nou ena ene hadice de Nabi (s.a.w) ki dire ki pas gagne droit faire Qourbaani avec ene zanimau ki so corne fine cassé. Ça amène nou pou comprend ki ena certaine qualité cassé ki tolérable et ena certaine qualité ki pas tolérable. D’après ene hadice ki trouve dans Sounan Abou Dawood, Rassouloullah (s.a.w) fine empêche pou faire Qourbaani avec Mousta’swalah.

Mousta’swalah c’est ene zanimau ki so corne fine cassé depi dans so racine. Ça montré ki ene qualité cassé ki empêche faire Qourbaani c’est ceki fine cassé depi dans so racine. Quant à ene corne ki fine cassé depi là-haut racine, ça li pas ene défaut ki empêche faire Qourbaani couma ça pé prouvé par fatwa ki Hazrat Ali (r.a.) fine donné. Ene corne ki cassé depi dans racine, li ene défaut dans zanimau parceki normalement ene corne ki casse dans ça façon-là li affecté la cervelle. Donc ene corne ki casse depi là-haut, li pas ene défaut. Alors li pas empêché faire Qourbaani. Coumsa même ene zanimau ki pena ditout corne, ça aussi capave faire Qourbaani avec li.

Qourbaani avec ene zanimau ki so la queue coupé.

La queue aussi li ene l’organe important dans ene zanimau. Ene zanimau ki so la queue fine coupé, li pou tolérable ziska 1/3. Si li fine coupé plis ki 1/3, li pas pou permette faire Qourbaani avec ça zanimau-là.

Qourbaani avec ene zanimau ki borgne, ki malade, ki boiteux, vieux ou bien ki maigre.

Dans ene hadice Rassouloullah (s.a.w) fine dire : 
Ena 4 qualités zanimau ki pas permette dans Qourbaani :- 

1. Ene zanimau ki borgne dans ene façon bien évidente, 

2. Ene zanimau ki bien malade,

3. Ene zanimau ki bien boiteux et 

4. Ene vieux zanimau ki maigre à tel point ki perna la moelle dans so banne lezos. (Abou Dawoud)

Ça hadice-là montré ki ça banne défaut-là zotte toléré dans ene zanimau de Qourbaani à ene certaine degré. Quand ça li vine dans ene degré bien fort, à ce moment-là pas capave servi pou faire Qourbaani. Dans le hadice fine appelle ça degré pli fort-là "bayyine" ki signifié ene kitchose clair et évident. Dans situé ça degré ki appelle bayyine ou bien évident-là, banne ‘Oulama fine ena divergence. 

D’après certaine ‘Oulama, bayyine exprime ene degré de 50 pour cent ou plis ki 50 pour cent. Donc d'après ça banne 'Oulama-là, ene défaut li tolérable ziska moins ki 50 pour cent. Selon ene l’autre groupe, ça li exprime ene degré de plis ki 33 pour cent. Donc d'après ça groupe-là, ene défaut li tolérable ziska 33 pour cent. Quand li dépasse ça degré-là, li vine bayyine. Etant donné ki ça 2eme là ena pli boucou précaution, alors fine adopté li comme l’opinion officielle. Selon ça l’opinion-là pas pou gagne droit faire Qourbaani avec ene zanimau ki so vue fine affecté de plis ki 33 pour cent. Par cela li clair ki ene zanimau ki borgne ou aveugle pas pou capave servi li pou Qourbaani. Coumsa même pas capave servi pou faire Qourbaani ene zanimau malade ki près pou mort.

Ene zanimau boiteux ki pas capave servi dans Qourbaani, c’est ene zanimau ki pas capave pose so ene la patte ditout. Li marche lors seulement trois la patte. Mais si li boiteux ene quantité ki pas empêche li pose so la patte enbas quand li pé marché, alors ça quantité-là li passable et tolerable pou le besoin de Qourbaani.

Ene zanimau ki fine vine maigre à coze vieillesse ou acoze ki li fine mal nourri à tel point ki so la moelle fine sec dans so banne lezos, pas capave servi pou faire Qourbaani.

Qourbaani avec ene zanimau pincé

"Quand Rassouloullah (s.a.w) ti pé décide faire Qourbaani, li ti pé acheté deux moutons gros, gras, ki ena corne, de couleur blanc ki nuancé avec couleur noir et ki pincé." (Ibn Majah)

D'après ça hadice-là, ene zanimau ki fine être stérilisé par crase so testicule, li permette pou faire Qourbaani. Coumsa même ene zanimau ki so testicule fine enlevé aussi capave faire Qourbaani. Ça li paraite ene défaut mais c'est ene défaut ou manquement ki faire boucou du bien parceki ça li aide ça zanimau-là grossi et engraissé pli bien et li faire so la chaire vine pli goûteux. Donc Shariat fine tolere ene ti manquement vis-à-vis ene grand l'avantage.

Qourbaani avec ene zanimau ki pena le dent.

(Hazrat) Twa-ouse dire capave faire Qourbaani avec ene zanimau ki perna le dent. (Talkheesul-Habeer)
Ene zanimau ki perna le dent ditout appelle li "Hatmaa". Quant à "Tharma" c'est ene zanimau ki perna ene parti le dent. Li paraite ki le dent li pas ene parti ki essentiel dans ene zanimau d'après Hazrat Twa-ouse. C'est pou cela ki so l'absence d'après Hazrat Twa-wouse, li pas ene défaut dans ene zanimau. Donc ene zanimau ki pena le dent ditout d'après li, capave servi pou faire Qourbaani. D'après banne Fouqaha couma Imam Abou Hanifah (R) et Imam Abou Yousouf (R), le dent li ene parti essentiel dans ene zanimau en sorte ki so l'absence li ranne ça zanimau-là défectueux en ceki concerne Qourbaani. Le dent dans ene zanimau li essentiel parceki li aide ene zanimau pou mangé avec facilité. Donc ene zanimau ki perna ditout le dent, li supposé pas bien nourri. Alors li ene défaut ki empêche servi li pou Qourbaani. Couma ça pas permette, coumsa même ene zanimau ki so majeur parti le dent fine tombé aussi pas permette. Donc ceki permette c'est ene zanimau ki ena tous so le dent ou bien ki ena la plupart le dent.

Qourbaani avec ene zanimau ki fou.

(Hazrat) Hassan (Al-Basri) dire:
Perna narien de mal dans faire Qourbaani avec ene zanimau ki fou. (Talkheesul-Habeer)

Ene zanimau ki fou li ene zanimau ki capave servi pou faire Qourbaani parceki c'est ene défaut ki tolérable. A moins si ça empêche zanimau-là mangé boire, à ce moment-là li pas pou permette. La folie dans ene zanimau ki empêche li mangé li ene défaut parceki inévitablement ça pou faire ça zanimau-là périr. Couma dire li ene zanimau ki pé alle mort. Ene zanimau pareil pas capave faire Qourbaani avec li. La déclaration de Hazrat Hassan Al-Basri li appliqué pou ene zanimau ki so la folie pas empêche li mangé.

Qourbaani (combien jour)

Question.

1. combien jour capave faire Qourbaani ?

2. A partir quand gagne droit faire Qourbaani ?

3. Jusqu'a quand gagne droit faire Qourbaani ?

Reponse. 1

“(Hazrat) Abdullah Bin ‘Oumar (r.a.) fine dire : Qourbaani c’est deux jours après (le premier) jour Qourbaani.” (Mou’atta Imaam Malik)

Jour Baqrid c’est le premier jour Qourbaani. Après ça ena encore deux jours ki capave faire Qourbaani. Donc capave faire Qourbaani pendant trois jours. Et ça li commencé apartir le 10eme Zulhijjah. Donc d'après ça hadice-là, Qourbaani li deroulé pendant le 10eme, 11eme et 12eme jour de Zulhijjah. 

Etant donné ki Islamiquement parlant, nous jour li terminé quand soleil couché, ça veut dire le troisième jour de Qourbaani li pou terminé avec le couché du soleil de 12eme Zulhijjah.

Reponse. 2

Dans ene hadice ki trouve dans Saheeh Boukhari et Saheeh Mouslim, Rassouloullah (s.a.w) fine dire :
“Celui ki fine faire zabah avant ki nous faire namaz (Eid), alors li bizin faire zabah ene l’autre (zanimau) dans so place. Celui ki pas ti encore faire zabah ziska ki nous fine faire namaz, alors li faire zabah lors nom Allah.”                                                                                     (Boukhari/Mouslim)

            
Dans ene l’autre hadice Rassouloullah (s.a.w) fine dire :

“Celui ki fine faire Qourbaani avant namaz (Eid), alors (couma dire) li fine faire Qourbaani pou so propre besoin. Et celui ki fine faire Qourbaani après, alors so Qourbaani fine complété et li fine mette en pratique correctement le principe de banne musulmans.”(Boukhari/Mouslim)

Faire Qourbaani pou so propre besoin veut dire li pas ene Qourbaani ki fine faire avec l’intention de ibaadat. C'est ene Qourbaani ki fine faire avec l'unique l'intention pou consommé. Si jamais fine faire li aussi avec ene l’intention de Ibaadat, alors li pas compté parceki li fine faire li avant so l’heure. Ene l’intention pareil li valable seulement quand fine faire li dans so l’heure. Li couma dire ene dimoune fine faire namaz avant so l'heure. Li tres normal ki ça namaz-là pas pou valable. Li capave gagne so sawaab mais ça li pas suffit pou decharge so responsabilité. Coumsa même ene Qourbaani ki fine faire avant l'heure, li pas valable pou faire la personne acquitté de so responsabilité. Selon ene hadice ki trouve dans Tabraani, Rassouloullah (s.a.w) fine dire :

“Celui ki fine faire zabah avant namaz (Eid), alors li pas ça Qourbaani-là. Qourbaani c’est necque ça (zanimau) ki fine faire zabah après namaz (Eid).”

Donc ça l’heure-là li commencé le jour Baqrid ou bien le 10eme Zulhijjah après ki fine fini faire namaz Eid. Si fine faire li avant ça, li pas compté. Bizin refaire li après.

 

Reponse. 3

D'après le hadice de Hazrat Abdullah Bin ‘Oumar (r.a.) ki fine mentionné là-haut, le jour de Qourbaani li terminé le 12eme Zulhijjah avec soleil couché.

Fatwa Hazrat Oumar (r.a.)

“Qourbaani c'est necque dans ça trois jours-là.” (Al-Mouhalla)

Fatwa Hazrat Ali (r.a.)

“Qourbaani (li pendant) ça trois jours-là. Meilleur là-dans c’est le premier jour.” (Al-Mouhalla)

Fatwa Hazrat Abdullah Bin Abbaas (r.a.)

“Banne jours de Qourbaani c’est trois jours.” (Al-Mouhalla)

Fatwa Hazrat Abou Hourairah (r.a.)

“Qourbaani c’est trois jours” (Al-Mouhalla)

Fatwa Hazrat Anas (r.a.)

 “Qourbaani c’est le   (10eme Zulhijjah) et deux jours après ça.” (Al-Mouhalla)

C'est-à-dire Qourbaani faire dans trois jours : 10eme, 11eme et 12eme jour de Zulhijjah.

Ene l’autre l’opinion

Selon ene l’autre l’opinion, Qourbaani li continué ziska 4eme jour ou bien ziska le 13eme jour de Zulhijjah. D’après ça l’opinion-là, au lieu 3 jours, Qourbaani capave faire pendant 4 jours : Le jour Eid plus 3 jours après Eid.

Ça l’opinion-là li supporté par ene déclaration de Hazrat Abdullah Bin Abbaas (r.a.) cote li dire :

“Qourbaani li continué pendant trois jours après le يوم النحر (Jour Eid).”

Dans so sanad ena ene rawi nommé Talha Bin Amr Al-Hadrami ki fine qualifié de ene rawi faible par Ibn Ma-ine, Abou Zur’ah et Darqutni. Donc c’est ene hadice faible. 

Par contre d'après le récit authentique ki fine rapporté de Hazrat Abdullah Bin Abbaas (r.a._, ena seulement 3 jours de Qourbaani. Par exemple dans Ahkaam-ul-Qour’aan, Allaamah At-Tahaawi fine rapporte la déclaration de Hazrat Abdullah Bin Abbaas (r.a.) avec ene sanad solide cote li dire :

“Qourbaani c’est deux jours après le يوم النحر (Jour Eid)”

Donc d'après ceki authentique, ena seulement trois jours de Qourbaani. Et ça récit cote li dire ki ena quatre jours Qourbaani, li pas authentique.

Qourbaani (nisaab dans different forme)

Question.

Ene personne ki gagne suffisamment revenue mais li pas possède ene quantité l’argent liquide en plus de so nécessité ki équivaux nisaab zakaat, et li pas endetté. Est-ce ki Qourbaani pou obligatoire lor li si li possède ene parmi sa banne items suivants la ?

1. Ene deuxième la caze en plus ki li pe loué.

2. Ene deuxième l’auto ki bien rare li servi.

3. Télévision, Dvd Player etc. (ki dans valeur nisaab ou plus).

4. Bannes effets personnelle ki en plus de so nécessité (ki dans valeur nisaab ou plus).

Reponse :

Principalement Qourbaani li obligatoire lor ene personne lor ki Sadaqatul-fitr li obligatoire. Donc si ene personne malgré li pas ena nisaab zakaat en l’argent liquide, Qourbaani pou obligatoire lor li si li possède ene parmi sa bannes items ki fine mentionné la haut la, parceki sa bannes kitchoses la zotte trouve en dehors nécessité de sa personne la.

Qourbani (Waajib)

Question.

Pou celui ki ena le moyen est-ce ki Qourbani li obligatoire lor li ou bien optionelle ?

Reponse.

Rassouloullah (s.a.w) fine adopté ene ton assez sévère à l’égard de celui ki pas faire Qourbaani malgré ki li ena le moyen. Li fine ziska même empêche ene personne pareil approché avec Eidgah. Ene ton sévère pas capave adopté lors ene action ki optionnelle. Li bizin ene action ki important et obligatoire. Ça ton sévère-là fine adopté lors pas faire Qourbaani malgré ki ena le moyen pou faire li. Donc ça prouvé ki Qourbaani li waajib (obligatoire) lors ene personne ki ena le moyen. En sus de ça, nou trouvé ki Nabi (s.a.w) fine continué faire Qourbaani pendant ene dizaine d'années ki li fine vive dans Madinah après Hijrah.

Selon ene hadice ki trouve dans Tirmizi, Hazrat Abdullah Bin ‘Oumar (r.a) dire:
Rassouloullah (s.a.w) fine continué faire Qourbaani pendant dix bananés ki li fine reste dans Madinah. (Tirmizi)

Ene pratique ki fine pratiqué par Rassouloullah (s.a.w) régulièrement, li vine ene principe assez important. Donc de ce fait, la pratique de Qourbaani ki fine pratiqué régulièrement par Rassouloullah (s.a.w)pendant ene dizaine d'années, montré ki c'est ene principe assez important. Et quand nou guette l’avertissement et le ton sévère ki Rassouloullah (s.a.w)fine lancé à l’égard de celui ki pas faire li, li vine encore pli important. C’est ça degré de l’importance-là même ki fine indiqué par waajib ou obligatoire. 

I'tikaaf

Question.

Si ene personne so i'tikaaf sunnah fine casser, couma li bizin remplacer?

Reponse.

li pou bizin remplace ene jour so i'tikaaf dans masjid et ensemble avec sa li bizin garde roza.

Namaz Nafil jour Eid

Question.

Est-ce ki gagne droit faire Namaz Nafl apres lever du soleil dans le jour du Eid ?

Reponse.

Nabi (s.a.w) fine recomanne pou faire deux rakaat namaz après soleil levé. Selon ene hadice ki trouve dans Tirmizi, Nabi (s.a.w) fine dire:

"Celui ki faire namaz fajar avec jamaate et ensuite li reste assizé dans faire zikrullah ziska ki soleil levé et après ça li faire deux rakaat, li pou ena ene récompense pareil couma récompense ene Hajj et ene 'Oumrah complète." 

Mais malgré ça, Nabi (s.a.w) pas ti faire aukene namaz nafil jour Eid et Baqr Eid avant faire namaz Eid ni dans la caze ni dans mouswalla (Eid-Gaah).

Selon ene hadice ki trouve dans Sahih Boukhari, Hazrat Abdullah Bin Abbaas (r.a) rapporté ki Nabi (s.a.w) fine faire deux rakaat namaz jour Eid-ul-Fitr. Li pas fine faire namaz (nafil) avant ça ni après ça. Mais d'après ene hadice ki trouve dans Ibn Majah, Rassouloullah (s.a.w) ti pé faire deux rakaat quand li ti pé retourne la caze. 

Ça montré ki si ene dimoune intéresse faire namaz nafil, li capave faire li quand li retourne so la caze après namaz Eid. Ça veut dire ki li pas capave faire namaz nafil dans so la caze avant li faire namaz Eid. Coumsa même li pas capave faire namaz nafil dans Eidgaah ou bien dans masjid avant namaz Eid. Et après namaz Eid aussi li pas capave faire dans masjid ou dans Eidgaah. C'est necque après namaz Eid ki li capave faire li quand li retourne so la caze.

6 roza de Shawwaal

Question.

ki reccompense gagner lor six roza de Shawwaal et est-ce ki li obligatoire pou garde li ?

Reponse.

Rassouloullah (s.a.w) fine dire : "Celui ki garde 6 roza dans Shawwaal après Ramadhan, li couma dire fine garde roza pendant toute longue l’année." (Sahih Mouslim)

Le mois Shawwaal c’est ça mois ki vine après le mois Ramadhan ki commencé par jour Eid. D’après hadice ena cinq jours dans ene l’année ki pas gagne droit garde roza là-dans :

1. Jour Eid,

2. Jour Baqr-Eid,

3. Et trois jours après Baqr-Eid ki appelle Ayaam-ut-Tashreeq.

Donc ça 6 roza ki recommandé garde dans Shawwaal, pou bizin vine automatiquement dans banne jours après le jour de Eid. C’est ene roza ki capave observe li ene seul trait couma capave garde li saute-sauté aussi. Pourvu garde li avant ki le mois Shawwaal terminé.

Li bon conné ki ça roza-là li pas obligatoire. Ça veut dire si kikene pas garde li, li pas gagne aukene péché. Ni gagne droit critique li ou blâme li. Mais si ene dimoune gardé, li ena boucou récompense à gagné. D’après hadice, le mois de Ramadhan so récompense et récompense de ça 6 roza-là dans so l’ensemble li représente récompense ene banané roza. Parceki d’après shariat nou gagne 10 récompenses pou ene action. Ene mois Ramadhan so récompense li représente 10 mois so roza et 6 roza li représente 60 roza ki égal à 2 mois roza.

Sadaqatul-fitr

Question.

ki veut dire sadaqat-ul-fitr et lor ki sanla li obligatoire pou tirer?

Reponse.

Sadaqat-ul-fitr c’est ene Sadaqah (la charité) de ene certaine quantité nourriture ou so l’équivalence, ki vine obligatoire avec la rentrée de Soubh Swadiq le jour de Eid-ul-fitr.

Ça sadaqah-là li obligatoire lors ene musulman ki majeur et ki ena le moyen. Ene dimoune ki ena le moyen dans ça contexte-là veut dire ene dimoune ki ena dans so possession 200 dirham ou bien à peu près 620 gramme l’argent ou so l’équivalence en la monnaie ou bien n’importe ki kitchose ki plis ki so banne besoins et nécessités de base. Quand li ena ça valeur-là ou plis ki ça, lerla li compte ene dimoune ki ena le moyen. Ene dimoune bizin ena la caze pou li resté, li bizin ena ene deux rechange linge pou li metté couma li bizin banne z’effets et meubles dans la caze pou li servi. Ça banne kitchose-là c’est so banne nécessités. Coumsa même zoutil ene dimoune ki ena métier li compte dans so nécessité. Apart ça ene moyen transport aussi li ene nécessité pou ene dimoune. 

Quand apart ça banne kitchose-là ene dimoune gagne dans so possession la valeur ki fine mentionné la haut, alors li bizin tire so Sadaqah et Sadaqah de la part so banne zenfants ki encore mineur.

Ene dimoune endetté:

Ene dimoune ki ena dette, en principe pena pou tire Sadaqah. Quand li pena pou tire Sadaqah ça veut dire li pena pou tire Sadaqah de la part so banne zenfants mineur aussi. A moins si tire so dette, li continué ena dans so possession ça valeur-là ou bien plis ki ça, alors dans ça cas-là li bizin tire Sadaqah. Li pli bon ki ene dimoune tire so Sadaqah avant alle faire namaz Eid. Si li fine tire so Sadaqah dans commencement Ramadhaan, ça aussi li compté. Si jamais li pas fine réussi tire li le jour de Eid, alors ça li reste ene dette lors so la tête. De toute façon li bizin tire li après.

Mange tamme avant namaaz Eid

Question.

Est-ce ki li sunnah pou mange tamme avant alle namaz Eid?

Reponse.

Nabi (s.a.w) ti ena l'habitude mange quelque tamme avant li sorti pou alle faire namaz Eid jour Eid-ul-Fitr. Ça li ti toujours ene quantité non paire. D'après banne 'Oulama, Rassouloulah (s.a.w) ti pé faire ça pou faire tout le contraire de ceki li fine faire toute longue mois.

Donc li sounnat mange ene quantité non paire de tamme avant alle faire namaz Eid-ul-Fitr. Si kikene pena tamme, li capave mange quelque chose doux pou observe ça sounnat-là.

l'Assurance la vie

Question:

Eski ene dimoune gagne droit assure so la vie?

Réponse:

Normalement quand ene dimoune li assure so la vie, li supposé contribué ene certaine somme d'argent à la société cotte li fine assure so la vie. Et après ça, chaque mois ou chaque l'année li bizin continué contribué encore. Normalement d'après ça contrat-là li capave gagne plis ki ceki li fine contribué. D'après Shariah ça en plis-là li qualifié de l'intérêt. Couma nou conné l'intérêt li haraam. Alors ça policy de l'assurance de la vie aussi li haraam parceki li implique l'intérêt.

Bouge l'index dans tashah-hud

Question.

Est -ce ki bizin bouge bouge l'index quand faire tashah-hud?

Reponse.

Quand faire Tashah-hud ene personne neque ena pou leve so l'index quand li lire (Ash-hadu Allaa ilaaha) sa meme ki appelle bouger d'apres hadeeth.

"عن عبد الله بن الزبير ان النبى صلى الله عليه وسلم كان يشير باصبعه اذا دعا ولا يحركها"

(النسائى/ ابو داؤد)

Traduction:

(Hazrat) Abdullah Bin Az-Zubeir (r.a) rapporté ki Nabi (s.a.w) ti pé faire signe avec so le doigt quand li ti pé faire doah et li pas ti pé bouge li." (Nisaa-ï /Abou Dawoud)

Position hadice:

Imam Nisaa-ï pas fine faire aukene remarque lors ça hadice-là. Donc ça signifié ki li ene hadice correcte d'après li.

Explication:

Lève le doigt signifié lève l'index et doah signifié lire tashahhud. Ça hadice-là montré ki Rassouloullah (s.a.w) pas ti ena l'habitude bouge so l'index quand li ti pé faire signe avec ça au moment ki li ti pé lire tashahhud. Mais nou ena ene l'autre hadice ki trouve dans Nisaa-ï même selon lequel Hazrat Wa-il Bin Hujr (r.a) dire ki li fine trouve Nabi (s.a.w) pé bouge so le doigt. Li paraite ki ça lève le doigt-là même ki Hazrat Wa-il Bin Hujr (r.a) fine interprète ça par bougé. Couma ça aussi li possible ki li fine bouge li necque ene deux coute. Li pas fine bouge li continuellement couma Hazrat Abdullah Bin Az-Zubeir  fine faire ressortir.

Ceki Hazrat Abdullah Bin Az-Zubeir (r.a) fine rapporté, li pli mérite être considéré parceki li pé relate nou l'habitude ki Nabi (s.a.w) ti ena et ceki li ti pé faire tout le temps. Quant à ceki Hazrat Wa-il Bin Hujr (r.a) pé raconté, c'est necque ceki li fine trouve Rassouloullah (s.a.w) faire à ene certaine l'occasion. Normalement ene kitchose ki Rassouloullah (s.a.w) fine pratiqué tout le temps, pou ena priorité et préférence lors ene pratique ki li fine capave faire li ene deux coute pou certaine raison. Dans commentaire hadice Hazrat Wa-il Bin Hujr (r.a), Allaamah Bin Hazm (r.a) dire dans so Al-Mouhalla:-

"ففيه تحريك السبابة عند الرفع وبه اخذ مالك والجمهور على ان المراد بالتحريك ههنا هو الرفع لا غير"

" Ena mention de bouge l'index dans ça hadice-là au moment lève (le doigt). Et c'est ça même ki Imam Malik fine adopté. Mais d'après جمهور (la majorité), ici bougé li signifié pas l'autre ki levé."
Mullah Ali Al-Qari dire dans so Al-Mirqaat:

"ويمكن ان يكون معنى "يحركها" يرفعها اذ لا يمكن رفعها بدون تحريكها"

"Li possible ki يحركها (li ti pé bouge li) signifié يرفعها (li ti pé lève li) parceki li pas possible lève li sans bouge li."

Donc d'après la majorité banne 'Oulama, c'est le mouvement lève le doigt ki fine interprété par bougé dans certaine hadice. Alors le pratique pli correct et pli proche avec sounnah, c'est faire signe avec l'index sans bouge-bouge li.

Etiquettes de Eid-ul-Fitr

Question.

Ki banne etiquettes bizin observé le jour de Eid-ul-Fitr ?

Reponse.

Etiquettes de Eid-ul-Fitr

Le jour de Eid li pas seulement ene l’occasion pou faire fête. Mais li aussi ene jour cote-la ene musulmans gagne beaucoup récompense et li gagne proximité d’Allah si li passe sa jour la d’après étiquette et l’enseignement de Shariah.

Etiquettes et Sunnates de Eid-ul-Fitr :

1. Lever tôt le matin.

2. Prend ene bain.

3. Servi miswaak.

4. Embellir sois même dans ene meilleur façon ki conforme avec Shariat.

5. Mette plus bon linge ki d’après capacité ( ki conforme avec Shariah).

6. Mette Itr (parfume sans l’alcool).

7. Mange ene chose doux (ex. tamme) avant alle faire namaaz Eid.

8. Alle vers Eid Gaah bonheur.

9. Donne Sadaqatul-Fitr avant alle dans Eid Gaah.

10. Choisir ene l’autre chemin quand retourné depuis Eid Gaah.

11. Marcher alle vers Eid Gaah. (Si li loin capave servi transport).

12. Faire sa Takbeer la a voix basse quand pe alle vers Eid Gaah.

الله أكبر الله أكبر , لا إله إلا الله و الله أكبر , الله أكبر ولله الحمد

Banne signes Qiyaamat

Question.

Mentionne quelques bannes signes ki pou manifesté avant Qiyaamat ?

Reponse.

1. L'ignorance

Petit à petit connaissance de Deen pou enlevé ziska ki pou ena l'ignorance de tout coté. C'est-à-dire bien tigite dimoune pou ena connaissance de Deen. La plupart dimoune pou banne ignorants dans Deen. Dimoune pou faire banne ignorants même vine zotte chef ki pou induire zotte dans l'erreur avec zotte fausse l'éclaircissement dans Deen.

2. Zina

Zina pou vine ene kitchose normal ki dimoune pas pou trouve li ene kitchose de grave. Dimoune pou faire zina lors la rue en public divant tout dimoune couma zanimau.

N.B: Sans doute la vie fréquenté c'est zina même ça ki pé déroulé dans la caze banne musulmans avec bénédiction et l'autorisation mama-papa et ça aussi avec zotte propre zenfants. Coumsa même ceki pé passé dans coin la rue, dans bus, lors la gare, dans jardin et lors la plage, nou tous conné. Apart ça ena banne scènes de zina ki passé à travers l'écran télévision dans nou la caze sans la moindre hésitation.

3. La boisson alcoolique

La boisson pou prend l'ampleur. Zordi bien rare nou trouve ene fête ou ene cérémonie sans l'alcool.

4. Taux élevé banne madames

Pou ena madames plis ki zomme à tel point ki pou arrive ene l'époque cotte ene zomme pou bizin prend charge 50 madames. C'est-à-dire là-dans pou ena so mama, so banne tifille, so famille proches etc. 

5. La musique

La musique pou faire ravage. Zordi jour pena la caze, pena l'auto et pena mariage sans la musique à tel point ki banne soi-disant "érudits" pé cause l'autorisation "soft music". Mais la musique c'est la musique et li haraam. Faudré pas tire prétexte pou légalise haraam.

6. Mensonge

Le mensonge pou prévaloir partout à tout niveau. So dernier ti dimoune ziska so chef d'état, tous pou commette ça péché indigne-là.

7. L'ingratitude envers parents

Dimoune pou prend z'intérêt so madame et li pou écoute so madame. Et de l'autre li pou désobéir so mama. Coumsa même li pou garde relation étroite avec banne étrangers et li pou éloigné avec so papa. C'est-à-dire li pou montré l'amitié pou lezot et dégoût pou so papa. 

8. Dilapide fond public

Banne dirigeants et chef d'état pou servi fond public couma zotte propriété privée.

9. Malhonnêteté

L'honnêteté pou disparaite et li pou ene kitchose bien rare. Ene l'époque pou arrivé cote dimoune pou bizin dire ki dans tel l'endroit ou tel l'endroit ena ene dimoune honnête acoze ki dimoune honnête pou tellement rare dans ça l'époque-là.

10. Dirigeant incompétent

Banne ki pas compétent pou vine à la tête de banne instances importantes et banne postes clé.

11. Manque de pudeur

Dimoune pou vine sans pudeur et pou nepli ena la honte.

N.B: C'est manque de pudeur même ki faire banne madames marche dans public sans pardah ou bien avec banne l'habillements indécent. Coumsa même c'est manque de pudeur même ki faire banne grand-grand dimoune marche avec short lors la rue. Ena ki pas hésité assize avec ene short divant so banne grand-grand tifilles. C'est ça même bassesse de mentalité ki faire ene dimoune assize en famille divant l'ecran television pou guette ceki ene dimoune ki ena hayaa (pudeur) pas capave guetté. Selon ene hadice, quand ou pena pudeur et hayaa, ou capave faire n'importe quoi. C'est acoze ça même bizin attane tout qualité bêtise de la part banne musulmans.

Khula

Question.

Ki veut dire Khula et couma faire li ?

Reponse:

Khula signifié donne talaaq conte paiement ene somme d'argent ou ene l'autre kitchose ki ena valeur commerciale. Ça li capave proposé par madame-là couma proposition-là capave vine de la part missié-là.

Mais de toute façon ça li conclure par consentement mutuel de deux coté. C'est-à-dire madame-là pas capave gagne so khula sans consentement so missié ni kit comité ou organisation capave donne ene madame khula sans l'autorisation et consentement so missié.

Ena certaine organisation ki pé faire banne dimoune vive dans haraam par décrète khula sans l'autorisation missié-là. Ça li complètement haraam. Banne madame ki fine gagne khula dans ça façon-là bizin conné ki zotte encore dans nikah zotte missié.

Si zotte marié avec ene l'autre, ça signifié ki zotte ena deux missié à la fois ki li complètement haraam. Coumsa même ene missié ki marié avec ene madame pareil, bizin conné ki li fine marié avec kikene ki déjà dans nikah ene l'autre. 

Ça banne dimoune-là zotte pou continué reste dans haraam pendant toute longue zotte la vie.

Muqtadi faire salaam avec Imaam.

Question:

Si ene personne fine manque quelque rakaat en jamaat et vers la fin quand Imam pe faire salaam li aussi par oubli li faire salaam avec imâm, est-ce ki li bizin contine so namaaz ou bien recommencé ?

Reponse:

So namaz encore en ordre, li bizin débouté dans sa l’état la même pou termine so namaz .

Question :

Est ce ki avant li termine so namaaz li bizin faire sajdat-us-sahw ou bien non ?

Reponse :

Si li fine faire salaam avant ou bien ensemble avec imaam a ce moment la li pou être considéré comme ene muqtadi (celui ki suivre imaam). Et ene muqtadi so so erreur pas nécessite sajdat-us-sahw, donc dans sa cas la li perna pou faire sajdat-us-sahw avant termine so namaz.

Si li fine faire salaam après avoir ki imaam fine termine so salaam dans sa cas la li pou waajib lor li pou termine so namaaz par sajdat-us-sahw parce ki ici li pas ene muqtadi.

Oublier Tashah-hud dans quatrieme rakaat.

Question.

Si ene personne pe faire 4 raka’at namaaz zuhr et après avoir termine tous les deux sajdah dans quatrième raka’at au lieu li asizer pou tashah-hud par erreur li debouter pou ene cinquième rakaat , après sa li fine penser ki li fine faire erreur, alors ki li supposer faire pou rectifier so namaz ?

Reponse :

Si avant li alle dans sajdah dans cinquième rakaat li maginer ki li pas fine assize dans Qa’adah (Tashah-hud) dans quatrieme rakaat alors li bizin retourner dans qa ‘dah et termine so quatre rakaat avec sajdatus-sahw.

Si après sajdah dans cinquieme rakaat ki li fine maginer ki li fine oublier qa’dah dans quatrieme rakaat , a ce moment la so namaz zuhr pou annuler et li pou vine nafl. Dans sa cas la li ajoute ene sixième rakaat avec sa cinquieme la et li termine so namaz. Ensuite li bizin refaire so namaz zuhr.

conseil !!!!!!!

Ene dimoune so l'honneur trouve dans so l'honnêteté,

Et so beauté dans so simplicité.

So la force dans so sincérité,

Issaa (Alaihis-Salaam)

Question.

ki Quraan et Hadeeth dire concernant L'avènement de Hazrat I'saa (a.s) ?

Reponse.

L'avènement de Hazrat Issa (a.s) li ene de banne points et croyances important ki prouvé par Qour'aan-e-Kareem, banne hadice Moutawwatir et le consensus de l'Oummah dans ene façon ki pas laisse aukene doute. Donc li faraz pou croire là-dans.

Hazrat Issa  pou dessane depi lors le ciel, escorté par deux farishta cote ça minarette ki trouve dans l'Est de Jami Masjid de Damasque dans ene l'heure ki Hazrat Mahdi pé alle diboute dans namaz Fajar. Après avoir termine namaz, Hazrat Issa  accompagné de Hazrat Mahdi  pou attaque Dajjaal et so l'armée. Et finalement Hazrat Issa  pou réussi gagne Dajjaal et pou touye li dans ene l'endroit ki appelle "Baab Ludd".

Dajjaal

Question. 1

Dajjaal ki veut dire et couma li pou ete?

Reponse. 1

Dajjaal li dérivé de Dajl ki signifié fausseté, mensonge, déception etc. Dans ça sens-là, ça nom-là li capave applique lors chaque dimoune ki li ene grand menteur ou ene grand malhonnête.

Mais le Dajjaal ki so l'avènement fine annoncé dans banne hadices, c'est ene personne spécifique de la communauté juive ki pou appelle "Maseeh". Li pou ena ene seul lizié et dans so lotte lizié pou ena ene grosseur couma raisin ki sorti en dehors.

Pou ena trois alphabètes ( ك ف ر ) ki pou écrire entre so deux lizié. Li pou tellement évident ki tout dimoune capave lire li. So cheveux pou extra bouclé et maille-maillé.

Li pou voyage lors ene gros bourrique. D'abord li pou paraite dans ene l'endroit entre Shaam et Iraq et li pou déclare li prophète. Après ça li pou vine dans ene l'endroit ki appelle Isfahaan cote li pou gagne 70,000 juifs pou suive li.

Après ça pou ena ene l'étape cote li pou déclare li Allah. Li pou montré ene quantité miracles pou convaincre banne dimoune. Finalement li pou touye ene dimoune et li pou faire li revive. Ensuite li pou essaye pou touye li ene deuxième fois mais li pas pou capave faire li. C'est dans ça façon-là Allah Ta'ala pou déshonore li par ranne li incapable.

Question. 2

Quand Dajjaal pou paraite?

Reponse. 2

Dajjaal pou paraite après Imam Mahdi (R). C'est-à-dire quand Imam Mahdi (R) pou fini terminé avec jihaad contre banne chrétiens et la conquête de Constantine, li pou vine établi dans Damasque cote li pou occupe banne problèmes musulmans. Lerla Dajjaal pou paraite. En passant par Yémen, accompagné de so l'armée, li pou essaye rente dans Makkah mais li pas pou réussi parceki li pou trouve banne farishta autour Makkah. Li pou tente pou rente dans Madinah aussi. Ici aussi banne farishta pou empêche li.

Imam Mahdi

Question.

Ki sanla Imam Mahdi et ki hadeeth dire concernant so l'apparition?

Reponse.

Littéralement Mahdi signifié ene kikene ki li lors chemin droite. Dans ça sens-là, ça capave applique pou chaque bon musulman. Mais le Mahdi ki fine être annoncé par Nabi (s.a.w) dans bannes hadices, c'est ene personnage très particulier ki pou faire so l'apparition dans Makkah.

L'apparition de ça personnage-là, c'est le premier signe parmi bannes grand signes de Qiyaamat.

D'après hadice li pou appelle Muhammad, so papa pou appelle Abdullah et so mama pou appelle Aminah. Li pou vine depi dans descendant de Hazrat Fatimah (R). Li pou ene habitant de Madinah. De par so l'apparence et so conduite, li pou bien ressemblé Nabi (s.a.w).

Banne Aulia-Allah (personnages pieux) et banne Abdaal (ene titre pou ene certaine catégorie de banne personnages pieux) de Shaam et de Iraq pou faire bai-ah (prend l'engagement) dans so la main. C'est-à-dire zotte pou prend l'engagement pou accepté li comme zotte amir et zotte chef. Li pou déterre trésor ki fine enterré dans Ka'bah et li pou partage ça dans banne musulmans. Li pou dirige entier le monde. Pendant so règne, li pou combatte l'injustice dans tous so forme pou finalement établir ene société rempli de paix, de l'harmonie et de la justice.

Dajjaal pou faire so l'apparition dans so l'époque même. Et c'est dans so l'époque même ki Hazrat Issa  pou dessane depi lors le ciel dans Damasque.

Imam Mahdi pou faire jihad contre banne chrétien et li pou conquérir Constantine. A noté ki croire dans l'avènement de Hazrat Mahdi (R) li ene de banne croyances fondamentales de Ahl-us-Sunnah Wal Jama'ah parceki l'avènement de Hazrat Mahdi li soutenu et prouvé par banne hadice Moutawaatir et approuvé par le consensus de l'Oummah.

sajdatut Tilaawah dans Taraweeh

Question.

Si Imam fine oublier faire sajdatut-tilaawah dans taraweeh est-ce ki li bizin repette sa deux rakaat la?

Reponse.

Non, li neque ena pou relire sa Ayat de Sajdah la dans ene l'autre rakaat de taraawih ensuite faire sajdah.

Calcule pou fidyah et fitrah

Question No 1

Comment faire calcule pou fidyah et fitrah ?

Pou sa l'annee la (2009) combien bizin donner?

Reponse.

Fitrah et Fidyah zotte calcule pou faire a travers Saa’ (ene mesure) ki ti pe servi auparavant. Et d’après ene calcule plus approprié ene Saa’ so mesure li équivaut 3,750 grammes (7⅟₂ lbs), donc la moitié Saa’ pou faire 1,875 grammes (3 ₃/₄ lbs).

Si ene dimoune pe donne fidyah ou fitrah en forme tamme ou bien raisin alors li bizin donne ene Saa’ (7,500 grammes)

Si li pe donne en forme la farine du blé alors li bizin donne ⅟₂ Saa’ (1,875 grammes).

Si ene dimoune pe envie donne dans ene l’autre forme a ce moment la li bizin calcule valeur de sa mesure ki fine mentionner la haut la.

Par ex. meilleur qualité du blé lor marché so prix li varié entre Rs 15.00 à Rs20.00, à ce moment la li pou plus approprié pou prend Rs 20.00 en considération couma sa pou vine en faveur de bannes pauvres.

Donc pou  gagne so calcule multiplier ⅟₂ Saa’ (1,875 grammes) par Rs 20.00.

1,875 gms ou bien (3 ₃/₄ lbs) x Rs 20.00 = Rs 75.00

Pou sa l’année la (2009) Fidyah et Fitrah zotte valeur pou Rs 75.00 a Maurice.

calcule de nisaab zakaat

Question.

( 1 ) Couma calcule nisaab zakaat lor casse ki ene personne posseder?

( 2 ) Sa l'annee la nisaab zakaat combien pou ete?

Reponse. 1

Nisaab zakaat lor casse pou être calculé à travers l'argent (200 dirham). Et 200 dirham d'après ene calcule li tombe environs 612 grammes l'argent et d'après ene l'autre calcule li tombe a peu prés 630 grammes l'argent. 

Comma nous conner ki dans Ibaadat nous bizin prend beaucoup précaution, donc ici plus précaution pou être considérer quand nous pou prend en consideration sa premier calcule la (c.a.d) 612 grammes.

En ce moment a Maurice ene gramme l'argent pe coute environs Rs 25/- à Rs 30/- 

Si nous multiplier 612 grammes l’argent par Rs 25 /-
(1) 612 x 25 = 15,300.00

Si nous multiplier 612 grammes l’argent par Rs 30 /-
(2) 612 x 30 = 18,360.00

Le fait ki prix l’argent la li varié alors li pou plus approprié pou évaluer li lor ene prix moyen, donc Rs 27/- pou été ene prix moyen.

Si nous multiplier 612 grammes l’argent par Rs 27 /-
(3) 612 x 27 = 16,524.00

Reponse No 2

D’apres sa explication la nisaab zakaat pou sa l’annee la pou tombe environs R 16,500.00.

Donc si ene personne possède Rs 16,500.00 ou bien marchandise, ou bien bannes effets personnelles dans sa valeur la, alors li fine vine ene celui ki possède nisaab. Et li pas pou ena droit prend zakaat, fitra et fidya etc.

Mine Appollo

Question No 1

Est-ce ki mine appollo Haraam ?

Reponse No 1

Avant ki mo ranne sa reponse la, li bon ki mo atire ou l'attention ki normalement tous banne kitchose ki shariat pas fine qualifier haraam zotte pou etre considere comme halaal jusqu'a preuve du contraire.

Cest-a-dire faudrait ki nous fine gagne ene preuve concret ki li haraam lerla ki nous capave dire ki li haraam.

Dans la meme facon si ene personne ena doute concernant ene produit li pas pou gagne droit dire ki li haraam. Au maximum saki li pou capave faire c'est li meme li reste loin depuis consommation de sa produit la. Mais li pas gagne droit empeche les autres dimoune pou consomme li a cause ki li fine gagne doute.

Question No 2

Dans ene pamphlet fine ecrire ki mine appollo pas certifier halaal, et quand kikene fine demande L'auteur de sa pamphlet alors li fine reponne ki li pas certifier halaal a cause perna transparence. ki veut dire sa?

Reponse No 2

Ceki pe paraitre c'est dans l'auteur la so declaration ki pena transparence. parceki li pas fine meme donne ene bon reponse pou dire ki faire mine appollo pas certifeir halaal. tanque ki li pas montrer ene preuve concret et fort nous pas pou capave accepter so declaration. si li ena ene doute li ena tout droit pou pas consomme li, mais li pas pou gagne droit empeche les autres.

Zakaat

Question No 1.

Depuis bien longtemps mo ti conner ki ene personne pas gagne droit donne zakaat a so banne ascendants (c.a.d. papa, maman, dada, dadi, nana, nani etc) aussi so bannes descendants ( c.a.d. zenfant, ti zenfant etc) et aussi ene madame pas gagne droit donne so missier et ene missier pas gagne droit donne so madamme. mais fine gagne quelque jour de cela mo fine lire ene pamphlet ki fine ecrire par M.A.M et sa fine mette moi dans confusion. La dans li fine mentioner ki "

La c'est important de savoir qu'on ne peut pas s'acquitter de la zakaat a nos ascendants directs ni a nos descendants et ceux qui habitent dans la meme maison que nous."

sa ki mo fine comprend ici c'est ene dimoune pas pou gagne droit donne meme so frere et so soeur zakaat !!! Est-ce ki li correct sa?

Reponse No 1

Tres certainement ou ena raison saki ou fine mentionner, sa pe crer ene grand confusion parmi la masse. parce ki plusieur dimoune fine atire mo l'attention lor la. En realite saki ou fine dire la ki correct. c.a.d li ti suposer ecrire ki ene parsonne pas gagne droit donne zakaat a so bannes ascendants, descendants et aussi ene madame pas gagne droit donne so missier pareil couma ene missier pas gagne droit donne so madame.

Li bon ki ou atire sa organisation la zotte l'attention afin ki zotte capave retracter et aussi tire ene communiquer pou rectifier sa erreur la.

Question No 2.

Ene l'autre kitchose ki mo fine trouve drole dans sa pamphlet la peut-etre mo dans erreur mais toujours li bon ki mo dimander. ene place li fine mentioner ki

" Au cas si les bijoux en or ne depasse pas 86.47 grammes et la personne ne possede pas de nisaab de liquide d'argent en main ou en compte de banque, alors elle ne serai pas taxe par la zakaat"

Question ki mo pou poser c'est "Quand ene personne perna nasaab l'or, ni nisaab en forme l'argent liquide est-ce ki li pas bizin ajoute tous les deux ensemble pou guetter si li arrive valeur nisaab l'argent?

Reponse No 2.

Ou ena parfaitement raison, normalement quand ene personne ena ene ti peu l'or ki pas quantite nisaab et aussi li ena ene ti peu casse ki pas quantite nisaab alors li bizin ajoute tous les deux ( l'or et casse) ensemble pou guetter si li fine arriver gagne nisaab l'argent . si fine gagne nisaab alors pou bizin tire zakaat sinon pena zakaat. Mais si apart sa l'or ( ki pas quantite nisaab la) li pena narien a ce moment la pas pou ena zakaat lor sa l'or la.

Duaa l'heure sehri

Question :

Qui ou pensé lors ça douah ki lire l’heure sehri, c'est-à-dire: “Allahoumma Inni Aswoumou Radan Laka Faghfirli Maa Qaddamtou Wa Maa Akh-Khartou». Eski ena ça dans hadice?

 
Réponse :

Pou dire ki ça douah-là ena dans hadice ou pena li dans hadice, li dimane ene connaissance assez profond et vaste ki nou pas prétende ena li dans nou. Et l’autre coté nou pas trouve personne pou prend lors li pou faire ene déclaration aussi audacieuse. Acoze ça nou pena le courage prend le risque dire ki ça douah-là pas existé dans hadice. Le moins ki nou capave dire très aisément ki li pas dans nou connaissance. Li bon nou faire ressortir à ce stade ki nou reconnaite ki nou l’ignorance de quelque chose dans Deen li pas ene preuve ki ça kitchose-là pas existé. Mais le sens de ça douah là li tout a fait correcte ki bénéficié l’autorisation du sens général de ene hadice selon lequel Rassouloullah (s.a.w) fine dire:

“Ena trois catégories de personne ki zotte douah pas rejeté: Le rozedaar tanque ki li pas faire Iftaar …” (Tirmizi et Ibn Majah)

En état de roza, ene rozedaar capave dimane tout sorte de douah ki bénéfique pou li dans ça le monde là et dans Aakhirat. Ça hadice-là li recommande et approuve banne douah pareil. Ça douah-là aussi li ene douah couma tout douah. Donc pena narien mauvais dans faire ça douah-là. Li tout à fait correcte. Mais pas gagne droit attribué ça à Rassouloullah (s.a.w) sans être sure ki Rassouloullah (s.a.w) fine faire li avec ça formule-là.

Question :

Ena dimoune dire ki ça douah-là pas correcte parceki ena ene mot “Radan” la dans ki signifié “demain”. Ki manière capave dire “Radan” (demain) quand tandis ki pé garde roza le même jour?

Réponse :

“Allahoumma Aswoumou Radan Laka …” (O Allah, mo pé garde roza demain pou Toi …). C’est ene douah ki normalement banne dimoune ena l’habitude lire au moment de sehri. Ou ena raison ki ena ene mot “Radan” ki signifié demain. Li paraite pas correcte parceki demain veut dire ça jour ki pé vini après ça jour ki ou été la. Mais c’est ene l’expression tout à fait normal d’après l’usage général. Dans ene hadice de Abou Dawoud rapporté par Hazrat ‘Abdoullah Bin Abbaas (r.a), Rassouloullah (s.a.w) ti ordonne Hazrat Bilal (r.a) pou alle annoncé ki garde roza ‘demain’. Rassouloullah (s.a.w) ti donne ça l’ordre-là après Maghrib quand Islamiquement parlant nou jour changé. Là-dans nou trouvé ki fine servi le mot “Radan”. Et pourtant quand arrive le matin, jour pas changé. Li encore le même jour. Ça montré ki le mot ‘Radan’ capave servi li le soir pou signifié le matin ou la journée ki commencé apartir Soubh Swadiq cote l’heure sehri terminé.

D’ailleurs quand faire annonce après Zohar ou après Assar dans Masjid pou ene causerie ki pou ena après Esha, souvent nou tanne dire “Pour ena ene causerie zordi après Esha dans Masjid”. Pourtant Islamiquement parlant li pas jordi. Apres Maghrib c’est demain parceki nou jour changé apartir le coucher du soleil. Ça montré ki dans l’usage général ena ça souplesse ki faire demain vine zordi couma li capave faire zordi vine demain aussi. Coumsa même ici fine dire “Radan” pou signifié l’heure ki sehri terminé quand la journée commencé. Li tout à fait normal. Donc ça these zordi-demain là pas capave servi ki ça douah-là pas correct. Apart ça si ena l’autre preuve, capave considere li. Ziska preuve du contraire li reste valable. Mais nou fine faire ressortir ki faudré pas attribué ça douah-la à Nabi (s.a.w).

Pli bon place pou madame faire namaz

Question.

Cote sa li plus meilleur pou ene madame faire namaz, dans so la caze ou bien masjid?

Reponse.

L’endroit ki ti pli apprécié à l’époque Nabi (s.aw) d'après Rassouloullah (s.aw) pou banne madames faire namaz, c’était la caze. C'est-à-dire ene madame ena pli boucou récompense quand li faire so namaz dans so la caze parceki Rassouloullah (s.aw) fine content ça même pou banne madames. Ceki Rassouloullah (s.aw) fine content pou banne madames, li incomparablement pli bon ki ceki lezot pé suggère banne madames.

Hazrat Umme Salamah (r.a) rapporté ki Rassouloullah (s.aw) fine dire:

“Meilleure l’endroit pou faire namaz pou banne madames, li trouve dans l’intérieur de zotte la caze”.

Hazrat Abdullah Bin Mas’oud (r.a) rapporté ki Nabi (s.aw) fine dire :

“Meilleur namaz auprès d’Allah ki ene madame faire, c’est ça namaz ki li faire dans ene l’endroit pli noir dans so la caze” (Sahih Bin Khuzaimah)

Quand nou analyse ça hadice-là, ça donne nou ene l’idée ziska ki point, Rassouloullah (s.aw) ti ena le désir pou trouve banne madames faire namaz chez zotte dans zotte la caze dans ene coin retiré, renfermé et pli cachiette ki capave.

Namaz dans Masjid Nabawi

Couma nou conné, ena boucou récompense dans faire namaz dans masjid Nabawi. Dans ene hadice rapporté par Hazrat Abou Hourairah (r.a), Rassouloullah (s.aw) fine dire :
"Ene namaz dans mo masjid (masjid Nabawi) li meilleur ki mille namaz dans ene l’autre (masjid) apart masjid-ul-Haraam." (Sahih Boukhari)

C'est-à-dire ene namaz ki ene dimoune faire dans masjid Nabawi, li ena ene récompense ki dépasse mille namaz ki li faire ailleurs excepté masjid-ul-Haraam. Malgré tout ça sawaab et récompense énorme ki ene madame ti capave récolté dans faire namaz dans masjid Nabawi, Rassouloullah (s.aw) fine préfère ki banne madames faire zotte namaz dans zotte la caze. 

Selon ene hadice, Rassouloullah (s.aw) fine faire ene Sahabi nommé Hazrat Umme Humaid (s.aw) comprend ki so namaz dans so la caze li boucou pli bon ki li faire namaz dans masjid Nabawi.
(Sahih Bin Khuzaimah)

Faudré pas pensé ki Rassouloullah (s.aw) fine prive banne madames de ene grand sawaab. Parceki ceki Rassouloullah (s.aw) fine choisir pou banne madames li boucou pli bon pou banne madames. Si ene madame ena le plaisir habille d’après choix so missié, alors ki quantité la joie li bizin senti dans faire namaz dans ene l’endroit ki li d’après le choix de Rassouloullah (s.aw)?

Pli boucou sawaab

Ça signifié ene namaz ki ene madame faire dans so la caze, ça rapporte li pli boucou sawaab et récompense ki li faire li dans masjid Nabawi. Ene grand Mouhaddice (savant de hadice) nommé Mouhammad Bin Ishaaq Bin khuzaimah (223H - 311H) dire dans so Sahih Bin Khuzaimah :
"La déclaration de Nabi (s.aw) ki ene namaz dans mo masjid (masjid Nabawi) li pli bon ki mille namaz dans ene l’autre masjid, par ça li fine signifié banne zommes, pas banne madames."
Ça explique l’attitude sévère et dur ki le célèbre Sahabi Hazrat Abdullah Bin Mas’oud (r.a) ti pé adopté à l’égard banne madames ki ti pé vine masjid. Selon ene récit authentique rapporté dans Tabraani, Mouswannaf Abdurrazzaaq et Mouswannaf Ibn Abou Shaibah, Hazrat Abdullah Bin Mas’oud (r.a) ti pé tire banne madames depi dans masjid et ti pé dire zotte :
"Sorti, alle zotte la caze. Ça li pli bon pou zotte."

Pli près avec bénédiction Allah Ta’ala

Rassouloullah (s.aw) fine dire :
"Madame li ene aurah. Quand li sorti en dehors (so la caze), Shaitaan suive li. Pli près ki ene madame capave été avec bénédiction de so Rabb, c’est au moment ki li à l’intérieur de so la caze." (Sahih Bin Khuzaimah)

Aurah c’est ene kitchose ki ene dimoune gagne honté pou expose li. Ene kitchose pareille, ene dimoune ena tendance pou cachiette li. Donc selon ça hadice-là, Rassouloullah (s.aw) fine qualifié madame de aurah ki signifié ki madame li ene kitchose ki bizin gagne honté pou expose li dans public. Li ene kitchose ki bizin cachiette tanque possible. Et ça li réalisé quand li reste dans so la caze et li pas sorte sorti pou narien. Et quand li reste dans so la caze sans ki li expose li dans public ou bien sans vine divant banne étrangers, c’est là ki li vine pli près avec bénédiction de so Rabb. 

Pli bon namaz

Donc ça namaz ki li faire dans ene l’endroit ki li pli près avec bénédiction de so Rabb aussi pou ene pli bon namaz. C'est-à-dire ça namaz ki ene madame faire dans ene l’endroit pli retiré et pli cachiette dans so la caze, c’est ene pli bon namaz. Dans ene hadice Rassouloullah (s.aw) fine dire :
"Namaz pli appréciable au près d’Allah Ta’ala ki ene madame faire, c’est ene namaz ki li faire dans place pli noir dans so la caze." (Sahih Bin Khuzaimah)