Question:
Eski li sunnah pou faire witr avec ene seul rakaat?
Answer:
Concernant
faire ene seul rakaat witr nou ena banne Sahaba-e-Kiraam couma Hazrat Usmaan t,
Hazrat Abdullah Bin 'Oumar t, Hazrat Sa'ad t et
Hazrat Mou’aawiyah t ki fine pratique ça. Mais faire witr dans ça
façon-là fine toujours contesté dans zotte l’époque même par le zotte
Sahaba-e-Kiraam. Ça montré ki la façon de faire witr ki ti en vigueur en
général sans contestation dans l’époque banne Sahaba, c’était la pratique de 3
rakaat avec salaam dans seulement troisième rakaat. C’est pou ça ki la pratique
de ene rakaat witr séparément ti pé paraite étrange dans ça l’époque-là ki fine
donne l’occasion à banne remarque ki banne Sahaba-e-Kiraam fine faire de temps
à autre quand zotte fine juge li nécessaire.
Hadice Hazrat Abdullah Bin Abbaas
"عن عكرمة انه قال كنت مع ابن عباس عند معاوية نتحدث حتى ذهب
هزيع من الليل فقام معاوية فركع ركعة واحدة فقال ابن عباس من اين ترى اخذها"
(معانى الآثار للطحاوى)
Traduction:-
Rapporté par
Ikraamah ki fine dire:
Mo ti
ensemble avec (Hazrat Abdullah) Bin Abbaas (t) à cote (Hazrat) Mou’aawiyah
(t). Nou ti pé cause causé juska ene bon parti la nuit fine
traversé. (Hazrat) Mou’aawiyah (t) fine dibouté et fine faire ene
seule rakaat. Lors ça Hazrat Abdullah Bin Abbaas t fine dire:
“Depi cote ça to pensé, li fine tire ça?”.
(Ma-aanil-
Athaar de At Tahaawi)
Position
hadice:-
Ça hadice-là
fine rapporté par deux sanad (chaîne de narration) dans le معانى
الآثار (Ma-aanil- Athaar) de Allaamah
At-Tahaawi. Banne narrateurs ki trouve dans le deuxième sanad, zotte tous zotte
banne narrateurs très connu et banne narrateurs solides. Donc ça hadice-là avec
so deuxième sanad li Saheeh (authentique).
Explication:-
Nous ena deux
hadices ki montré deux différent l’attitude Hazrat Abdullah Bin Abbaas t concernant
la pratique de ene seule rakaat witr séparément. Selon ene hadice ki trouve
dans Boukhari Shareef, li paraite ki Hazrat Abdullah Bin Abbaas t ti
approuve Hazrat Mou’aawiyah t dans la pratique de ene seule
rakaat witr. Mais li vrai ki le hadice dans Boukhari capave être interprété
dans l’autre façon aussi. Li na pas nécessairement signifié ki li fine
approuvé. Tandis ki le hadice dans Tahaawi, li na pas laisse aukene doute ki
Hazrat Abdullah Bin Abbaas t pas fine d’accord avec Hazrat
Mou’aawiyah t dans faire ene seule rakaat witr. So déclaration : “Depi cote ça to
pensé li fine tire ça” li assez claire pou montré ki Hazrat Abdullah Bin
Abbaas t ti désapprouve la pratique de ene seul rakaat witr.
Quant à hadice
dans Boukhari, li pas nette et clair ki Hazrat Abdullah Bin Abbaas t fine
approuve ene rakaat witr pratiqué par Hazrat Mou’aawiyah t. Au contraire le fait ki
ene so zélève fine rapporte la pratique faire ene seule rakaat witr avec
l’étonnement, montré ki la pratique faire witr dans ene telle façon pas ti en
vigueur dans ça l’époque-là. La pratique en vigueur en général ti 3 rakaat
witr. Apart ça li montré ki la pratique de Hazrat Abdullah Bin Abbaas t
c’était de 3 rakaat witr ki ti en vigueur dans ça l’époque-là et ceki ti
témoigné par so banne zélèves. Et c’est ça même ki fine provoque zotte
l’étonnement quand zotte fine trouve Hazrat Mou’aawiyah t pratique ene seule
rakaat witr.
Hadice Hazrat Abdullah Bin Mas’oud t:-
"عن ابراهيم قال بلغ ابن مسعود
ان سعدا يوتر بركعة فقال ما اجزأت ركعة قط" (الطبرانى)
Traduction:- Rapporté
par Ibraheem ki fine dire ki Hazrat Abdullah Bin Mas’oud t
fine gagne l’information ki Hazrat Sa’ad li faire ene rakaat witr. Alors li
fine dire: “Jamais ene rakaat ti suffit”. (Tibrani)
Position
hadice: Ibraheem An-Nakhï fine rapporte ça de Hazrat Abdullah Bin Mas’oud t. Mais
tout conné ki Ibraheem Nakhï pas fine joine Hazrat Abdullah Bin Mas’oud t. Donc
li pas fine capave tanne ça directement avec li. Bizin ena ene connexion entre
Hazrat Ibrahim (rahmatoullahi alayh) et Hazrat Abdullah Bin Mas’oud t ki
manqué ki connecté Hazrat Ibraheem avec Hazrat Abdullah Bin Mas’oud t. Ene hadice
avec ene Sanad ki ena ene connexion pareille manqué appelle ene hadice منقطع (Mounqati)
dans langage banne savants de hadice. En principe ene hadice منقطع li
considéré comme ene hadice faible. Si nou suive ça principe- là, nou pou bizin
qualifié ça hadice-là de ene hadice ضعيف (faible). Mais ena ene l’autre
facteur aussi à considéré ici en ceki concerne banne hadices ki Hazrat Ibraheem
Nakhï rapporté directement de Hazrat Abdullah Bin Mas’oud t sans mentionne le
contacte et le lien entre li et Hazrat Abdullah Bin Mas’oud t. Quand
nou considère ça facteur-là nou pou arrivé trouver avec l’étonnement ki le
hadice ki le contacte entre Hazrat Ibrahim Nakhï et Hazrat Abdullah Bin Mas’oud
t pas mentionné dans so sanad li pli solide et pli authentique ki le hadice à
cote ça mentionné dans so sanad. C’est parceki Ibrahim Nakhï ena l’habitude pas
mentionne la liaison et le contacte entre li et Hazrat Abdullah Bin Mas’oud t quand
li tanne le hadice avec Hazrat Abdullah Bin Mas’oud t à travers ene quantité
dimounes.
Par contre
quand li tanne ça à travers ene seule Rawi (narrateur) li prend la peine
mentionne le nom de ça narrateur-là. Donc normalement le hadice ki li fine
tendé à travers plusieurs narrateurs pou ena pli beaucoup poids ki ene hadice
ki li fine tendé à travers ene seul narrateur. C’est dans ça façon-là ki le
hadice à cote li pas mentionne le lien entre li et Hazrat Abdullah Bin Mas’oud t dans
so Sanad, li ene hadice bien solide malgré ki de l’apparence li ene hadice منقطع (Mounqati’).
Donc perna doute ki ça hadice-là li ene hadice solide, fort et authentique. A
noter ki ça hadice-là fine rapporté dans le Mou’atta de Imaam Mouhammad
(rahamtoullahi alayh) et dans le معانى الآثار (Ma-aanil-Athaar) de Allaamah At-Tahaawi aussi.
Explication:-
Selon ça hadice-là
nou trouvé ki Hazrat Abdullah Bin Mas’oud t fine désapprouve la
pratique de ene rakaat witr. Selon li, ene seul rakaat namaz pas compté. Et ça
li appliqué pou toute sorte namaz, y compris namaz witr aussi.
Selon ene récit
de Mouhammad Bin Seerine, Hazrat Abdullah Bin Mas’oud t ti faire ene rakaat
witr. Mais ceki Mouhammad Bin Seerine fine rapporté, pas capave considère li pou
plusieurs raisons.
1.
D’abord parceki Ibrahim An-Nakhï
li conne la pratique de Abdullah Bin Mas’oud t pli bien ki Mouhammad
Bin Seerine. Donc ça donne préférence à ceki Ibrahim An-Nakhï fine rapporté.
2.
Deuxièmement ceki Mouhammad Bin
Seerine fine rapporté c’est la pratique de Abdullah Bin Mas’oud t ki
capave être interpréter dans différent façon. Par contre ceki Imaam An-Nakhï
fine rapporté c’est ene déclaration ki bien nette et clair dans so sens.
Automatiquement ceki nette et clair pou ena préférence lors ene kikchose ki
ambiguë, flou et vague.
3.
Et troisièmement, quand ena
contradiction entre ene déclaration et ene pratique, en principe c’est la
déclaration ki ena priorité et préférence lors la pratique. Donc la déclaration
de Hazrat Abdullah Bin Mas’oud t ki Ibrahim Nakhï fine rapporté
ki pou être considéré au lieu so pratique ki Mouhammad Bin Seerine fine
rapporté.
Quant à la
pratique de Hazrat Sa’ad t ki Hazrat Abdullah Bin Mas’oud t fine
désapprouvé, li paraite ki li ti faire li couma Hazrat Abdullah Bin ‘Oumar t ti pé
pratiqué. C’est à dire la pratique de faire salaam lors deuxième rakaat et
ensuite faire ene rakaat. Nou ena ene hadice avec ene Sanad (chaîne de
narration) solide rapporté dans معانى الآثار de Allaamah
At-Tahaawi ki confirme ça thèse-là.
Selon ça version-là, Amir dire ki la famille de Sa’ad et la famille de Hazrat
Abdullah Bin ‘Oumar t ti pé faire salaam lors deuxième rakaat de witr
et (ensuite) zotte ti pé faire ene rakaat witr. Ça donne raison à banne ki dire
ki Hazrat Sa’ad t pas ti pé pratique ene seule rakaat. Li ti pé faire trois rakaat witr mais
en deux volets. C’est à dire d’abord 2 rakaat et ensuite ene rakaat séparé.
C’est parceki la famille de Sa’ad ti pé pratique li dans ça façon-là et li très
probable ki zotte fine bizin prend ça avec Hazrat Sa’ad t. Li bon conné ki la
façon de faire witr en deux volets ki rapporté par Hazrat Abdullah Bin ‘Oumar t li
contesté par ceki Hazrat Ubayy Bin Kaab t, Hazrat Aisha t,
Hazrat Anas t et Hazrat Abdullah Bin Mas’oud t fine rapporté. C’est à dire la
pratique de faire 3 rakaat witr en ene seul volet sans faire salaam au milieu
lors deuxième rakaat. Acoze ça, la façon de faire witr pratiqué par Hazrat Sa’ad
t ou Hazrat Abdullah Bin ‘Oumar t pas capave être considéré comme
ene pratique solide.
Coumsa même
selon ene hadice dans معانى الآثار de
At-Tahaawi, Hazrat Abdur Rahmaah At-Taimi t fine étonné quand ti
fine trouve Hazrat Usmaan t ti faire ene seul rakaat witr. Ça
aussi montré ki la pratique de faire ene rakaat witr pas ti ene pratique
habituelle et normale. La pratique normale ki ti en vigueur c’était 3 rakaat
avec ene seule salaam. C’est à coze de ça tous ceux ki fine pratique li
autrement fine être contesté par zotte camarade. C’est ça meme fine provoque
l’ettonement de Hazrat Abdur Rahmaah At-Taimi t.
Hadice Hazrat Abou Saïd Al-Khudri t
"ان رسول الله r نهى عن البتيراء ان يصلى الرجل واحدة
يوتر بها"
(اخرجه ابو عمر بن عبد البر فى التمهيد)
Traduction :
“Certainement
Rasouloullah r fine interdit Al-Boutayraa
(c'est-à-dire) ki ene dimoune faire ene seul rakaat pou faire witr avec ça”.
(Abou ‘Oumar
Bin Abdul Barr fine rapporte ça dans At-Tamheed)
Note :
Al Hafiz Abou
‘Oumar Bin Abdul Barr ti ene célèbre savant de hadice et de fiqh ki fine vécu
entre 368 H à 463 H. At-Tamheed c’est ene de so banne livres ki li fine écrire
pou commente le Mou’atta de Imam Malik (rahmatoullahi alayh).
Position
hadice :
Ibnul Qattaan
fine mette en question ene banne narrateurs ki trouve dans sanad ça hadice-là.
Li dire ki ça hadice-là li ene hadice شاذ (isolé/étrange) ki pas capave être considéré tanque pas conne
l’intégrité et l’authenticité banne narrateurs. Allaamah Ibn Hajar Al-Asqalaani
dire ki par cela Ibnul Qattaan fine signifié seulement ene Rawi nommé Usmaan
Bin Muhammad parceki le reste banne Rawi zotte crédible et authentique, couma
li possible ki Ibnul Qattaan pas fine au courant avec la position de kit Rawi
dans ça banne-là. Donc apart Usmaan Bin Mouhammad, tous banne narrateurs dans
Sanad ça hadice-là zotte authentique.
A ce stade li bon conné
ki Usmaan Bin Mouhammad ti ene contemporain de Imam Malik (rahmatoullahi alayh).
De ce fait banne ki ti capave cause kikchose lors li c’est banne savants de
hadice d’auparavant couma Yahya Bin Ma-ïne, Ibnul Madeeni, Yahya Bin Saïd Al-Qattaan
et Ibn Mahdi. Mais selon Allaamah An-Neemawi, personne parmi ça banne-là pas
fine dire kikchose lors li ni fine critique li apart العقيلى (Al-Uqaili). Banne ki fine vine après, couma Ibnul-Qattaan et
Abdul-Haqq, zotte fine mette li en question par suive Al-Uqaili. Acoze ça,
critique ki Al-Uqaili fine faire à l’égard Usmaan Bin Mouhammad, li ene
critique simple et léger ki pas faire poids. Donc li pas ene Rawi (narrateur)
ki fine rejeté. Selon le fathul-Moulhim de Allaamah Shabbir Al-Uthmaani,
Allaamah Sheikh Anwar Kashmiri (R) fine dire : Al Haakim fine rapporte le
hadice "لا
ضرر ولا ضرار" dans le chapitre de
transaction. Dans sanad ça hadice-là, ena le rawi Uthmaan Bin Mouhammad.
Al-Haakim et Az-Zahabi, tous les deux fine declare ça hadice-là authentique. Ça
aussi ene de banne raison pou dire ki perna narien ki pas bon avec le rawi
Uhmaan Bin Mouhammad. Donc so hadice aussi pas capave rejeté. Et surtout quand
le hadice ki li fine rapporté li appuyé par ene hadice rapporté dans le même
sens par Hazrat Abdullah Bin Mas’oud t.
Selon le principe, ene
hadice ki so contenu li appuyé et approuvé par ene l’autre hadice ou par banne
déclarations de banne Sahaaba-e-Kiraam, li vine ene hadice Hassan ki capave
être considéré et servi comme ene preuve et ene argument. Le hadice de Hazrat
Abou Saïd Al-Khudri li satisfaire ça critère-là. Donc ça faire li vine au moins
ene hadice Hassan.
Explication:- بتيراء (Boutayraa) c’est le diminutif de بتراء (Batraa). Et بتراء c’est le féminin de ابتر (Abtar). Ça signifié ene kikchose ki ena manquement et ene
kikchose ki incomplète. Dans le hadice Rasouloullah r fine interdit so ‘Oummat
de Boutayraa ki signifié faire seulement ene rakaat witr. Parceki ene rakaat
namaz, li pas ene namaz complete. Li ene namaz ki ena manquement. Ça montré ki
ene rakaat namaz witr pas existé.
Hadice
Mouhammad Bin Kaab
"ان
النبى r نهى عن البتيراء"
Traduction:-
“Nabi r fine empêché de Boutayraa.”
Position hadice:-
Al-Iraqui fine qualifié
ça hadice-là de ضعيف (faible) et مرسل (moursal). Allaamah An-Nawawi aussi fine qualifié ça hadice-là
de ene hadice faible. Acoze ça li paraite ki pas capave servi li comme ene
argument et ene preuve.
مرسل c’est ene hadice ki ene tabeï
rapporte li directement avec Rasouloullah r sans mentionne le lien
entre li et Rasouloullah r. Le lien entre ene tabeï et
Rasouloullah r dans la plupart du cas c’est ene Sahabi. Donc ene hadice ki rapporté avec
ene sanad ki le Sahabi pas fine mentionné là-dans reconnaite comme ene hadice
Moursal dans langage banne savants de hadice. Et parfois, ena possibilité ki
ensemble avec ene Sahabi, ene l’autre personne ena dans le sanad ki pas fine
mentionne li. C’est à coze ça possibilité-là, ena banne ‘Oulama ki considere li
faible. Si nou prend en consideration le fait ki ene rawi pareil, li ene rawi
dans Khairul Qouroune ki beneficié le temoignage de Khairul Bashar (meilleur
Insaan) c'est-à-dire Rasouloullah r concernant so l’integrité et so
l’authenticité, ça donne nou parfaitement raison considere ene hadice pareil
couma ene hadice authentique juska preuve du contraire.
Apart ça nou ena ene
l’autre facteur aussi ki bizin prend en considération. C’est à dire le contenu
de ça hadice-là li approuvé et confirmé par le hadice de Hazrat Abou Saïd Al
Khudri t et la déclaration de Hazrat Abdullah Bin Mas’oud t. Donc li vine ene hadice
Hassan (bon) ki capave servi couma ene preuve d’après le principe ki dire:
"والحديث الضعيف اذا تعددت طرقه ولو طريقا واحدة اخرى
ارتقى بمجموع ذلك الى درجة الحسن وكان محتجابه"
Quand ene hadice faible
li ena plis ki ene Sanad, quand même li ene seule Sanad, alors dans so
l’ensemble li monte dans rang ene hadice Hassan et ça capave servi comme ene حجة (argument/
preuve).
Ça raisonnement ki dire ki
ene hadice faible li vine ene hadice assez fort pou capave être servi comme ene
preuve, c’est ene raisonnement ki presque tous banne Mouhaddiceen (savants de
hadices) et banne Fouqaha (juristes) fine adopté dans tous banne l’époque. Ça
veut dire ki ça hadice-là li bizin être ene hadice authentique selon banne
principes etablis par tous banne Mouhaddiceen (savants de hadices) et banne
Fouqaha (juristes) de tous l’époque.
Explication:-
Boutayra signifié ene
kitchose chose incomplète. Dans le hadice fine appelle ene rakaat namaz
Boutayraa parceki li ene namaz incomplète ki Rasouloullah r fine interdit. Ça
signifié ki pas gagne droit faire ziste ene seule rakaat namaz. Le nombre
minimum de rakaat ki ene namaz bizin ena c’est deux rakaat couma Rasouloullah r fine
faire ressortir :
"الصلاة مثنى مثنى تشهد فى كل ركعتين ..." (رواه
الترمذى)
“Namaz li deux deux
rakaats. Faire tashah-houd dans chaque deux rakaats …”. (Tirmizi)
Donc salaat-ul-witr aussi
pou gouverné par le principe ki fine mentionné dans ça hadice-là.
Alors pas
capave ena ene seule rakaat dans witr.
