Hadeeth 20 rakaat taraaweeh et autres questions

Question No 1

Combien rakaats Tarawih éna ?

Réponse No 1

Tarawih éna 20 rakaats. Selon ène hadith rapporté par Hazrat Abdoullah Bin Abbas (r.a), Rassouloullah (s.a.w) ti pé faire 20 rakaats plus Witr dans le mois de Ramadwan.

(Al-Bayhaqi/Mouswannaf Bin Abou Shaibah/Tibrani)

Question No 2

Ena ki dire ki ça hadith-là li faible. C’est parceki éna ène Rawi (narrateur) nommé Ibraheem Bin Ousman dans so Sanad ki faible selon banne savants.

Réponse No 2

Ou éna parfaitement raison ki le hadith li faible acoze présence Ibraheem Bin Ousman dans so Sanad. Mais ène l’autre principe ki dire ki ène hadith faible capave être considéré si so contenu li appuyé et supporté par la pratique de banne Sahaba-E-Kiraam et banne Tabeines. Le cas de ça hadith-là aussi li pareil. Li appuyé par la pratique de banne Sahaba-E-Kiraam. Hazrat Saa-ib Bin Yazeed fine dire :
“Zotte (banne Sahaba) ti pé faire 20 rakaats dans le mois de Ramadwan à l’époque Hazrat ‘Oumar (r.a).” (Al Bayhaqi)

Hazrat Yazeed Bin Roumaan fine dire : “Banne dans l’époque Hazrat ‘Oumar (r.a) ti pé faire 23 (20 Tarawih + 3 Witr) rakaats dans Ramadwan.” (Al Bayhaqi)
Hazrat Abou Abdour-Rahman As-Salami et Hazrat Aboul Hasanaa fine dire :
“Hazrat Ali (r.a) ti ordonne ène personne pou faire banne dimounes accomplir cinq Tarweeha - c'est-à-dire 20 rakaats.” (Al Bayhaqi)

N.B Ene Tarweeha c’est 4 rakaats. 5 Tarweeha faire 20 rakaats.

“Hazrat Abdoullah Bin Mas’oud (r.a) ti pé faire 20 rakaats et 3 rakaats Witr. (Oumdatoul-Qari - commentaire lors Boukhari par Allaamah Badrouddeen Al Ayni)

C’est à coze ki la pratique de banne Sahaba-E-Kiraam ti de 20 rakaats Tarawih, d’après le principe établi par banne savants de hadith, capave considère le hadith de Hazrat Abdoullah Bin Abbas (r.a). Dans ène situation pareille ène hadith faible aussi renforci et vine fort.

Question No 3

Eski li nécessaire faire Tarawih avec jama’at ?

Réponse No 3

Rassouloullah (s.a.w) finne faire li avec jama’at pendant trois jours dans Ramadwan. Dans l’époque Rassouloullah (s.a.w) même, ène ti groupe de Sahaba-E-Kiraam ti pé faire li avec jama’at ène coté dans masjid ki Rassouloullah (s.a.w) finne approuvé. Dans l’époque Hazrat ‘Oumar (r.a) aussi ti éna plusieurs groupes ki ti pé faire namaz Tarawih en plusieurs jama’ats ki plutard Hazrat ‘Oumar (r.a) finne rassemblé zotte en ène seul jama’at derrière ène seul Imam. Hazrat Ousman (r.a) et Hazrat Ali (r.a) finne organise namaz Tarawih avec jama’at dans zotte règne respectif. Après zotte banne Tabeines aussi finne acomplir li avec jama’at. Tout sala suffit pou montré ki namaz Tarawih avec jama’at li Sounnat. Mais étant donné ki ti éna ène parti dans ça banne l’époque-là ki pas ti pé participé dans jama’at et ça pas finne désapprouvé par kiken, li faire nou comprend ki li ène Sounnat ki pas appliqué lors chaque individu.

Ene Sounnat pareil appelle Sounnat alal Kifaya. Donc Tarawih li Sounnat Mouakkadah lors chaque individu mais faire li avec jama’at li Sounnat alal Kifayah. C'est-à-dire dans chaque localité bizin éna ène groupe de personne ki accomplir li en jama’at dans masjid afin ki chaque individu dans ça localité-là li acquitté de so responsabilité. Sinon chaque individu pou responsable et coupable d’avoir néglige ène Sounnat.

Question No 4

Eski Tarawih li Sounnat pou banne madames aussi ?

Réponse No 4

Oui, Tarawih li Sounnat pou banne madames aussi.

Question No 5

Eski gagne droit faire namaz tarawih derrière ene Hafiz sahab ki pas garde la barbe ou bien ene Hafiz sahab ki garde la barbe moins ki ene poignet?

Réponse No 5

Faire ene fois Khatmoul-Qur’aan dans namaz tarawih li sounnat. Mais bizin faire li derrière ene Imam ou bien ene Hafiz sahab ki sérieux et bien dans Deen au moins par so l’apparence. Ene Hafiz sahab ki (a) pas garde la barbe et ki habitué rase so la barbe ou bien (b) ki habitué garde la barbe temporairement juste pou namaz tarawih dans Ramadwaan ou bien (c) ki garde la barbe moins ki ene poignet, li ene faasiq d’après Shariat. Pas gagne droit fixé ene hafiz pareil pou faire Imam ni dans faraz ni dans tarawih. La direction de masjid ki autorise ene Imam coumsa diboute lors Mouswallah, zotte pou coupable divant Allah Ta’ala pou avoir néglige zotte responsabilité. Ene hafiz pareil li pas gagne droit faire Imamat ni banne mouswalli gagne droit faire namaz derrière li. Vaut mieux faire tarawih avec banne tipti Sourah ki faire Khatmoul Qur’aan derrière ene Imam ou ene Hafiz pareil.

La lune Ramadwan

Question

Couma établir la visibilité de la lune pou Ramadwan ?

Reponse.

1. Après le 29ème jour de Sha’baan, si le temps claire et pérna nuage dans l’horizon cote supposé trouve la lune, alors bizin ène bon nombre de personnes témoigne la visibilité la lune pou capave proclame la fin de Sha’baan et le commencement de Ramadwan. Dans ce cas, témoignage ène ou deux personnes pas suffit.

2. Mais si le temps li sombreux et nuageux ki empêche la visibilité la lune, alors lors témoignage ène personne ki bien dans Deen, capave proclame le commencement de Ramadwan et la fin de Sha’baan. Ça ène personne bien dans Deen-là capave ène missié couma li capave ène madame aussi.

3. Si le jour après le 29ème de Sha’baan pas fine trouve la lune, alors bizin attane encore ène jour pou faire le mois vine de 30 jours. Après le 30ème jour de Sha’baan, automatiquement le mois de Ramadwan pou commencé.

20 raka'at taraaweeh

Question

Banne salafi dire ki li sunnah pou faire zisse 8 rakaat taraaweeh, est-ce ki li correk?

Reponse.

Salaf c’est banne Sahaba-e-Kiraam, banne Tabeines et banne Taba-Tabeines. Etre Salafi veut dire suive les principes de banne ki ti dans ça trois l’époque-là. Nou tous conné ki banne Sahaba-e-Kiraam fine tombe d’accord lors 20 rakaat taraweeh et ça fine continué être pratiqué dans l’époque Tabeines et Taba-Tabeines. Astere si ene dimoune declare li ene Salafi sans ki li accepté 20 rakaat Taraweeh, ça li pou paraite bien étonnant. Ça nom Salafi-là pas alle avec li. C’est ene fausse prétention. Ou capave appelle ou n’importe quoi. Si ou fine tourne ou le dos avec banne principes ki ti en vigueur dans ça trois l’époque-là, ça sufi pou disqualifié ou comme ene bon musulman. Après ça ki salafi ou pou été! A moins si d'après ou, salafi signifié ene ki pas ene bon musulman.