Façon pli approprié pou faire doah

Question.

Dans ki façon li pli approprié pou faire doah ?

Reponse.

Avant nou capave joine ene grand personnalité dans dounia, nou bizin parfois passe par ene filoir de officiers et de secrétaires. Zotte faire ça pou zotte propre sécurité et pou évite banne nuisance. Et dimoune donne zotte raison pou ceki zotte faire.

Insaan li faible et li vulnérable. Acoze ça li bizin faire tout ça-là. Et parfois li capave pas donne ou l’accès aussi si li trouvé ki ou ene nuisance pou li.

Mais Allah Ta’ala pena ça banne l’empêchement-là. Allah Ta’ala ena capacité lors tout kitchose et personne pena aukene capacité lors Allah Ta’ala. Acoze ça pena aukene rendez-vous ou bien secrétaire pou joine avant vine cote Allah Ta’ala. Ene dimoune capave rente en contact avec Allah quand li content et cote li content. Mais ena ene façon pou communiqué avec Allah Ta’ala. D’après ene hadice, Nabi (s.a.w) ti recommane ene Sahabi pou d’abord faire éloge Allah Ta’ala et ensuite avoye Daroud Shareef avant dimandé avec Allah Ta’ala. Donc ça c’est la meilleur façon pou faire doah. Coumsa même Nabi (s.a.w) fine montré nou banne moments propice pou faire doah. D’après ene hadice Nabi (s.a.w) fine dire : "Banne moments ki doah pli accepté c’est dans au milieu la nuit et après banne namaz faraz." Donc nou bizin profité avec ça deux moments propice-là et surtout après banne namaz faraz. Faudré pas nou laisse passé ça banne moments-là. Ca banne moments-là zotte pli dans sire ki ene loterie. Dimoune pas fini acheté loterie par ene simple l’espoir ki li capave gagne ene premier lot. Mais pourtant ça li haraam. Et si dimoune pé néglige ça banne l’heure propice-là malgré so banne bienfaits immense, c’est par la faiblesse. Nou bizin corrige ça faiblesse-là.

Khutba en creole

Question.

Ena ene banne dimoune dire ki khutbah jumu'ah li ene causerie donc capave faire li dans n'importe ki langue, Est-ce ki sa conclusion la correck d'apres shariat ?

Reponse.

Khutbah jum’ah li pas simplement ene causerie. Sinon nou ti capave pose ene cassette lors mimbar ki ena joli joli causerie ki dimoune ti capave écouté et bénéficié avec ça et ça ti pou sufi pou le besoin de khutbah. Mais personne pas fine autorise ene pratique pareil. Ça li ene indication solide ki li pas necque ene causerie.

Disons li ena aspect de causerie-là aussi mais bizin guetté ki quantité valeur ça aspect-là eté. Parceki li ena ene l’autre aspect aussi ki nou appelle li aspect de ene zikr "symbolique". Ça aspect-là li pli fort et pli important ki aspect de causerie. Li pas logique pou maintenir ene aspect faible au detriment ene aspect fort.

Khutbah jum’ah li ene ibaadat ki bizin faire li couma Nabi  fine pratique li. Nabi  fine faire li en arabe. Apres li, banne Shaba-e-Kiraam, Tabeines et Taba-Tabeines, zotte tous fine faire li en arabe. Donc ça ibaadat-là bizin faire li en arabe pareil couma ça fine être pratiqué depi auparavant. Le fait ki depi auparavant ça fine toujours pratiqué en arabe, li ene preuve suffisant et satisfaisant pou dire ki bizin faire li en arabe. C’est banne ki oulé faire li dans ene l’autre langage ki bizin amène preuve. Couma nou conné ki pena aukene preuve depi dans Qour’aan ou bien dans hadice ki dire ki capave change so structure et faire li dans ene l’autre langage apart langue arabe. Donc autorise faire khutbah en créole li pas basé lors aukene preuve de shariah. Ene banne ti présente ene hadice pou prouvé ki li permette mais zotte fine conné ki zotte fine faire erreur dans presente ça hadice-là. Zotte fine conné ki hadice-là pas capave servi comme ene preuve. Donc c’est ene nouveauté de la part de banne ki fine tourne le dos avec recherche de banne grand ‘Oulama d’auparavant couma Imam Abou Hanifah (R), Imam Malik (R), Imam Shafei (R) et Imam Ahmad Bin Hambal (R).