Eski empeché faire trois rakaat witr ?

Question:

Eski li empecher pour faire 3 rakaat dans namaz witr?

Reponse:

Hadice Hazrat Abou Hourairah t

"لا توتروا بثلاث اوتروا بخمس او سبع ولا تشبهوا بصلاة المغرب" (الدارقطنى والحاكم والبيهقى)

Traduction :

“Pas faire trois rakaat witr. Faire cinq rakaat witr ou bien sept rakaat. Et (dans faire witr) pas faire li ressemblé avec namaz maghrib” (Ad-Darqutni/ Al-Hakim/ Al-Baihaqui)

Position hadice :

Selon Al Hafiz العراقى (Al-Iraaqui) decedé en 806 H, le sanad de ça hadice-là li ene sanad authentique. Donc le hadice li ene hadice authentique.

Explication :

5 rakaat witr signifié 2 rakaat nafil + 3 rakaat witr coumsa même sept rakaat witr signifié 4 rakaat nafil + 3 rakaat witr. Namaz nafil ki faire dans la nuit appelle li salaat-ul witr aussi parceki li ene parti pli important dans tahajjud ou salaat-ul-lail. Et li tout à fait normal pou appelle ene kitchose par ene parti ki pli important là-dans. Selon ene hadice rapporté par Hazrat Aisha t, Rasouloullouah r ti pé faire treize rakaat witr. Pou explique ça, Imaam Tirmizi dire :

"انما معناه انه كان يصلى من الليل ثلاث عشرة ركعة مع الوتر فنسبت صلاة الليل الى الوتر"

« So signification c’est ki Rasouloullah r ti pé faire treize rakaat ensemble avec witr dans la nuit. Alors li fine appelle Salaat-ul-lail, Salaat-ul-witr. »

Et pli devant pou prouve so these, li amene hadice cotte Rasouloullah r fine dire :

"اوتروا يا اهل القرآن"

« Accomplir witr O partisan de Qour’aan. »

Li dire : "انما عنى به قيام الليل"

Li (Rasouloullah r) fine signifié par cela (witr), Qiyaam-ul-lail (namaz ki faire dans la nuit).

Selon ceki Imaam Tirmizi fine expliqué, ena des fois hadice cause salaat-ul-witr mais ça signifié l’ensemble de tahajjud et witr. Li pas signifié seulement witr. Donc dans ça même sens fine appelle ça 5 rakaat-là ou bien ça 7 rakaat-là, witr. Rasouloullah r fine pratique salaaat-ul-lail dans ça même façon. C'est-à-dire li ti ena l’habitude faire deux ou quatre rakaat nafil ou plis ki ça aussi avant li faire so witr. Donc faire witr sans faire namaz nafil avant li, ça li ene façon indésirable pou accomplir salaat-ul witr. Alors "ا وتروا بخمس او سبع" (Faire 5 rakaat witr ou bien sept rakaat) pé montré la façon désirable et recommandé pou salaat-ul witr. C'est-à-dire par ça, Rasouloullah r pé recommande pou faire deux rakaat ou bien 4 rakaat nafil avant salaat-ul witr.

Et ceki Rasouloullah r fine empêché par لا توتروا بثلاث (pas faire trois rakaat witr) li applique lors faire trois rakaat witr sans faire quelque rakaat nafil avant ça. C'est-à-dire d’après ça principe-là, li déconseillé et li pas bon ou bien ene façon indesirable pou ene dimoune li contente li avec faire seulement trois rakaat witr comme salaat-ul-lail. Li recommandé ki li faire deux rakaat ou 4 rakaat nafil ou plis ki ça avant li faire so witr afin ki so witr pas ressemblé namaz maghrib ki perna narien comme nafil à faire avant ça.

Li pas correcte servi ça hadice-là pou dire ki pas gagne droit faire 3 rakaat witr. Et ki manière li possible pou prétende ene kitchose pareille quand ça fine toujours existé dans la pratique Rasouloullah r ki fine etre rapporté et  pratiqué par ene bon nombre de banne Sahaba-e-Kiraam ? Après banne Sahaba-e-Kiraam, ça fine pratiqué par banne Tabeïnes et approuvé par les 7 fouqaha (juristes) de Madina. Et finalement, Hazrat ‘Oumar Bin Abdul Azize (rahmatoullahi alayh) fine établi faire trois rakaat witr comme ene principe. Tous ça-là montré ki "لا توتروا بثلاث" (pas faire trois rakaat witr) pas pé empêche faire trois rakaat mais li pé empêche faire li dans ene façon particuliere. Et ça façon particuliere ki empêché-là, c’est faire witr sans faire nafil avant li. Ça li confirmé par ene hadice de Hazrat Abdullah Bin Abbaas t cote li dire :

"الوتر سبع او خمس ولا نحب ثلثا بتراء" (معانى الآثار للطحاوى/محمد بن نصر)

“Witr c’est sept rakaat ou bien 5 rakaat. Nou pas apprecié 3 rakaat  ki “Batraa” (incomplète)” (Ma-anil Athaar par At-Tahaawi/Mouhammad Bin Nasr)

Dans ça hadice-là fine montré la meilleure façon pou faire witr. C'est-à-dire accomplir li dans ene façon ki ena 2 ou 4 rakaat nafil avant li. Le 3 rakaat witr ki fine qualifié de incomplète, ça signifié ça witr ki perna nafil avant li.

Selon Ma-anil Athaar de At-Tahaawi, Hazrat Aïsha t aussi fine rapporte la même chose ki Hazrat Abdullah Bin Abbaas t fine rapporté.

Ki veut dire 3 rakaat witr “Batraa” (incomplète)”?

Selon ene hadice de Mouswannaf Ibn Abou Shaïbah, Hazrat Aisha t dire :

"لا توتر بثلاث بتراء صل قبلها ركعتين او اربعا" (مصنف ابن ابى شيبة)

“Pas faire witr 3 rakaat dans ene façon incomplète. Faire deux ou quatre rakaat avant ça.”

Ça définition de “Batraa” (incomplète)” ki Hazrat Aisha t fine donné, li nette et clair ki pas le nombre de trois rakaat witr ki incomplète et ki déconseillé ou empêché, mais c’est la façon ou la manière pou faire li sans faire nafil avant ça ki empêché ou déconseillé.

A cet stade, li interressant pou remarqué ki ça hadice-là si prend li dans so sens literale, li pas pou dans faveur aukene tendance. Parceki ceki ti pé recommandé, li pas d’apres aukene tendance. C'est-à-dire li pé recommandé pou faire 5 ou 7 rakaat witr ki personne pas dire ça. Et couma li paraite ki pas gagne droit faire 3 rakaat witr, coumsa meme nou capave deduire ki pas gagne droit faire ene seule rakaat witr aussi. Parceki la façon ordonné c’est 5 ou 7 rakaat witr. Donc ça na pas capave servi comme ene preuve contre trois rakaat witr de la part banne ki pratique ene seule rakaat witr.

Ça montré ki l’interpretation pli correcte et plausible c’est de dire ki ene façon particulier pou faire trois rakaat witr ki fine deconseillé, pas trois rakaat ki fine empeché.