Donne zakaat dans société

Question:

Si ene société fine mal distribue zakaat ki banne dimoune fine donné est-ce qui banne dimoune la zotte zakaat pou accepté?

Reponse:

Zakaat li ene pilier fondamental de l’Islam. Quand donne zakaat bizin assuré ki la personne ki ou pé donne zakaat, li mérite zakaat. Si ou pé dispose ou la monnaie zakaat à kikene ou bien dans kit organisation ou bien société, ou bizin assuré ki zotte conne distribué zakaat. Sinon ou zakaat pas pou compté. Comme ene principe général, li bon conné ki pas gagne droit mette la monnaie zakaat dans construction Masjid ou bien Madrassah. Couma pas gagne droit imprime journal, la gazette, pamphlet ou bien livre avec la monnaie zakaat ki pou être distribué parmi banne pauvres et riches tout les deux. Similairement pas gagne droit servi la monnaie zakaat pou faire la paye banne professeurs dans madrassah ni gagne droit servi li dans paye banne travailleurs ou bien dans l’entretien bureau, organisation, etc… Bizin faire boucou attention!

Talaaq avant et après l'accouchement

Question:

Ene missié fine donne so madame ene talaaq pendant so grossesse. Apres deux trois jours, ça madame-là fine accouché. Apres l’accouchement ça missié-là fine redonne li 2 talaaq. Ki position ça mariage-là d’après shariat ?

Réponse:

Ça madame-là fine en dehors nikah so missié par ene seul talaaq quand li fine accouché. Après l’accouchement li ti nepli so madame. Ça deux talaaq ki missié-là fine donne li, pas fine compté parceki li pas ti so madame. D’après shariat perna aukene lien de nikah entre ça missié et ça madame-là. Mais si zotte oulé, zotte capave refaire nikah et retourne ensemble. Pas bizin faire halalah dans ça cas-là.

Donne Fatwa

Question:

Qui banne critères ene personne bizin ena dans li avant li donne fatwa?

Reponse:

Bizin formation avant faire ene kitchose. Sans formation narien pas vine bon. Sans ene bon formation, ene dimoune pas capave monte ene caoutchouc aussi lors ene jante. Concernant ça travail-là ou capave lire quelque part ki dire : “L’éclatement de pneu peut-être du à un mauvais montage sur la jante. Le montage ou démontage doit être effectué uniquement par des personnes qui ont reçu une formation adéquate.”

C’est ene travail ki normalement dimoune conne li comme ene travail impé grossier. Et ça aussi bizin ene FORMATION ADEQUATE. Sinon, ou ena chance pas retourne la caze jamais. Deen li boucou pli sensible ki ça. Bizin apprane pou conne Deen. Apprane pas veut dire prend ene livre, assizé lire. Apprane veut dire apprane avec banne ki conne Deen et banne ki fine apprane li dans ene façon professionnelle. Sinon, Allah Ta’ala pas ti nécessaire envoye banne Prophètes. Necque ti ena pou dessane livre ki tous dimoune ti capave lire, comprend et mette en pratique.

Astere avant ene dimoune enseigne ceki li fine apprane, ça aussi dimane formation avant enseigné couma bizin. Parceki enseignement li ene kitchose tout à fait différent de apprane.

Donne fatwa ou l’éclaircissement li encore pli sensible. D’abord bizin apprane Tafseer, Hadice, Fiqh, Principe de Tafseer, Principe de Hadice et Principe de Fiqh dans ene façon professionnelle. Et après ça bizin gagne ene formation avec banne professionnelle et experts dans le domaine pendant ene minimum de ene ou deux ans avant ene dimoune formé pou donne fatwa. Li pas permette pou ene dimoune ki pas fine gagne ça formation-là ki li donne fatwa par guette dans livre. Pareil couma ene dimoune ki pas qualifié, li pas gagne droit prescrire l’ordonnance par necque guette dans livre. Si ici ena la mort physique, là-bas ena la mort spirituelle. Bizin faire bien attention parceki quand ene dimoune faire namaz ou cause causé Deen ou bien ki travail dans madrassah ou dans masjid pas veut dire ki li conne Deen ene quantité ki li capave donne fatwa.

Namaz l'heure zawwaal jour jumu'ah

Question:

Est-ce-qui gagne droit faire namaz l'heure zawwaal jour jumu'ah?

Reponse:

Selon ene hadice dans Saheeh Mouslim, rapporté par Hazrat ‘Ouqbah Bin ‘Amir t, Rassouloullah (s.a.w) ti pé empêche pou faire namaz dans trois l’heures :

1.      Au moment ki soleil levé juska ki li monte là-haut.

2.      Au moment ki soleil lors coco juska ki li décliné.

3.      Au moment ki soleil commence couché juska ki li fini couché.

Soleil lors coco veut dire ça point ou bien ça l’heure ki trouve ziste au milieu soleil levé et soleil couché. Ça même ki nou appelle li Istiwaa ou bien zénith. Dans langage commun, dimoune appelle ça zawaal. Mais en réalité appelle li Istiwaa. Et zawaal c’est ça l’heure ki vine après Istiwaa quand li autorisé pou faire namaz. Donc d’après ça hadice-là, ena trois l’heure ki pas gagne droit faire namaz. Ena ene hadice dans Sounan Abou Dawood ki dire ki Rassouloullah (s.a.w) fine empêche pou faire namaz ziste pou ziste dans au milieu la journée excepté jour jum’ah. D’après ça hadice-là, nou trouvé ki en principe pas gagne droit faire namaz quand soleil lors coco mais li permette faire li dans ça l’heure-là jour jum’ah tout seul. Seulement d’après Imam Abou Dawood, ça hadice-là li ene hadice faible. Ena encore lezot hadices ki dire même kitchose mais chaque hadice là-dans ena kit faiblesse. Disons si nou prend tous ça banne hadice faible-là, nou mette ensemble, ça li pou faire ene poids ki capave considère li.

Astere ene coté nou ena ene hadice fort ki empêche faire namaz dans ça l’heure-là et l’autre coté nou ena ene hadice ki pas tellement fort mais ki capave être considéré dans so l’ensemble ki pé autorise faire namaz dans ça l’heure-là jour jum’ah.

Dans ça contexte-là, nou ena deux raisons pou dire ki jour jum’ah aussi pas gagne droit faire namaz dans ça l’heure-là, c’est-à-dire quand soleil li lors coco.

1.      Premièrement à coze ki le hadice pé interdit faire namaz dans ça l’heure-là li saheeh et pli fort.

2.      Deuxièmement d’après principe, quand ena deux différents hadice de même calibre et li difficile pou donne ene priorité lors so camarade, alors le hadice ki empêche faire ene kitchose li ena préférence et priorité lors ene hadice ki autorise li. Donc d’après hadice pli authentique et pli saheeh, pas gagne droit faire namaz dans l’heure ki soleil lors coco ki nou appelle l’heure zawaal, et ça applique pou jour jum’ah aussi. 

Riba ou l'interet

Question:

Qui veut dire l'intérêt?

Est-ce qui ene dimoune gagne droit prend ''loan'' avec la banque?

Réponse:

Quand ou prête ene dimoune Rs 100/- et ou exige li pou retourne ou Rs 110/- par exemple, alors ça surplus-là appelle li riba ou bien l’intérêt et ça transaction-là li ene transaction de riba et l'intérêt. Faire transaction ki implique riba ou l’intérêt li ene transaction haraam. Li tellement grave ki Allah Ta’ala appelle ça déclare la guerre avec Allah ek so Rassoul (s.a.w). Ceki capave arrive ene dimoune dans déclare la guerre avec ene super puissant, boucou plis ki ça ene dimoune capave subir dans faire ene transaction ki implique l’intérêt. Transaction l’intérêt ou consomme l’intérêt li ene de banne péchés pli grave. Li tellement grave ki Rassouloullah (s.a.w) fine maudit ene ki consomme l’intérêt et tous ceux ki contribué et participé dans ene transaction l’intérêt couma ene ki diboute témoin, celui ki prend, celui ki donné, et celui ki rédige contrat zotte tous fine maudit par Rassouloullah (s.a.w). Selon ene hadice, l’intérêt ena 72 degrés de péché. Le degré pli inférieur là-dans li couma dire ene kikene ki fine faire mauvais travail avec so mama.

“Loan” ki dimoune prend avec la banque, ça aussi li ene transaction de l’intérêt parceki li bizin rembourse plis ki ceki li fine prend prêté. Alors bizin faire bien attention. Dans ene hadice, Rassouloullah r fine dire :

“Ene dirham (ene pièce d’argent) de riba ki ene dimoune consommé avec connaissance, li représente ene péché pli grave ki 36 fois commette zina.” 

A noter ki consomme riba pas veut dire mange riba seulement. Li applique pou servi li dans lezot façon aussi. Par exemple dans acheté linge, bijoux, moyen transport ou bien dans servi li dans construire la cage, la salle de bain, toilette, barrage etc. Couma mange la monnaie l’intérêt haraam coumsa même servi li dans ça banne façon-là li haraam. Couma l’intérêt haraam, coumsa même joué le course, joué loterie, lotto, pick pool haraam.

Nou bizin mette dans nou la tête ki dans haraam na perna l’avenir et ni ena bonheur là-dans. Ena necque malheur même là-dans. Dans aakhirat pou ena même malheur. Dans dounia aussi ena boucou malheur.