Accepter invitation

Question:

Ene dimoune fine invite ou. Li ene très bon camarade. Acoze ça d’après l’ordre, bizin faire li plaisir accepté so l’invitation. Mais c’est ene invitation ki pas encadré avec principe islamique. Alors ki bizin faire dans ene situation pareille ? 

Réponse:

Perna grande chose à faire.Li bien simple. Necque ena pou pas assisté et pas accepté l’invitation parceki avant tout ou ene musulman. Ou pas capave déplaire Allah Ta’ala ziste pou faire kikene plaisir !

Suivre Quraan et Hadeeth sans passe par ene savant.

Question:

Est-ce ki tous dimoune capave suivre Quraan et Hadeeth par zotte même?

Reponse:

Pas tout difil ki capave prend courant directement depi dans central. Bizin ena gros difil pou faire ça travail-là. Quant à banne difil mince, zotte bizin passe par ene transformateur pou prend courant. Sinon pas seulement li pas pou gagne courant, li pou brulé.

Coumsa même pas tout dimoune ki capave comprend Qour’aan et hadice par li même. Ici aussi li bizin passe par ene transformateur pou comprend et bénéficié avec la lumière de Qour’aan et hadice. Ca transformateur-là appelle li ene mujtahid. Par moujtahid, nou comprend banne ‘aalim couma Imam Abou Hanifah, Imam Malik, Imam Shafi et Imam Ahmad Bin Hambal (rahmatoullahi ‘alyhim). Sinon ena chance fizip sauté ki faire ene dimoune vine coco brillé. Dans ça stage-là li tombe dans l’égarement et li mette ene quantité dans l’égarement. Li perna respect pou banne ‘Oulama. So la vie fini dans réfuté ou critique banne ‘Oulama. Par cela li expose li à la colère divine. Astere mille ou faire li comprend, li pas pou comprend parceki so difil fine fini brûlé.

Suive Imam et Yahya Bin Said Al-Qattaan

Question:

Est-ce ki Banne Grand Muhadditheen (savants de hadeeth) fine suivre mazhab?

Reponse: 

Yahya Bin Said Al-Qattaan ti ene très grand ‘Aalim et célèbre érudit dans matière de hadice. So domaine principal c’était la vérification de hadice. Banne célèbres ‘Oulama et savants de hadice de Deen couma Imam Ahmad Bin Hambal, Yahya Bin Ma-ïne et Ali Bin Al Madeeni (rahmatoul-laahi ‘alayhim) fine apprane dans ça domaine-là avec li. Malgré tous ça connaissance ki li ti ena là, li ti pé donne fatwa et renseignements dans Deen d’après l’opinion et recherche Imam Abou Hanifah (rahmatoul-laahi ‘alayh).

Matière de réflexion

Si ene personnage couma Yahya Bin Said Al-Qattaan (ki ti professeurs banne grand grand ‘Oulama) aussi fine bizin suive ene Imam, alors nou ki nou été pou pas suive ?

Si li vrai ki c’est ene idiot ki faire taqleed couma certaine ki déclare ‘malin’ oulé faire croire, alors couma nou pou qualifié Yahya Bin Said Al-Qattaan ?  

Ena ene quantité hadice rapporté par li ki trouve dans tous banne livres de hadice. Ça veut dire ki banne savants de hadice couma Imam Boukhari, Imam Mouslim, Tirmizi, Abou Dawoud, Naçaai, Ibn Maajah et lezot, zotte tous ti reconnaite valeur Yahya Bin Said Al-Qattaan.

Allah Ta’ala dire :

“Jamais Al Maseeh’ (Hazrat ‘Issa u) ni banne anges ki bien proches pou senti kit déshonneur dans vine serviteur pou Allah …” (S4/V172)

C’est-à-dire banne ki perna narien dans zotte même ki pas oulé soumette zotte à Allah Ta’ala. Dans la même façon nou trouvé ki jamais banne grand grand savants fine senti kit déshonneur dans suive ene Imam. C’est necque banne ki perna narien apart ki zotte fine conne la haut-la haut deux trois livres ki lève néné. Et comme principe nou bizin conné ki de tout le temps c’est banne idiots et banne imbéciles même ki pli vantard et pli orgueilleux. 

Banne ‘Oulama couma Allaamah An-Nawawi, Allaamah Ibn Hajar Al-Asqalaani et Allaamah Badrouddeen Al-Aini (rahmatoullahi ‘alayhim), zotte connaissance fine amene zotte pou comprend impé le profondeur de connaissance de banne 4 Aimmah (Imams). 

Acoze ça zotte fine bizin mette zarmes enbas pou suive ça banne Imam-là. Si kikene pas fine comprend ça, c’est zotte manque de connaissance,  pou pas dire l’ignorance ki fine amene zotte vers ça.

Coumsa même Waki Bin Jarraah, Yahya Bin Mai-ine et Laith Bin Sa’d, zotte aussi ti pé suive recherche Imam Abou Hanifah (rahmatoul-laahi ‘alayh).

Yazeed Bin Haroun dire, mo fine joine millier de banne personnages et mo fine gagne l’occasion prend hadice depi la plupart parmi banne-là. Mais mo pas fine trouve kikene pli faqeeh (personne ki ena la compréhension de Deen), pli pieux et pli ena connaissance de Deen ki cinq personnes. Parmi là-dans, Imam Abou Hanifah (rahmatoullahi ‘alayh) li vine en premier lieu. »

A noté ki Yazeed Bin Haroun li pas n’importe ki sanla. Selon Tahzeeb-ut-Tahzeeb de Allaamah Bin Hajar Al-Asqalaani, li ti ene érudit très éminent et ene savant de hadice par excellence ki banne savants couma Imam Ahmad Bin Hambal, Ishaaq Bin Raahwa’y, Yahya Bin Ma-ïne, Ali Bin Madeeni fine bénéficié énormément avec li dans domaine de hadice.

 

Vivant dans Qabr

Question:

Est-ce ki Nabi (s.a.w) et banne lezotte Prophetes vivant dans zotte Qabr?

Reponse:

Nou bien-aimé Nabi (s.a.w) li vivant dans so qabar. Hazrat Anas (r.a) fine rapporté ki Rassouloullah (s.aw) fine dire :

“Banne Prophètes zotte vivant dans zotte qabar …”

C’est ene hadice ki fine rapporté par Al-Baihaqi, Allaamah As-Subki et Abu Ya’la. Et c’est ene hadice authentique.

Quand kikene faire salaam lors qabar Rassouloullah (s.a.w), li tanne so salaam. Et quand kikene faire salaam depi loin, alors banne anges transmette ça à Rassouloullah (s.a.w). Selon ene hadice dans Mousnad Ahmad et Al-Moustadrak, Rassouloullah (s.a.w) fine dire :

“… Issa, garçon Mariam pou vine cote mo qabar et pou faire moi salaam ki sans doute mo reponne li.”

Ça hadice-là aussi li ene hadice solide et authentique. Reste vivant dans qabar, li pas ene zaffaire ki impossible parceki ça Créateur ki faire poisson vive dans de l’eau et dimoune vive lors la terre, li ena la capacité garde so banne serviteurs privilégiés - banne Prophètes, vivant enbas la terre dans zotte qabar. Narien pas impossible ni difficile pou Allah Ta’ala.

Rêve

Question:

Combien qualité rêve ena?

Réponse:

C'est ene image ki produire dans l’esprit ene dimoune ki li trouve li pendant so sommeil. Ça ena 3 qualités :

1. Rahmaani
2. Shaitaani
3. Nafsaani

Normalement tous banne rêves li vine de coté Allah Ta’ala. Mais ena des fois ou bien très souvent, selon dimoune et selon circonstance, ça li influencé et manipulé par banne éléments extérieurs. Banne éléments extérieurs ki capave manipule nou banne rêves, li capave être ça condition ou ça banne pensées dans lesquelles nou vive, couma li capave shaitaan aussi.

Donc ça rêve ki pas influencé ou bien ki pas manipulé par aukene élément extérieur appelle li Rahmaani.

Rêve Nafsaani

Rêve Nafsaani c’est ça rêve ki influencé par ça condition dans laquelle la personne pé vive appelle li Nafsaani. Par exemple quand ene dimoune li reste dans pense ene kitchose ou ene kikene, alors li rêve li le soir. Coumsa même quand ene dimoune cause ene causé avant li dormi, alors li ena toute chance rêve ceki li fine causé. Et parfois nou ena pou alle picnic, alors li arrivé ki nou fini rêvé nou pé alle picnic avant allé même. Tout ça banne rêves-là ki produire par ça condition dans laquelle nou pé vive, li fine fini enregistré dans nou l’esprit et dans nou nafs. Alors appelle li Nafsaani.

Rêve Shaitaani 

C’est ene rêve ki influencé et manipulé par shaitaan. Li faire ça ziste pou mette la personne dans doute et dans confusion. Shaitaan li ene l’ennemi déclaré pou insaan. Alors li influence so banne rêves pou faire du tort.

Rêve Rahmaani

Dans ça banne rêves-là, c’est necque rêve Rahmaani ki ena interprétation. Le reste-là perna aukene signification.

Rêve Rahmaani li ene message de la part Allah Ta’ala à so banne serviteurs privilégiés. Mais là-dans aussi c’est necque banne prophètes ki ena la garantie ki zotte rêve aussi li ene genre de Wahi (révélation). Allah Ta’ala fine accorde banne prophètes ene protection très particulière. Acoze ça banne prophètes zotte innocents de toute sorte péché. Coumsa même zotte rêve aussi li bénéficié ene protection de coté Allah Ta’ala ki empêche li être manipulé. Ceki zotte rêvé, li vrai à 100 pou 100. C’est acoze ça même, Hazrat Ibrahim u ti fine mette couteau lors la gorge so garçon Hazrat Ismail u pou faire li zabah lors rêve ki li ti rêvé. Donc c’est necque rêve banne prophètes ki li ene preuve et ene évidence concrète d’après shariah. Quant à banne rêves banne personnages pieux, zotte perna ça garantie-là. Acoze ça zotte rêve pas capave servi comme ene preuve ou ene évidence pou lezot d’après shariah. Mais pou zotte même, zotte capave considère li tanque ki li pas en conflit avec aukene principe dans shariah. Donc si kikene fine perdi ene kitchose et li fine rêvé ki un tel fine coquin ça kitchose-là, alors lors la base ça rêve-là pas capave accuse ça dimoune-là parceki bizin ena preuve pou accuse kikene. Et rêve banne dimoune apart banne prophètes li pas ene preuve d’après shariah. Mais ene dimoune fine rêvé ki li bon si li faire tel travail tel jour ou bien avec tel dimoune, alors li capave prend li en considération parceki ça li pas en conflit avec aukene principe de shariah.