Lire derrière Imam

Question:

Est-ce ki celui ki derriere imaam bizin lire sourah faatihah et ene l'autre sourah?

Reponse:

Rassouloullah (s.a.w) fine dire :

“Celui ki ena so Imam, alors Qiraat Imam li absolument so Qiraat.”

Ça hadice-là pé montré pas bizin lire derrière Imam parceki ceki Imam lire, li compté de la part de ceki pé dibouté derrière li.

Concernant ça hadice-là, Allaamah Ibn Taimiyah dire ki c’est ene hadice ki la majorité banne Sahaba-e-Kiraam et banne Tabe’ines fine mette li en pratique. Et ene hadice pareille, li ene houjjah (preuve) d’après l’unanimité de tous les 4 Imam. (Fatawah Bin Taimiyah)

tombe enceinte et nikaah

Question:

Dans pé fréquenté même, ene tifille fine tombe enceinte. Eski capave faire so nikah avec celui ki li ti pe fréquenté ?

Réponse:

Oui, li permette. Au contraire bizin pas tardé pou capave sauvegarde l’honneur la famille. 

N.B. Sa causé ki dire quand ene z’omme marié avec ene madame enceinte, alors si ça z’enfant-là li ene tifille veut dire ki ça z’omme-là pé marié avec so tifille même, ça li ene z’affaire fausse ça. 

Fréquenter

Question:

Est-ce ki gagne droit frequenter?

Reponse: 

Quand ene tifille gagne demane et tous les deux partis fini tombe d’accord, garçon commence allé-vini cote tifille. Nou appelle ça fréquenté. Tellement nou fine habitué avec tanne dire fréquenté ki nou nepli éprouve aukene dégoût pou ça. Malgré ki ça pratique-là li ene pratique haraam. Ceki pli grave là-dans c’est ki ça haraam-là li déroulé dans la caze avec consentement mama papa et toute la famille. Perna doute ki fréquenté li ene genre de zina ki li ene péché très grave. Ou ti à croire ki ene l’époque pou arrivé cote ene tifille musulmane pou engagé dans l’acte de zina dans so propre la caze avec consentement mama papa ki peut être fine capave fini faire ene douzaine de hajj et ‘Oumrah ? Pourtant ça même ki pé arrivé. Et de jour en jour ça pé pli aggravé et pé vine pli pire.

Banne ‘Oulama ki senti zotte concerné par ça fléau-là, zotte fine essaye minimise le dégât et la gravité par conseille les deux partis faire nikah à l’occasion de arrête même au lieu faire fiançailles. Plutard quand les deux parti zotte paré, lerla zotte capave necque faire réunion de famille pou envoye tifille cote garçon. Mais shaitaan aussi pas fine reste le bras croisé. Li mette dans la tête banne dimoune ki pas conné, ki ça aussi li pas bon. Alors nou pou tanne dimoune dire ki ça pas gagne droit. Parceki d’après zotte, quand fini marié bizin commence reste ensemble toute suite. Mais d’après shariat, perna aukene kitchose ki dire ki bizin commence vive ensemble toute suite quand fini marié. Reste ensemble, ça li droit ene missié ek so madame. Ça, c’est zotte même ki bizin guetté quand zotte pou faire li.

Li bien drôle ki quand zotte ti pé fréquenté sans faire nikah, alors personne pas fine trouve ça bêtise-là haraam. Couma dire gagne droit faire li sans faire nikah. C’est necque ça nikah-là même ki fine gâte tout. Pas acoze ça même ki dimoune dire “Mangue coquin ena pli bon goût.”

Mais nou comme banne musulmans, nou pou continué apprécié kitchose ki halaal. Quand même li paraite perna goût. Nou bizin pas approche haraam quand même li paraite boucou attirant. Parceki ene musulman, li pas vive pou so plaisir. Li vive pou le plaisir Allah Ta’ala.

Donc si trouvé ki garçon ek tifille pas pé oulé comprend, alors faire zotte nikah pou ki zotte pas reste dans haraam. Li tout à fait permette et correcte d’après shariat. Au contraire li ene mérite dans ça l’époque ki rempli avec toute sorte dégradation sociale et spirituelle.

Bijou en or

Question:

Est-ce ki banne madammes gagne droit mette bijoux en or?

Reponse:

Ene z’omme pas gagne droit servi l’or en forme bijou. Quant à banne madames, zotte gagne droit servi l’or en forme bijou. Ena banne hadices ki donne l’impression ki banne madames aussi pas gagne droit servi bijou en or mais d’après tous banne savants, ça hadice-là soit fine abrogé ou bien ça li applique lors banne madames ki expose zotte bijoux divant banne z’ommes étrangers. Couma li possible ki ça applique lors banne ki mette ça par vantardise.

De toute façon, porte bijoux en or, li ene kitchose ki tout à fait permette pou banne madames. Allaamah An-Nawawi et Allaamah Bin Hajar Al-Asqalaani, zotte tous dire ki ena Ijma (consensus) banne ‘Oulama ki banne madames gagne droit porte banne bijoux en or.

Li bon conné ki Ijma c’est ene preuve bien bien solide parceki Rassouloullah (s.a.w) fine donne garanti ki tous banne ‘Oulama pas capave tombe d’accord lors ene kitchose ki pas bon. Donc quand zotte tous d’accord ki ça li permette, alors li bizin ene kitchose ki permette.

Ene fois quand banne ‘Oulama fini tombe d’accord lors ene point, alors astere personne perna droit revoir la question. L’opinion isolé-là ena li impé partout même ça. Bizin pas prend compte banne l’opinions isolées. Bizin toujours marche avec Ijma. Quant à banne objets en or couma l’assiette, cuillères, plats, peignes etc. ça li haraam lors z’omme et madames tous les deux. Ceki permette c’est seulement bijoux en or pou banne madames.

HADICE

“L’or et la soie fine autorisé pou banne madames dans mo ‘Oummat et ça fine interdit pou banne z’ommes.” (Nassa-ï)

Allaitement

Question:

Jusqu'a quand ene zenfat gagne droit boire du lait avec so maman?

Reponse:

Ene ti bébé gagne droit boire du lait avec so mama ou bien avec ene l’autre madame juska l’age de 2 ans. Apres 2 ans bizin pas allaite ti bébé. Dans ça période de 2 ans-là, si ene ti bébé li boire ene tigite aussi avec kit madame, alors ça ti bébé-là li vine ça madame-là so z’enfant du lait. Coumsa même ça madame-là vine ça ti bébé-là so mama du lait.

Couma ene madame pas gagne droit marié avec so propre z’enfant, coumsa même li pas gagne droit marié avec so z’enfant du lait.

Tous banne ti bébé ki boire du lait avec ene seul madame, alors ça madame-là vine ça banne ti bébé-là zotte mama du lait. Coumsa même banne bebe-là zotte vine frères sœurs entre zotte même. Ça veut dire ki ene pas gagne droit marié avec so camarade pareille couma banne propres frères sœurs pas gagne droit marié entre zotte.

Si ene ti bébé boire du lait avec kikene après l’age de deux ans, alors li pas vine z’enfant du lait ça personne-là. Mais li pas permette faire ene z’enfant boire après l’age de deux ans.

Quant à ene missié, li gagne droit faire l’action avec so madame sans ki li laisse kitchose dessane dans so la gorge. Si jamais li fine laisse kitchose dessane dans so la gorge et li fine boire li, alors li fine faire ene péché. Mais ça pas annule so nikah. Zotte continué reste missié madame.

Belle-mere et Belle-fille

Question:

Souvent belle-mere et belle-fille gagne la guerre ki so solution?

Reponse:

Le problème belle-mère/belle-fille ena li presque partout. Ene belle-mère jamais li pou capave prend place ene mama. Coumsa même ene belle-fille jamais li pou capave prend place ene tifille. C’est parceki ene belle-mère li pas pou capave content so belle-fille couma li content so tifille. Et ene belle-fille aussi pas pou capave content so belle-mère couma li content so mama. Ça c’est ene question de sentiment. Ene dimoune pas capave force so sentiment pou content kikene. Mais ça pas empêche ene belle-mère ou ene belle-fille vive avec so camarde bien dans l’harmonie et avec l’amitié. Ni ça empêche chakene respecté droit so camarade. Vive dans l’harmonie li vine par ena respect pou chakene so droit. Tanque ki chakene so droit pas respecté, pas pou capave ena tranquillité et la paix.

Ene madame bizin conné ki ça missié ki pé reste avec li, li encore garçon so belle-mère. Et donc li ena certaine devoir envers so mama. Faudré pas li en colère quand li trouve so missié pé donne so maman kitchose ou bien si li pé servi so mama. Faudré pas li faire regardant. Li bizin pensé ki li aussi li ena ene mama. Si so belle-sœur commence faire regardant avec so frère quand li aide so mama, ça pas pou faire li plaisir.

De l’autre coté ene belle-mère aussi li bizin pensé ki li fine marié so garçon. Alors so garçon ena certaine responsabilité envers so madame et z’enfant. Li bizin laisse so garcon assume so responsabilité. Coumsa même li bizin laisse so belle-fille vive en toute liberté avec so missié. Faudré pas li veille zotte et li vine barrière entre zotte. Li bizin calculé ki si so tifille ti gagne ça problème-là, ça pas ti pou faire li plaisir.

Ceki tous les deux parti bizin mette dans zotte la tête ki zotte ena pou ranne compte cote Allah Ta’ala, si jamais zotte fine offense zotte camarde.

Apres tout ene dimoune bizin conne garde l’équilibre entre l’amour pou so madame et l’amitié pou so mama. Faudré pas li laisse ene affecté l’autre.

Ene Conseil

Pou capave amene l’harmonie, la paix et la justice, li très important ki nou assume nou responsabilité avant nou réclame nou droit. C’est le contraire ki pé arrivé partout. Acoze ça, de plis en plis, l’insécurité, l’injustice et l’instabilité pé installe partout à tout niveau.

Mouqallid et Ghair Muqallid

Question:

ki difference ena entre ene Mouqallaid et ene Ghair Mouqallaid?  

Mouqallid

Mouqallid veut dire ene dimoune ki suive so Deen d’après explication et interprétation ene de 4 Imams. Oui ! Li suive ene seul là-dans. Pas ene-ene coûte sanla et parfois l’autre-là. Astere soit li suive Imam Abou Hanifah  ou bien Imam Malik ou soit Imam Shafe’i ou bien Imam Ahmad Bin Hambal (rahmatoullaahi ‘alayhim). Li trouve li en sécurité concernant so Imam et so Deen dans suive ene seul là-dans. Dans suive parfois sanla et parfois l’autre-là, li trouvé ki li pas pé suive Deen, li pé suive so désir. Li conné ki boucou pé faire façon suive Deen ziste pou servi Deen couma ene paravent. Mais en réalité, c’est zotte désir ki important pou zotte.

Ghair-Mouqallid

Et ghair-mouqallid c’est ene ki pretanne pas suive aukene Imam. Mais ça li seulement ene fausse prétention. En réalité li suive kikene sans déclare ouvertement ça kikene ki li suive-là. Parceki dans suive ça kikene-là même ki li pas suive aukene Imam. Si suive Imam li pas bon, alors ça ghair-mouqallid-là li faire ene pli grand gaffe ki ça. Mouqallid li suive ene ki vraiment conné et ene ki ti boucou près avec l’époque Rassouloullah r. Mais sanla li suive ene ki pretanne conné quand tandis ki li pas conné.

Par exemple ou pou trouve zotte éprouve ene grand degout pou suive ene aussi grand ‘Aalim couma Abou Hanifah (rahmatoullahi ‘alayh). Mais de l’autre coté zotte capave suive couma ene Albani aveuglement dans tous ceki li dire et dans ceki li faire zotte comprend.

Point commun et difference

Donc dans suive kikene, mouqallid et ghair mouqallid tous les deux pareille. Personne pas capave dire ki li pas suive. Coumsa même dans pas conné aussi tous les deux pareille. Ni sanla conné ni l’autre-là - mais avec différence. C'est-à-dire ene mouqallid li reconnaite ki li pas conné. Par contre ene ghair mouqallid li déclare conne boucou quand tandis ki li pas conne tigite aussi. Li vraiment ene la honte ça ki ou déclare conné quand ou pas conné. Li vrai ça ki dimoune ki dans soulaison jamais li croire ki li dans soulaison. Li trouve tous dimoune sou.

Meilleur

Meilleur c’est mouqallid ki li pas conné mais li reconnaite ki li pas conné. Et acoze ça li reconnaite ki li bizin suive ene ki vraiment conné.

Taqleed et Talfeeq

Question:

ki veut dire taqleed et talfeeq?

Reponse:

Dans Shariah ki représenté particulièrement par Qour’aan-e-Kareem et hadice, ena deux qualités la loi:

(a)           منصوص

(b)          غبر منصوص

(a)           منصوص C’est ene la loi ki mentionné explicitement et clairement.

(b)          غبر منصوص C’est ene la loi ki pas mentionné ou bien ki mentionné mais ki pas claire. Bizin comprend li entre les lignes.

Ça deuxième qualité la loi ki pas claire, dimane zeffort pou être clarifié et élucidé à la lumière banne principes et banne règles général établi par shariah. Faire le maximum z’effort pour clarifié et explique banne textes de loi ki pas claire appelle اجتهاد.

Celui ki ena la capacité, l’aptitude et la compétence pou faire اجتهاد appelle مجتهد (Moujtahid). ‘Alim ena plusieurs degré et plusieurs niveau. Moujtahid c’est ene degré pli avancé et pli haute de ene ‘Alim. Couma les 4 Imam et les autres encore:

¯  Imam Abou Hanifah rahmatoullahi ‘alayh (80-150)

¯  Imam Malik rahmatoullahi ‘alayh (93-179)

¯  Imam Shafi rahmatoullahi ‘alayh (150-204)

¯  Imam Ahmad Bin Hambal rahmatoullahi ‘alayh (164-241)

¯  Imam Abou Yousouf rahmatoullahi ‘alayh (113-182)

¯  Imam Mouhammad rahmatoullahi ‘alayh (135-189)

 Apart ça ena encore boucou banne Moujtahid couma Imaam As-Thawri, Imaam Al-Awza’ee, Imaam Ibn Abu Lailah

Taqleed

Ena deux façons pou suive Deen:

1.      Par ou propre اجتهاد si ou ena capacité pou faire li.

2.      Par suive recherche ene مجتهد. Suive recherche ene مجتهد pou pratique Deen appelle تقليد.

Ene personne ki faire تقليد dans suive Deen appelle li مقلد (Mouqallid). Taqleed li nécessaire et même indispensable pou banne ki na perna l’aptitude et la compétence pou faire اجتهاد. Allah Ta’ala dire:

"فاسئلوا اهل الذكر ان كنتم لا تعلمون"

“Dimane banne ki conné si ou pas conné” (S21/V7).

N.B : Li intéressant pou conné ki de nos jours tous dimoune faire taqleed sans exception. Mais ena déclaré ki li pas faire Taqleed. Ça li ene fausse prétention parceki quand ça dimoune-là li explique ene kitchose ou bien li faire ene causerie, li oulé ki tous dimoune écoute li et suive li. Jamais nou fine tanne ça banne dimoune-là dire ki pas bizin mette en pratique si ou pas fine comprend ceki nou fine dire. Au contraire zotte force ou pou suive zotte aveuglement. Juska même zotte ena l’audace prend ou responsabilité cotte Allah Ta’ala !

تلفيق - Talfeeq

تلفيق Veut dire amalgamé ou bien faire plusieurs vine dans ene. Dans langage de banne Fouqaha (juristes), quand nou dire تلفيق, par cela nou comprend suive recherche plusieurs مجتهد à la fois. Par exemple dans wazou, prend impé avec Imam Shafi (rahmatoulahi alayh), ene ti peu avec Imam Malik (rahmatoulahi alayh) et ene ti peu avec Imam Abou Hanifah (rahmatoulahi alayh).

Exemple: Apres avoir faire wazou, ene personne so néné fine saigné et li pas trouve la nécessité pour refaire wazou en suivant Imam Shafi (rahmatoulahi alayh). Li pas lire sourah Fatiha dans namaz en suivant Imam Abou Hanifah (rahmatoulahi alayh). C’est ene namaz ki pas valable d’après tous les deux Imaam. D’après Imam Abou Hanifah (rahmatoulahi alayh), acoze ki so wazou même pas compté. Et d’après Imam Shafi (rahmatoulahi alayh), acoze ki li pas fine récite sourah Fatiha.

Règlement concernant Talfeeq

Talfeeq li haraam parceki ça li ouvert la porte pour اتباع الهوى (suive désir et plaisir) ki Shariah fine dessane pou combatte li. Suive recherche plusieurs Moujtahid à la fois li couma dire suive deux différent codes de la route à la fois. Couma ça façon conduire-là li endange la vie physique,  تلفيقaussi li ene danger pour la santé spirituelle. Talfeeq li faire dimoune suive ceki li, li oulé. Pas ceki Allah Ta’ala oulé. Couma dire Shariat c’est, ceki li, li oulé. Pas ceki Allah Ta’ala oulé. C’est ene l’attitude bien bien grave parceki en faisant Talfeeq, ene dimoune perna aukene discipline dans so la vie. Jordi li faire ene kitchose halaal ki hier li ti considère li haraam. Et si ça li dans so porté et dans so l’avantage, li pas étonnant si li re-déclare li halaal demain. Banne ‘Oulama fine appelle ça façon d’agir-là التلاعب بالدين c’est à dire joué avec Deen. Couma dire Deen li ene joujou dans so la main. Nou capave comprend ça par ene l’exemple :-

Ene garçon fine content ene tifille. La famille na pas content marié zotte tifille avec ça garçon-là. Garçon-là oulé marié à tout pris avec ça tifille-là même. Li alle cotte sanla cotte l’autre la pou faire nikah. Personne pas accepté pou faire so nikah. Selon zotte ça nikah-là pas pou compté parceki tifille-là so ولى - wali (parti responsable) pas d’accord. L’autorisation wali li indispensable pou ene nikah compté parceki Rasouloullah r fine dire dans ene hadice :

"لا نكاح الا بولى"

“Perna aukene nikah (existé) excepté par l’autorisation wali (parti responsable)”

Mais finalement li fine gagne ene ‘Alim ki suive Ijtihaad Imaam Abou Hanifah rahmatoullahi alayh. Alors d’après so l’interprétation, à la lumière de certaines versets dans Qour’aan-e-Kareem, ene nikah pareil li ene nikah valable quoique ki li pas faisable. Alors li fine prend l’opinion ça ‘Alim-là et li fine faire nikah parceki li fine trouve ça l’opinion-là dans so bord. Resté resté ene beau jour, dans colère li fine alle donne so madame tous les trois talaaq ene seul coup. Ça ‘Alim ki ti faire so nikah dire ki li pas gagne droit retourne avec so madame parceki tous les trois talaaq fine fini prend l’effet. Li alle cotte banne ki ti dire so nikah na pas compté. Banne-là dire li premièrement to nikah pas ti compté. Acoze ça, talaaq ki to fine donné aussi na pas fine compté. Astere li re-trouve li couma li ti été au commencement. Si li pé suive ça ‘Alim Hanafi-là, alors li pas capave retourne avec so madame. Et si li pé prend ça banne lezot-là zotte l’opinion, alors dans ce cas, talaaq pas fine porté mais so madame na pas dans so nikah aussi. Et troisième dimoune dire li ki trois talaaq compte ene seul talaaq. Alors li fine attrape ça troisième l’opinion-là. Pas comme ene principe dans Deen mais ziste comme ene paravent. L’essentiel c’est so l’avantage ki perna narien à faire avec suive Deen. Si jamais dans l’avenir, li donne so madame ça deux talaaq ki fine resté-là dans deux différent l’occasion, à ce moment-là, li pas pou hésité pou retourne vers ça banne ki ti dire dans commencement ki so nikah pas compté sans l’autorisation wali. Parceki dans suive ça banne-là zotte l’opinion, li encore ena ene chance pou remarié so bien-aimée. Donc Talfeeq li couma dire suive Deen quand li dans ou l’intérêt et suive la loi du pays quand sanla li dans ou l’intérêt.

Réflexion

“Donne public la liberté ou le choix pou suive ceki li content, veut dire donne couteau dans la main ene zenfant”