Salaat-ut-Tasbeeh

Question.

1. Comment faire Salaat-ut-Tasbeeh ?

2.Qui position Hadeeth ki faire mention de Salaat-ut-Tasbeeh ? 

Reponse.

Rassouloullah (s.a.w) fine enseigne salaat-ut-tasbeeh dans la façon suivante :

"... Ki ou accomplir 4 rakaat. Dans chaque rakaat ou lire sourah Fatihah et ene sourah. Quand ou termine Qiraat dans premier rakaat, ou récite (tasbeeh) سبحان الله والحمد لله ولا اله الا الله والله اكبر 15 fois pendant ki ou pé dibouté. Apres ça ou faire roukou’ et faire ça tasbeeh-là 10 fois pendant ki ou dans roukou’. Ensuite ou lève ou la tête depi dans roukou’ et ou lire ça tasbeeh-là 10 fois. Apres ça ou alle dans sajdah et ou faire ça tasbeeh-là 10 fois pendant ki ou dans sajdah. Ou lève la tête depi dans sajdah et ou lire ça tasbeeh-là 10 fois. Ensuite ou re-alle dans sajdah et ou lire ça tasbeeh-là 10 fois. Ensuite ou lève ou la tête depi dans sajdah et ou lire ça tasbeeh-là 10 fois (dans posture assizé avant ou levé). Ça faire en tout 75 fois dans ene rakaat. Ou faire ça (coumsa même) dans 4 rakaat ..." (Abou Dawoud)

Position hadice :

Dans sanad ça hadice-là ena ene narrateur nommé Moussa Bin Abdul Azize. Ibn-ul-Jawzi fine qualifié li de ene rawi مجهول (inconnu). Acoze ça li fine inclure ça hadice-là dans banne hadices fabriqués. Banne savants de hadice fine juge ça ene l’attitude dépassé de la part de Ibn-ul-Jawzi. Parceki li pas vrai ki le narrateur Moussa Bin Abdul Azize li ene narrateur inconnu.

Banne savants de hadice couma ابن معين (Ibn Ma-ïne), النسائى (An-Niça-i) et ابن حبان (Ibn Hibbaan) fine qualifié li de ene narrateur authentique. Imam Boukhari fine mentionne ça hadice-là exactement couma li été ici dans so Juz Qiraat Khalfal-Imam. En plis de ça li fine rapporte hadice de ça rawi-là dans so Adabul-Mufrad. Ça prouvé ki li pas ene rawi inconnu chez banne savants de hadice.

Apart ça nou ena banne savants de hadice couma Al-Khateeb, Abou Moussa Al-Madeeni, Abul Hassan Bin Fadl, Al-Mounziri, Ibn-us-Salaah, An-Nawawi etc. ki fine qualifié ça hadice-là de authentique. Selon Al Mounziri, ça hadice-là fine être qualifié de ene hadice authentique par banne ‘Oulama couma Abou Bakar Al-Ajuri, Sheikh Abou Mouhammad Abdur Raheem, Sheikh Al-Hafiz Abul Hassan Al-Mouqaddasi. Ça hadice-là fine aussi rapporté par Hazrat Abdullah Bin ‘Oumar (r.a). A propos ça hadice-là Al-Haakim dire :

"La version rapporté par Hazrat Abdullah Bin ‘Oumar (r.a.) selon laquelle Rassouloullah (s.a.w) ti enseigne ça namaz-là à so cousin, li authentique." 

Ensuite après avoir mentionne so sanad, Al-Hakim dire :

"C’est ene hadice authentique ki pena ditou doute lors-là."

Salaat-ut-Tasbeeh et Allaamah Bin Hajar

Dans so Ajawibah-ala Risaalah-al-Qazwini, Allaamah Bin Hajar dire :

"La vérité c’est ki ça hadice-là (hadice lors salaat-ut-Tasbeeh) li dans ene degré de hadice hassan acoze ki li rapporté de plusieurs sanad."

N.B : Ene hadice Hassan c’est ene hadice ki passable et ki assez fort pou mette li en pratique.

Salaat-ut-Tasbeeh et Sheikh Naasiruddeen Al-Baani

Concernant la hadice de Hazrat Abdullah Bin Abbaas (r.a.) lors salaat-ut-Tasbeeh, Sheikh Naasiruddeen Al-Baani dire :

"اسناده ضعيف كما اشار اليه المصنف لكن الحديث له شواهد يتقوى بها ولذلك اوردته فى صحيح ابى داؤد"

"Le sanad de ça hadice-là li faible couma l’auteur (Ibn Khuzaimah) fine faire ressortir mais le hadice li bénéficié support de la part plusieurs hadice ki permette li vine dans degré ene hadice solide. Acoze ça mo fine mentionne ça dans Sahih Abou Dawoud."

Salaat-ut-Tasbeeh et Imam Ahmad Bin Hambal (R).

Dans commencement Imam Ahmad Bin Hambal (R) pas ti favorable à l’égard banne hadice ki fine rapporté concernant salaat-ut-Tasbeeh. Selon li, tous banne hadice lors ça sujet-là zotte faible. Mais d’après ceki Allaamah Jalaluddeen As-Soyouti (R) fine déclaré dans so "اللآلى المصنوعة" (Al-la-alil Masnou’a), ene fois Ali Bin Said fine attire l’attention Imam Ahmad Bin Hambal (R) vers ene hadice lors ça sujet-là ki rapporté par ene sanad selon lequel مسلم بن ابراهيم (Muslim Bin Ibraheem) fine rapporte ça de المستمر بن الريان (Al Moustamirr Bin Ar-Rayyaan) de ابو الجوزاء (Abul-Jawza), alors Imam Ahmad Bin Hambal (R) fine paraite satisfait. D’après Allaamah Bin Hajar (R), Imam Ahmad (R) ti gagne ça hadice-là par ene sanad ki li ti faible. Acoze ça li ti pou l’opinion ki pena aukene hadice fort lors ça sujet-là. Mais quand li fine prend connaissance de ça hadice ki المستمر بن الريان fine rapporté, alors li fine rétracté.

Hadice Al-Ansaari

Ça hadice-là fine rapporté par Al-Ansaari. D’après certain savant de hadice, Al-Ansaari li faire référence à Hazrat Jabir Bin Abdullah (r.a.). Selon Allaamah Bin Hajar (R) ça li faire référence à ene sahabi nommé Abou Kabshah Al-Ansaari. De toute façon ça ambiguïté dans nom-là li pas ene critère ki capave affecté position ça hadice-là. 

Conclusion

Et donc ça hadice-là li ene hadice ki bénéficié déjà le degré de ene hadice Hassan. Et astere par considération lezot hadice ki fine rapporté lors ça sujet-là, li pas de trop si nou qualifié ça hadice-là de ene hadice sahih et authentique.

Faire namaz sans bonnet.

Question.

Est-ce ki li obligatoire pou mette bonnet quand faire namaaz?

Reponse.

Li ene façon indésirable pou faire namaz sans couvert la tête. Li pas faraz ou obligatoire. Mais bizin faire bien attention. Faudré pas néglige couvert la tête par mépris pou ça pratique-là. Parceki ça capave entraîne la personne vers kufr.

Si kikene so bonnet tombé dans namaz, alors li bon ki li remette li lors so la tête si ça pas nécessite ene grand mouvement. Au cas contraire pas bizin faire la peine mette li lors la tête. Si l’heure namaz fine arrivé et la personne pena bonnet, alors faudré pas quitte namaz acoze ça. Li faire namaz sans bonnet même.

Ou pas metté même bonnet-là. Ki ena si ou mette li au moins dans namaz. Ki bénéfice ena dans faire ou namaz vine indésirable ? Ou capave vine dire ki li pas obligatoire. Nou tous nou conné ki li pas obligatoire mais li pas ça léger-là aussi ki bizin néglige li. Au moins li pas mois important ki ça banne grimace ki nou faire lors nou la tête. Dans lezot domaine, nou faire ene quantité kitchose ki pas ça nécessaire-là. Necque concernant couvert la tête dans namaz même ki nou commence pose tout qualité question. D’après l’ordre nou pas intéresse pou faire li. Acoze ça nou tire prétexte pou pas faire li. Mais pena doute li ene bon kitchose ki pou embellir ou ibaadat. Donc glace ou namaz couma ou content glace ou l’habillement etc.

Nifaas (saignement apres l'accouchement)

Question:

Après l'accouchement, eski ene madame bizin attane 40 jours même pou commence faire namaz?

Réponse:

Après l'accouchement ene madame li expérience ene saignement. Ça saignement-là appelle nifaas. D'après shariah pena aukene délai minimum pou nifaas. Li capave 1 jour couma li capave 10 jours couma li capave plis ki ça ou pli moins ki ça. Mais so délai maximum li 40 jours. Ça veut dire ki ene madame li capave arrête gagne so nifaas avant 40 jours aussi. Donc li pas bizin attane 40 jours même pou commence faire namaz. Dés ki li arrête saigné, li bizin faire ghussal et li bizin commence faire namaz. Et li capave alle dans ménage aussi. Si li ena complication ki empêche li faire ghussal, alors li capave faire tayammum. 

Normalement tayammum nou faire avec la terre. Mais capave faire li avec roche aussi ou avec brique. C'est-à-dire ene coup ena pou passe tous les 2 plat la main lors roche ou bien lors brique et passe ça plat la main-là lors entier figure. Et ene deuxième coup repasse li lors roche ou bien brique et passe li lors la main ziska coude. C'est-à-dire passe la main gauche lors la main droite et la main droite lors la main gauche.