Faire namaz lor chaise et saff

Questions.

Est-ce ki gagne droit assise lor chaise pou faire namaaz avec jamaat?

li plus meilleur pou assize lor chaise ou bien enbas?

couma bizin mette chaise pou saff vine droite?

Reponse.

Rassouloullah (s.a.w) fine mette boucou l'emphase lors dresse saff dans namaz. Dresse saff veut dire diboute dans namaz costé-costé et cote-à-cote en sorte ki pas laisse aukene l'espace entre deux mouswalli. Coumsa même ça signifié diboute cote-à-cote en sorte ki personne pas diboute divant derrière afin pou saff reste droite et li pas vine travers.
Nabi (s.a.w) ti ena l'habitude dresse saff avant li commence namaz parceki dresse saff droite li forme parti dans perfection ene namaz. C'est-à-dire ça li nécessaire pou ene namaz complété. Sans ça, namaz li accompli dans ene façon incomplète. Après Rassouloullah (s.a.w), banne Khulafa-e-Rashideen fine suive même ligne de conduite. D'après ene hadice, ça capave crée désaccord entre banne mouswalli si pas dresse saff. Donc li très important pou dresse saff dans namaz avec jamaat avant commence namaz.
Zordi jour nou ena ene problème ki boucou mouswalli pé faire namaz lors chaise. Si pas capave même faire roukou et sajdah dans façon normal, alors li pli bon si ene dimoune li assize enbas li faire namaz. Si jamais li gagne difficulté faire li assizé enbas, alors li capave assize lors chaise.
Astere dimoune-là ena difficulté necque dans faire sajdah. Quant à diboute, li pas difficile pou li. Acoze ça nou trouve ene quantité ki pé bizin assize lors chaise pou faire roukou et sajdah, zotte diboute dans Qiyaam. Zotte pas assize lors chaise. Bon, ça aussi li permette dans ene certaine mesure mais li pli bon si pou Qiyaam aussi zotte reste assizé lors zotte chaise quand même zotte ena capacité pou diboute. Dans ça façon-là li pou pli facile pou li pose so chaise lors saff en sorte ki so deux la patte derrière li porte parallèle avec li pied banne mouswalli et li assize lors so chaise depi commencement namaz même. Ça li pli bon ki li décale li avec saff parceki ça li ene façon pou faire saff vine travers ki bien pas bon et ki d'après hadice, li ene source de désaccord entre banne musulmans.
Nou ena ene deuxième problème. Banne ki assize lors chaise pou faire namaz, zotte assize dans ene façon ki isole zotte avec saff. Zotte pas vine faire namaz dans saff malgré ki ena place. Zotte préfère reste ene coté par zotte même ou bien par exigence de la part la direction. Dans ça cas-là nou bizin reconnaite ki nou ena deux difficulté. Si zotte pé diboute dans saff, ça li faire saff-là paraite drôle pou pas dire vilain. Et si zotte pé assize ene coté, ça faire pas respecté l'ordre ki Nabi (s.a.w) fine donné pou joine saff et diboute costé-costé.
Dans ene dilemme pareil, bizin respecté l'ordre Nabi (s.a.w) et vine assize avec chaise quand même dans au milieu saff et quand même ça faire saff paraite drôle parceki Nabi (s.a.w) so l'ordre li passe avant tout. Vaut mieux nou paraite drôle ki nou désobéir Nabi (s.a.w).

Faire Hajj avec soeur so ti zenfants

Question:

Eski ene zomme gagne droit accompagne ti zenfants so sœur dans hajj?

Réponse:

Ene dimoune so sœur so ti zenfant, li tombe so neveu ou bien so nièce so zenfant. Ene dimoune so nièce li ene mahram pou li. Coumsa même zenfant nièce aussi li tombe mahram. Donc ene dimoune gagne droit accompagne ti zenfants so sœur dans hajj.

Masah lor chaussette ordinaire

Question.

Est-ce ki gagne droit faire masah lors chaussette ordinaire?

Reponse.

Ena quatre kitchose ki fine ordonné pou faire dans wazou d'après Qour'aan-e-Kareem. Donc ena quatre kitchose ki faraz dans wazou:

1. Lave figure,
2. Lave tous les deux la main ensemble avec coude,
3. Lave tous les deux li pied ensemble avec cheville et
4. Faire masah lors la tête.

N.B: Faire masah veut dire passe la main mouillé.

Bizin ena ça quatre kitchose-là pou wazou compté. Et bizin ena ene wazou ki compté pou namaz compté. Si kikene fine manque ene de ça quatre kitchose-là, veut dire ki so wazou pas compté et conséquemment so namaz aussi pou ene namaz dans vide.
D'après banne hadice ki bénéficié ene haute degré de l'authenticité ki nou appelle li hadice Moutawaatir, ena facilité faire masah lors ene chaussette spécial ki appelle "Khouff" au lieu lave li pied. Acoze ça banne 'Oulama fine faire exception pou ça genre de chaussette-là. Quant à banne chaussette ordinaire ki faire avec coton ou la laine, alors pas permette faire masah lors-là. Si kikene faire li, so wazou pas pou compté.

Ena hadice ki fine rapporté ki donne l'impression ki ça aussi li permette, mais c'est ene hadice ki pas assez fort ki capave servi pou enlève la loi Qour'aan ki oblige lave li pied dans wazou. Donc ene dimoune li prend ene grand risque quand li faire masah lors chaussette ordinaire dans wazou. Li bizin pas faire li pou so wazou compté.

L'Intérêt

Question

ki veut dire Riba?

Reponse.

Riba veut dire l'intérêt. Ene forme commun de l'intérêt, c'est ça somme en plus ki ene dimoune recevoir lors la somme ki li fine déposé dans la banque. Ça li haraam. Pas gagne droit servi li dans mangé boire, dans acheté linge, dans paye loyer ni dans paye l'ammane. Coumsa même pas gagne droit servi li dans construire toilette ou la caze ni dans construire toilette masjid ou madrassah.
D'abord pas bizin rentré même dans ene transaction ki ena l'intérêt. Si la monnaie l'intérêt vine dans ou possession, bizin débarrassé avec ça par dispose ça à banne ki bien pauvre et banne ki dans extrême difficulté sans l'intention de sawaab (récompense).
Faire transaction ki ena ribah (l'intérêt) li couma dire déclare la guerre avec Allah Ta'ala et so Rasoul (s.a.w). Ene dirham de l'intérêt ki ene dimoune li consommé avec connaissance, li pli grave ki commette 36 fois zina. D'après ene hadice, Rassouloullah (s.a.w) fine dire ki riba (l'intérêt) ena 70 niveau (de gravité). Le niveau pli inférieur li couma dire ene dimoune pé ena ménage avec so mama.
Donc riba li ene kitchose bien bien grave ki dimoune par zotte l'ignorance pé prend li pou bien simple.