Question :
Ena ene hadice selon lequel Nabi (s.a.w) fine dire ki celui ki quitte namaz Assar, alors so action li annulé. Couma ou explique ça ?
Reponse :
C’est ene hadice ki trouve dans Sahih Boukhari et lezot livres de hadice. Pou commencer li bon conné ki namaz Assar li ene namaz ki ena ene ti peu valeur plis ki lezot namaz à tel point ki Qour’aan-e-Kareem fine faire ene mention spécial de ça dans le verset 238 de Sourah Al-Baqarah. Coumsa même selon ene hadice ki trouve dans Sahih Boukhari même, Nabi (s.a.w) fine compare ene personne ki fine manque so namaz Assar couma ene dernier misérable ki fine perdi so la famille et so du bien. Donc tout ça-là li là pou montré grande l’importance ki Shariah fine attaché avec namaz Assar. Et c’est probablement acoze ki c’était ene l’heure cote dimoune ti pé occupé dans zotte commerce dans ça l’époque-là. Donc ti ena ene risque bien fort ki dimoune capave faire négligence. Alors Nabi (s.a.w) fine attire zotte l’attention pou zotte capave prend zotte précaution pou pas ratte li.
Maintenant nou vine à ou question. Li bon conné ki personne pas fine applique le hadice ki ou fine cité dans le sens direct couma li été dans le texte. Parceki ça li pou implique ki ene personne ki fine quitte namaz Assar par oubli ou par ene l’autre raison valable, li aussi li inclus dans ça avertissement-là. Mais li pas coumsa. Banne ‘Oulama fine applique ça lors banne ki faire ça dans ene façon délibéré et avec connaissance. Et zotte fine interprète li ainsi, à la lumière de banne principes établis dans shariah. Coumsa même zotte pas fine prend "action annulé" dans so sens direct couma li été. Sinon ça li pou ena ene longue implication. Acoze ça banne ‘Oulama dire ki ça signifié ki la personne li encaisse ene très grande perte ki capave égal à ene personne ki so banne actions fine annulé. Zotte fine bizin prend li dans ça façon-là parceki dans prend li couma li été, ti pou nécessite surpasse ene quantité principes. Vaut mieux nou interprète ene en sorte pou réconcilié ki casse dix acoze ene seul.
