Question.
(1) combien la veine bizin couper pou faire ene zanimau halaal et ki banne les autres procedures ena?
(2) Est-ce ki li necessaire pou ena ene certificat pou ene la viande vine halaal?
(3) Est-ce ki manger haraam afecter ene personne so ibaadat?
(3) Est-ce ki li permette pou vende la viande ki pas fine faire zabah?
Reponse.
Mange halaal !
Ene zanimau ki li soit boeuf, bouc, cabri ou bien poule, pas gagne droit consommé tanque ki pas fine faire zabah. Ene zabah ki valable et ki faire ça zanimau-là vine halaal, c'est ene zabah ki fine faire par ene musulman ki fine lire bismillah avant coupé et ki fine coupe tous les 4 la veine ki trouve dans li cou ça zanimau-là. Si fine coupe trois au lieu 4, ça aussi li valable. Si ene dimoune pé coupe plusieurs zanimau, alors li bizin lire bismillah lors chaque zanimau ki li coupé. Lire ene seul coup bismillah pas sufi. Tanque pas sure ki ça banne règlements-là pé être respecté, d'après hadice de Nabi (s.a.w), pas gagne droit consommé. Li bien difficile pou dire ki ça banne règlements-là pé être respecté dans banne poule ki nou pé consommé.
... Certificats halaal !
Faudré pas gagne embetté avec banne certificats halaal parceki banne certificats halaal pas capave faire haraam vine halaal si pas pé respecté banne conditions et banne règlements ki bizin respecté. Couma ene certificat haalal pas capave faire la viande porc vine halaal, coumsa même li pas capave faire ene poule mort ou bien ene poule ki pas fine faire zabah, vine halaal.
... Mange halaal et ibaadat
Ene dimoune ki oulé préserve so banne ibaadat couma namaz, roza, tilaawatul Qour'aan etc, li bizin évite consomme banne poulets zordi jour parceki perna aukene garantie ki zotte halaal. Tanque pas sure ki ça poule ki ou pé mangé-là fine faire halaal d'après règlements et principe de shariah, bizin pas mangé parceki avant tout c'est nou Rabb, nou Nabi, nou Deen, nou Imaan et nou Ibaadat.
... Faire commerce haraam
Couma li haraam pou consomme l'alcool coumsa même li haraam pou faire commerce l'alcool ou servi kikene l'alcool. Dans la même façon, li haraam pou faire commerce banne la viande bœuf, bouc, mouton ou bien poule ki pas halaal. L'argent ki gagné par ene commerce pareil li haraam. Ene musulman pas gagne droit acheté, vendé ou bien faire commerce ene la viande ki li pas sure ki fine respecté banne conditions et règlements de zabah. Jour Qiyaamat banne dimounes pareil pou coupable divant Allah Ta'ala ki zotte fine faire banne musulmans mange haraam.
