Talaaq

Question No 1:

Dans l'époque Hazrat 'Oumar (r.a) , 3 talaaq ti compte ene seul talaaq ou bien 3 talaaq?

Réponse 1:

Dans l'époque Hazrat 'Oumar (r.a), 3 talaaq ti compte 3 talaaq même.

Question 2:

Dans l'époque Nabi (s.a.w), 3 talaaq ti compte ene seul talaaq ou bien 3 talaaq?

Réponse 2:

Dans l'époque Nabi (s.a.w)  aussi, 3 talaaq ti compte 3 talaaq même.

Question 3:

Bé ki faire dans ene hadice ki trouve dans Saheeh Mouslim, li dire ki 3 talaaq dans l'époque Nabi (s.a.w) ti compte ene seul talaaq?

Réponse 3:

ça 3 talaaq ki ti compte ene seul talaaq auparavant dans l'epoque Nabi (s.a.w) ti applique dans banne cas spécifique cote ene dimoune dire so madame talaaq, talaaq, talaaq. C'est-à-dire li prononce le mot talaaq 3 fois avec l'intention pou zisse mette l'emphase. Pas avec l'intention pou donne 3 talaaq. Ça pas ti appliqué pou ene dimoune ki dire ça avec l'intention pou donne so madame 3 talaaq.

Astere pou conne en vérité ki ça fine donné avec l'intention pou donne 3 talaaq ou bien avec l'intention pou mette l'emphase, ça li dépanne lors dimoune-là même so dire.
Auparavant banne dimoune ti honnête. Acoze ça quand dimoune ti pé dire ki li fine dire ça avec l'intention pou mette l'emphase, alors ti pé accepté li. Mais quand Hazrat 'Oumar (r.a) fine constaté ki mentalité dimoune pé changé et de plus en plus pé dégénéré, alors li fine passe la loi ki si ene dimoune dire talaaq, talaaq, talaaq, alors li pou compte 3 talaaq même. Li pas pou guette l'intention dimoune-là.

Question 4:

Eski ça signifié si ene dimoune prononce le mot "TROIS" quand li donne talaaq, tous les trois porté?

Réponse 4:

Exactement. Si ene dimoune dire so madame "Mo fine donne toi to 3 talaaq", alors 3 talaaq même pou compté parceki quand li fine dire le mot trois, ça pas capave signifié dans aukene façon, ki li fine dire ça pou mette l'emphase. Li ena ene sens précis et catégorique ki pas capave être interprété autrement. Donc ça façon donne talaaq-là fine compte 3 talaaq même tous le temps. Dans l'époque Nabi  aussi, ça ti compte 3 talaaq même. Jamais ça façon donne talaaq-là ti compte ene seul talaaq.

Question 5:

Zordi jour si ene dimoune dire so madame talaaq, talaaq, talaaq, alors combien talaaq li pou compté?

Réponse 5:

Li pou compte 3 talaq même. D'ailleurs zordi jour, en général tout dimoune prononce le mot talaaq 3 fois avec l'intention pou donne 3 talaaq même. Et ça c'est ene décision ki fine prend dans l'époque Hazrat 'Oumar (r.a) par Hazrat 'Oumar (r.a) en présence banne Sahaba-e-Kiraam sans être contesté par kikene. Si jamais ça décision-là ti ene décision ki pas corresponne avec Shariah et l'enseignement de Nabi (s.a.w), banne Sahaba pas ti pou reste tranquille. Continué pretanne 3 talaaq comme ene seul talaaq li ene coup dure lors l'intégrité et l'honnêteté de jamaat de Sahaba-e-Kiraam ki capave seulement émane de la part de ene ki pas Sunni couma banne Rafzi ou bien banne Shia.

Question 6:

Si ene dimoune continué vive avec so madame après ki li fine donne li 3 talaaq, ki so position d'après Shariah?

Réponse 6:

Li ene fassiq (pécheur endurci). Li pé vive dans haraam. Li ene personne ki pas capave fréquente li. Bizin pas accepté so l'invitation et ni invite li. Bizin ena ene boycottage complète avec ça qualité dimoune-là.

Question 7:

Ki position ene dimoune ki donne fatwa ki 3 talaaq li compte ene seul talaaq?

Réponse 7:

C'est ene personne ki fine perdi la vrai direction parceki li fine isole li avec l'ijma de banne Sahaba-e-Kiraam et de As-Sawaad Al-A'zam. Rassouloullah (s.a.w) fine dire:

"Suive As-Sawaad Al-A'zam (la grande majorité) parceki celui ki fine retire li ene coté, li pou être jeté dans l'enfer."

Hazrat 'Oumar (r.a), Hazrat Usmaan (r.a), Hazrat Ali (r.a), Hazrat Abdullah Bin Mas'oud (r.a), banne Sahaba-e-Kiraam en general, banne Tabeines et les 4 Imams, zotte tous dire ki 3 talaaq ki fine donné dans ene seul coup, li compte 3.

Après 3 talaaq, pas capave reste ensemble. Donne fatwa ki 3 talaaq li compte ene seul, en réalité li ene certificat pou vive dans haraam. Ene dimoune normal pas capave retire li de la grande majorité et néglige banne preuves clair, explicite et évident pou attrape ene deux ti boute texte ambigu.

Question No 8:

Si ene dimoune pe faire l'amoure avec so madame et par erreur li avale du lait so madame est-ce ki sa faire li vine haraam pou reste avec so madame? Est-ce ki so nikaah pou casser? ( Question depuis frere Yash)

Reponse. 8:

Non so nikaah pas pou casser et ni li pou vine haraam pou so madame.

Dimoune faire sa confusion la a cause ene mas'ala concernant " Quand ene ti baba fine boire du lait avec ene madame alors madame la pou vine so maman du lait". 

Explication:

Ene zenfant gagne droit boire du lait ki sorti depuis sein de so maman ou bien ene l’autre madame juska l’age de deux ans. Li Haraam pou faire zenfant boire du lait sein après avoir ki li fine gagne deux ans.
 
Si ene zenfant ki pas encore gagne deux ans et demi fine boire du lait depuis ene madame étranger, sa madame la pou vine so maman du lait, madame la so zenfant pou vine so frère et sœur, madame la so frère et sœur pou vine so mamou et khala et madame la so maman et papa pou vine so nani et nana. et li pou être considérer comme zotte mahram, conséquemment li pas pou gagne droit marié avec madame la et ni avec madame la so mahram. Sa la loi la pou appliqué juska zenfant la gagne deux ans et demi. 

Si après deux ans et demi zenfant la fine boire du lait avec ene madame, sa madame la pas pou être considérer comme so maman du lait, mais couma nous fine déjà dire ki li haraam pou ene zenfant sa l’age la boire du lait sein.

Si ene missier fine boire du lait de so madame, madame la pas pou vine haraam pou li, so nikaah aussi pou reste intact, mais sa pas veut dire ki quand missier la pas pou vine haraam alors li pou gagne droit boire du lait so madame.

Alors li pas permette pou ene missier boire du lait de so madame intentionnellement pareil couma li Haraam pou ene zenfant ki fine fini gagne deux ans boire du lait sein.