Autant ki nou conné, nou pas conne kikene ki dire ki pas gagne droit faire jum'ah ça jour-là. Li vrai ki ena ene ti groupuscule ki dire ki capave pas faire jum'ah ça jour-là. Mais selon la grande majorité, li pas permette pou néglige ou abandonne jum'ah parceki l'obligation de jum'ah li prouvé par banne preuves authentiques et catégorique depi dans Qour'aan et dans Hadice. Ene pratique ki prouvé par banne preuve de ene tel calibre, pas capave néglige li lors la base banne simple hadice ambigu.
Ena banne hadice ki donne l'impression ki ça ti permette et ki Rassouloullah (s.a.w) fine autorise pas faire li. Mais à la lumière banne hadice pli détaillé, ça ti adressé à ene certaine catégorie dimoune. Li pas ti adressé à tous banne dimoune. D'ailleurs d'après hadice, Nabi (s.a.w) ti faire namaz jum'ah jour jum'ah avec banne habitants de Madina. D'après ene hadice ki trouve dans Abou Dawoud et Ibn Maajah, Rassouloullah (s.a.w) ti dire:
"Zordi deux Eid fine tombe ensemble. Si kikene oulé ça (namaz Eid) la, li capave dispense li de namaz jum'ah. Mais nou, de toute façon nou pou faire Jum'ah. "
Quand Nabi (s.a.w) fine dire "Nous" ça signifié Nabi (s.a.w) et banne habitant de Madina. Donc ça prouvé ki Nabi (s.a.w) et banne habitants dans Madina ti faire namaz Jum'ah. Ça montré ki l'autorisation pou pas faire Jum'ah ti adressé à ene l'autre catégorie de personne. C'était banne dimoune ki ti pé habite en dehors Madinah et ki ti pé vine faire namaz Eid et namaz Jum'ah malgré ki ça pas ti obligatoire lors zotte. Quand Eid fine tombe dans jour Jum'ah, zotte fine bizin vine bonheur gramatin pou capave faire namaz Eid. Après namaz Eid, zotte ti ena deux choix. Soit zotte reste attane ziska namaz Jum'ah ou bien zotte alle zotte la caze et retourne Madinah pli tard pou namaz Jum'ah. Dans tous les deux façons, zotte ti ena ene certaine difficulté. Alors pou facilite zotte tache, Nabi (s.a.w) ti lance ça l'appel-là ki celui ki oulé attane, li capave attane mais celui ki oulé retourné, li capave alle so la caze. C'est ça catégorie de personne-là ki ti concerné par ça annonce-là. D'ailleurs namaz Jum'ah même pas ti obligatoire lors zotte acoze ki zotte ti pé habite dans la campagne retiré en dehors Madinah. A Maurice, nou perna ça catégorie de personne-là.
Donc bizin faire Jum'ah, même si Eid aussi tombe dans jour Jum'ah.
