content Allah plis ki tous kitchose

Question:

Ki veut dire content Allah Ta'ala et so Rasoul r plis ki tout kitchose?

Reponse:

Content Allah Ta'ala plis ki tout kitchose veut dire faire le maximum zeffort pou reste totalement dans l'obéissance Allah Ta'ala et sacrifié banne désir et plaisir pou le plaisir Allah Ta'ala. Disons ene dimoune li ena grand l'avantage dans ene certaine l'emploi mais li refuse accepté ça l'emploi-là  zisse acoze li pas d'après ceki Allah Ta'ala content. Donc la personne fine sacrifié so l'avantage personnel pou le plaisir Allah Ta'ala. Coumsa même ou content kikene ki ou ti à voudrait gagne li comme ou partenaire dans ou la vie mais ou néglige l'idée pou alle de l'avant avec ça zisse acoze ça l'union-là li pas ene l'union ki autorisé d'après Shariah. Ici aussi ou fine sacrifié ou désir pou le plaisir Allah Ta'ala. Quand ou fine sacrifié ene certaine kitchose pou le plaisir Allah Ta'ala, ça veut dire ki ou content Allah Ta'ala plis ki ça kitchose-là. Quand ene personne li donne priorité à ceki Allah Ta'ala content lors ceki li même li content, ça veut dire ki li content Allah Ta'ala plis ki tout.

Dans commencement, sacrifié banne désirs paraite assez difficile mais après ene certaine le temps ou pou tellement adapté ki ou pou gagne ene dégoût réel pou banne péchés, et vive dans le plaisir Allah Ta'ala pou vine ene kitchose extrêmement délicieux. C'est ene stage cote subir toute sorte difficulté dans chemin Allah Ta'ala li vine facile.

Content Rassouloullah r aussi plis ki tout signifié donne préférence le système de vie ki Nabi r fine enseigné lors tous banne lezot systèmes.

Bref nou gagne droit content kitchose ki nou oulé mais à condition ki ça pas faire nou casse l'ordre Allah Ta'ala et pas faire nou vive contre principe de Rassouloullah r. Au moment ki nou fine faire ça, nou fine montré ki nou content Allah et so Rasoul r plis ki tout kitchose.