Position bannes les doigts quand faire takbeer

Question.

Ki manière banne les doigts dans la main bizin été quand pé lève la main pou takbeer tahreemah ?

Reponse.

Hadice Abou Houraira  (R.a)

(كان رسول الله صلى الله عليه وسلم اذا كبر للصلاة نشرا صابعه" (الترمذى/ المستدرك) 

Traduction :- “Rassouloullah (s.a.w) ti pé ouvert so banne les doigts quand ti pé faire takbeer pou namaz.”                                                          (Tirmizi/Al-Moustadrak)

Position hadice :-

Al-Hakim pas fine faire aukene commentaire lor ça hadice-là. D’après Imam Tirmizi, le narrateur nommé Yayha Bin Yamaan, ki trouve dans le sanad de ça hadice-là, fine faire confusion dans rapporté.

C’est à dire Yahya Bin Yamaan, li tout seul fine rapporte ça hadice-là dans ene façon impé différent de tous so banne collègues. Alors d’après Imam Tirmizi, ça faire ça hadice-là vine dans catégorie ene hadice شاذ (étrange). Mais selon lezot Oulama, na perna aukene contradiction entre ceki Yahya Bin Yamaan et so banne collègues fine rapporté. Si ena kit différence, c’est différence dans formules. Mais de par zotte sens, tous les deux versions li ene seul. Na perna différence entre les deux. Donc dans ce sens, li pas ene hadice شاذ (isolé / étrange).

Explication :-

“Li ti pé ouvert so banne les doigts” veut dire ki li pas ti pé ploye so banne les doigts dans la main couma ene dimoune faire pou attache “coute-poin”. C’est à dire li ti pé ouvert so la main quand li ti pé faire takbeer tahreemah. La question eski banne les doigts bizin reste écarté ou bien bizin costé-costé, ça nou gagne ça dans ene l’autre hadice authentique avec impé plis détail. Selon ça hadice-là, ki trouve dans Al-Moustadrak, Hazrat Abou Hourairah (r.a) dire :
“Ena trois kitchose ki Rassouloullah (s.a.w) ti pé pratiqué, ki banne dimoune fine néglige li. (Ene parmi là-dans c’est) quand li ti pé diboute dans namaz li ti pé faire coumsa”. (Pou expliqué ki veut dire coumsa) Ene Rawi nommé Abou Aamir fine démontré la façon lève la main avec so la main (dans so démonstration) li pas fine écarte banne les doigts ni li fine costé zotte ensemble.
A la lumière ça deux hadices-là, quand Rassouloullah (s.a.w) ti pé lève la main pou takbeer tahreemah, ti pé ouvert so banne les doigts. Et so banne les doigts ti pé reste dans l’état normal. C’est à dire ni zotte ti costé-costé et ni zotte ti trop écarté.