Question:
Ki veut dire Wali?
Reponse:
D'après banne 'Oulama, ene wali veut dire:
"العالم بالله المواظب على طاعته المخلص فى عبادته"
"Ene kikene ki conne Allah Ta'ala, ki ponctuel dans so l'obéissance et ki sincère dans so ibaadat."
Conne Allah Ta'ala veut dire conne Allah Ta'ala par so banne attributs. Quand ene dimoune conne attributs Allah Ta'ala, li agir d'après ceki li conné. Si li pas agir d'après ça, veut dire ki li pencore conne ça attribut-là. Par exemple ene dimoune ki conné ki appelle difil courant, pas pou mette so la main là-dans. C'est ene dimoune ki pas sain d'esprit ou bien ene zenfant ki pas conne ki appelle difil courant même pou mette la main là-dans. Donc ene dimoune ki conné ki Allah Ta'ala pé guette li ceki li pé faire, pé tanne li ceki li pé dire et ki conné ceki li pé pensé, jamais li pou ena le courage faire kitchose ki Allah Ta'ala pas content. Donc quand nou dire ene wali li conne Allah Ta'ala, ça signifié ene personne ki conne banne attributs Allah Ta'ala et ki agir d'après ki ça banne attributs-là dimandé. Par exemple quand li conné ki Allah Ta'ala li شديد العقاب c'est-à-dire li bien sévère dans donne punition, alors li pou reste loin de banne péchés ki pou faire li mérite ça.
Dans ça hadice-là, pé faire conné ki l'ennemité avec ene wali li représente l'ennemité avec Allah Ta'ala parceki l'ennemi so l'ennemi li ene camarade et camarade so l'ennemi li ene l'ennemi. Ene wali li camarade Allah Ta'ala. Donc ene wali so l'ennemi li pou ene l'ennemi pou Allah Ta'ala.
Chaque dimoune ena tendance faire so l'ennemi pli grand du tort ki li capave. Pli grand du tort pou ene dimoune c'est ene du tort ki faire li souffert pou tout le temps. Perna aukene du tort ki faire ene dimoune souffert pou tout le temps. A moins si ene dimoune fine mort sans imaan, à ce moment-là so souffrance pou éternel. Donc quitte dounia sans imaan, c'est le pli grand du tort parceki ça li faire ene dimoune reste dans souffrance éternellement. Ici dans ça hadice-là, quand Allah Ta'ala dire ki li déclare la guerre, ça signifié ki li prend la personne pou so l'ennemi. Quand kikene déclare la guerre avec ou et prend ou pou so l'ennemi, ou bizin attane de tout. Coumsa même quand Allah Ta'ala déclare la guerre avec kikene, ça représente ene menace contre tout ceki li ena et surtout contre tout ceki précieux et valeureux. Kitchose pli précieux et pli valeureux ki ene dimoune ena, c'est so imaan. Donc dans ça sens-là, faire l'ennemi avec kit wali, li mette en danger kitchose pli précieux et pli valeureux ki li ena ki appelle imaan. Acoze ça d'après banne 'Oulama, li pas étonnant si ene dimoune perdi so imaan grâce à so rancune ki li ena pou kit wali. Si rancune avec ene wali li néfaste, c'est ene indication ki l'amitié avec ene wali li très bénéfique et profitable pou ene dimoune so Deen et so Imaan.
********
Rapprochement avec Allah Ta'ala li réalisé par faire Allah Ta'ala so ibaadat. Ena banne ibaadat ki obligé faire ki nou appelle zotte banne Faraa-iz couma ena ki pas obligatoire. C'est banne ibaadat supplémentaire ki appelle نوافل. Banne Faraa-iz li inclure banne pratiques ki obligé faire et aussi banne kitchose ki bizin pas faire.
Le moyen indispensable pou approché avec Allah Ta'ala li trouve dans accomplir ça banne faraa-iz-là. Sans accomplir banne faraa-iz, ene dimoune pas capave approché avec Allah Ta'ala ni li capave vine ene wali.
Li vrai ki ene dimoune li dépasse lezot par accomplir banne ibaadat supplémentaire. Mais ene ibaadat li vine supplémentaire c'est necque quand li accomplir ceki essentiel. Li pareil couma ene dimoune ki pas travail dans l'heure travail, pas pou ena droit travail après l'heure travail ki nou appelle 'overtime'. Ene travail li vine 'overtime' quand travailleur-là faire travail dans l'heure travail d'abord.
Coumsa même نوافل li existé et li trouve le sens du mot quand ene dimoune accomplir banne faraa-iz d'abord. Donc premier stage de rapprochement li réalisé par accomplir banne faraa-iz ki bien essentiel. Après ça le deuxième étape de rapprochement li réalisé par faire banne ibaadat supplémentaires. Ene dimoune li continué rapproché avec Allah Ta'ala par exécute banne commandements Allah Ta'ala et par abstenir de banne kitchoses ki li fine interdit. Apart ça dans l'amour pou Allah Ta'ala, li continué faire banne ibaadat supplémentaires et volontaire ziska ki li vine "Mahboob Rabbaani" c'est-à-dire le bien aimé d'Allah Ta'ala.
Dans ça stage-là, le serviteur so goût et so dégoût li vine sous contrôle totale de Allah Ta'ala. C'est-à-dire li désire kitchose ki Allah Ta'ala content. Li détesté kitchose ki Allah Ta'ala détesté. Li servi entier so le corps dans la façon ki Allah Ta'ala content. Et ceki Allah Ta'ala content, c'est ça même ki li faire. Et ceki li faire, c'est ça même ceki Allah Ta'ala content. C'est ene stage très avancé de l'amitié cotte ene personne li annule li même et so banne désirs dans le plaisir de so bien aimé.
Quand ene serviteur arrive dans ça stage-là, Allah Ta'ala accorde li tout ceki li dimandé. Mais bizin conné ki Allah Ta'ala ena différent façon accepté doah de so serviteur: Parfois li donne li ceki li fine dimandé. Et parfois li donne li ene l'autre kitchose ki pli bénéfique pou li et parfois li réserve li pou accorde li dans aakhirat. Si ça li applique pou tous banne serviteurs, li applique pli bien pou banne bien aimés d'Allah Ta'ala.
